مئهران باهارلي
توركجه‌ده اوچ نازال سس واردير: مMm ، نNn ، نگ-نق Ññ. كاف-ي توركي، نون غنه، ساغير ن، گنيز ن`سي، كف-ي نون، كاف-ي نون، نازال ن.... آدلانديريلان نگ-نق Ññ سسي، بورونون درينليكله‌رينده گنيز ياخينلاريندان، بورون و آغيز بوشلوغونون آرخا بؤلومونده‌ن چيخارديلان، ن، گ و غ`نين بيله‌شگه‌سينده‌ن اولوشان بير سسدير.
"نگ-نق Ññ" سسي توركجه‌نين ان اسكي چاغلاريندان بو ديلده وار اولان بير سسدير. بو سس، بايري (باستان-ان اسكي) و اسكي توركجه‌يه اك اولاراق، سومئر كيمي پروتوتورك اولدوغو ساولانان (ايدديعا ائديله‌ن) ديلله‌رده، هابئله تورك گؤركول (اده‌بي) و كؤكله‌شيك (كيلاسيك) بتيكله‌رده (متينله‌رده) ده وار اولموشدور.
نگ-نقÑñ سسينين اوغراديغي ده‌ييشيمله‌ر
چاغداش توركييه توركجه‌سينده گنيز ن`سي آشاغيداكي ده‌ييشيمله‌ره اوغراميشدير:
گ`يه: اؤن-> اؤگ (بير سيرا لهجه‌له‌رده)م`يه: قونشو-> قومشو، دنوز-> دوموز، كؤينه‌ك-> گؤمله‌ك، اونورقا-> اومورقا، ....
گونئي آزه‌ربايجان و ايراندا گنيز ن`سي آشاغيداكي ده‌ييشيمله‌ره اوغراميشدير:ن`يه: يونگ ->يون، هانقيسي -> هانسي (هانقيسي-هانيسي-هانسي)، دنك -> تن
غ`يه: دونقوز -> دوغوز (تبريزده)، بانقيرماق -> باغيرماق، مونقول-> موغول، تونقوچ-> دوغوش
ق`يه: يالينقيز -> يالقيز
نگ-نق`يه: قارانقولوق، آنقيرماق
ي`يه: گؤنگول -> گؤيول، گليره‌نگ -> گليره‌‌ي، آنگلاماز -> آينه‌مه‌ز (ازه‌نده‌رييان، همه‌دان- گونئي آزه‌ربايجان)م`يه: سونگوك -> سوموك
و`يه: باشينقا -> باشيوا (تبريز، كركوك، وان، ...)
بير سيرا يئرله‌رده ايسه نگ-نق سسي، بوتونويله دوشموشدور: سونگرا -> سورا، تانگري -> تاري، گلدينگيز -> گلديز، آتانقيز -> آتاز، سانقكي -> ساكي (سانكي)، الينگيز -> اليز، ديلينگيز -> ديليز، سينقاري -> ساري (سينقاري -> سانقاري -> سانقري -> سانري -> ساري، -ي يييه‌ليك اكيدير)
بعضي دوروملاردا هر ايكي فورم قورونماقدا و ايشله‌ديلمه‌كده‌دير: يئني (يازي ديلينده)- يئنگي (آغيزلاردا)؛ يالنيز-يالقيز، دونقوز-دوغوز، ...
بعضي دوروملاردا ساغير ن`يه صاحيب اولان بير كؤك، توره‌وله‌رده ايكي آيري ده‌ييشيكلييه اوغراميشدير. اؤرنه‌يين بانگ كؤكونده‌ن چاغداش ديليميزده بان و باغيرماق سؤزله‌ري تؤره‌ميشدير (بانقيرماق -> باغيرماق)
ساغير ن، چاغداش توركجه‌نين تمه‌ل سسله‌رينده‌ن بيريدير
بو سس توركييه‌ده ايچ آناتولو بٶلگه‌سينين گنه‌لينده، ياخلاشيق بوتون باتي قوروپو لهجه‌له‌رينده، گونئي باتي آنادولودا، ايستانبول بؤلگه‌سينده قورونموش و سيخليقلا قوللانيلان بير حرفدير (آدانا، قايسئري، قيرشهير، كوتاهيا، نئوشهير، نييده دولايلاريندا، ...). آنتاليا و گٶلل.هر چئوره‌سي شيوه‌سينين ايسه تمه‌ل داشلاريندان بيريدير.
گنيز ن`سي آزه‌ربايجان و ايراندا، شهه‌رله‌رين بير چوخوندا اونوتولموشدور. آنجاق بونا قارشين، توركجه‌نين بير چوخ چاغداش لهجه‌سينده اؤزه‌لليكله كندليله‌ر، اويماقلار و ياشليلار آراسيندا ايشله‌كدير. بو سسين وار اولدوغو بؤلگه‌له‌ر، قوزئي آزه‌ربايجان´ين قازاخ، قاراباغ، گنجه، آيريم، نوخا، زاقاتالا، قاخ، ... ؛ گونئي آزه‌ربايجان´ين ساوا و سولدوز؛ ايران´ين گونئيينده قاشقاي؛ خوراسان´ين سرولايت، بام صفي آباد، جلگه رخ، گريوان، بجنورد، جوين جغتا،.... بؤلگه‌له‌ريدير.
اؤرنه‌يين گونئي آزه‌ربايجان`ين ساوا بؤلگه‌سينده يون-> يونگ، اؤن-> اؤنگ، بنزه‌مه‌ك-> بنگزه‌مه‌ك، گن-> گئنگ اولاراق سؤيله‌نير. خوراسان و قاشقاى آغيز و لهجه‌له‌رينده٬ گنيز ن`سي٬ فئعل اكلرينده واردير. اؤرنه‌يين: آلديق-> آلدينق.
ديليميزين بير چوخ لهجه‌سينده ساغير ن و يا نگ-نق سسي ديل بيلگيسينين تمه‌ل داشلارينداندير. اؤرنه‌يين:
١)-ايكينجي شخص يييه‌ليك اكي آلميش كلمه‌له‌رين يؤنه‌لمه حالي (اورمو، آزه‌ربايجان`ين باتي بؤلگه‌سينده بير چوخ يئرده، توركييه‌ده قارس، تره‌كه‌مه، اوردو): ائوييه‌ن (ائوينه آنلاميندا)، قاپييان (قاپينا آنلاميندا)، اليييه‌ن (الينه آنلاميندا)، يانييان (يانينا آنلاميندا)
٢)-ايكينجي شخص يييه‌ليك اكي آلميش كلمه‌له‌رين يوكله‌نمه حالي (اورمو، آزه‌ربايجان`ين باتي بؤلگه‌سينده بير چوخ يئرده، توركييه‌ده قارس، تره‌كه‌مه، اوردو: ائوييين (ائويني آنلاميندا)، الييين (اليني آنلاميندا)، قاپييين (قاپيني آنلاميندا)
گنيز ن`سي، آزه‌ربايجان توركجه‌سي ايله توركييه توركچه‌سينده‌ن باشقا، بير چوخ توركول (توركيك) ديلينده (توركمه‌نجه، تاتارجا، اٶزبه‌كجه،...) و قيبريس توركچه‌سينده هله ده وارليغيني سوردوره‌ن بير سسدير.
كاف-ي توركي و يا گنيز ن`سي اسكي توركجه‌ده‌ن فارسجايا گئچميش بير چوخ كلمه‌ده قورونموشدور. اؤرنه‌يين بانگ (چاغداش توركجه‌ده بان، بانقيرماق=باغيرماق)، كنگاش (چاغداش توركجه‌ده گنه‌ش)، درنگ (ديره‌نمه‌ك فئعلينده‌ن- تأخير)، سنگر (سنگيمه‌ك فئعلينده‌ن)، خدنگ، تنخواه (تانقا)، دانگ، ...
نگ-نق Ññ و يئني تورك لاتين اليفباميز
گنيز ن سسي، اورخون اليفباسيندا اؤزه‌ل بير حرفله گؤسته‌ريلميشدير. توركجه‌نين يازيلماسي اوچون قوللانيلان اويقور و بيراهمي يازيلاريندا دا بو سس، ن سسيني گؤسته‌ره‌ن حرفده ن آيري اولاراق گؤسته‌ريليردي.
ساغير ن سسي، عره‌ب كؤكه‌نلي اليفبادا چئشيتلي دؤنه‌مله‌رده "نك"، "نگ"، "نق" و بعضه‌ن ده اوچ نوقطه‌لي "ڭ" ايله گؤسته‌ريلميشدير. چاغداش عره‌ب كؤكه‌نلي تورك آبئجئسينده ايسه "نگ-نق" بيچيمينده گؤسته‌ريلير.
ييرمينجي يوز ايلين باشلاريندا قوزئي آزه‌ربايجاندا قبول اولونان لاتين اليفباسيندا بو سس،گؤز اؤنونده بولوندورولموش و اؤزه‌ل بير ايشاره‌تله اليفبايا داخيل ائديلميشدي. نئجه كي موساوات دؤنه‌مي و سونراسيندا ١٩٢٢ ده ق"يئني تورك اليفبا كوميته‌سي"نين قبول ائتدييي تورك لاتين آبئجئسينده، ساغير ن آدي ايله ده اؤز يئريني آلميش و "ᶇ" ايشاره‌تي ايله گؤسته‌ريلميشدير. ١٩٢٧ده باكيدا ياپيلان ايلك توركولوژي قورولتاييندا قورولان "تورك اليفباسي مركه ز كوميته سي" نجه منيمسه‌نه‌ن اورتاق تورك اليفباسيندا دا (بيرله شديريلميش يئني تورك اليفباسي)، ساغير و يا گنيز ن سسي، اؤزه‌ل بير حرفله " ᶇ" گؤسته‌ريلميشدي (باخينيز بو يازيداكي گؤروتله‌ره).
آنجاق چاغداش توركجه‌ده وار اولماسينا قارشين، بوگون توركييه و آزه‌ربايجان جومهورييه‌تله‌رينين لاتين اليفبالاري ايله اده‌بي و يازيلي ديلله‌رينده ساغير و يا گنيز ن سسينه يئر وئريلمه‌ييپ، اونا يالنيز لهجه و آغيزلاردا ياشاما حاققي تانينميشدير.
توركييه‌ده حرف دئوريمينده‌ن سونرا گنيز ن`سي گره‌كسيز گٶروله‌ره‌ك يئني تورك آلفابئ و يازيلي ديله آلينماميش و قوللانيلماسينا سون وئريلميشدير. اوندان سونرا دا ايلله‌ر بويو اٶكسوز و اٶگئي موعاميله‌سي گٶرموشدور.
آزه‌ربايجان بودونجونون (جومهورييه‌تينين) يئني لاتين آبئجئسينده ده، ديليميزده وار اولان "نگ-نق" سسيني قارشيلاياجاق هئچ بير بيچييه (حرفه) يئر وئريلمه‌ميشدير. بو اؤلكه‌ده قبول اولونان بوگونكو لاتين اليفبانين ان اؤنه‌ملي اسكيكليكله‌رينده‌ن بيري ده٬ ساغير ن سسين گؤسته‌ريلمه‌مه‌سيدير.
ساغير و يا گنيز ن سسينين لاتين اليفباسيندا گؤسته‌ريلمه‌سينين يارارلاري
آزه‌ربايجان و توركييه بودونجلارينين لاتين آبئجئلري، گونئي´ده گؤزو قاپالي قبول ائديلمه‌مه‌لي، بو ايكي اؤلكه‌نين دئنه‌ييمله‌رينده‌ن يارارلاناراق، ايران و گونئي آزه‌ربايجان توركلويونه داها دوزگون، داها منطيقلي و داها اكسيكسيز بير آبئجئ دوزه‌نله‌نيپ ياراديلماليدير. اولوشدورولدوقدان سونرا دا گونئي آزه‌ربايجان و ايران توركله‌رينين لاتين آبئجئسي، سوره‌كلي اولاراق گؤزده‌ن گئچيريلمه‌لي و يالنيز تورك ديلينين اؤزه‌لليك و گره‌كسينيمله‌ري تمه‌لينده گليشديريلمه‌ليدير. اويسا توركييه‌ده و آزه‌ربايجاندا اوزون سوره اؤنجه لاتين اليفباسينا گئچمه‌يه رغمه‌ن، قبول ائديله‌ن آلفابئله‌ر، توركجه‌نين فونئتيك گره‌كسينيمله‌ريني تام اولاراق قارشيلايا بيلمه‌ميشدير.
منجه ديليميزده وار اولان ساغير و يا گنيز ن سسينين لاتين اليفباسيندا گؤسته‌ريلمه‌سي بير نئچه آچيدان يارارلي و حتتا گره‌كليدير:
١-ساغير ن سسي، بؤلگه‌ميزده توركله‌ره اؤزگو بير سسدير و اؤرنه‌يين قونشو ايرانيك (ايراني) ديلله‌رين هئچ بيرينده بولونماز (بو سسين بولونماسي همه‌دان فارسجاسي كيمي بير سيرا فارسجانين آغيزلاريندا، توركجه ائتگيسينده‌ندير). بو سسين بوگون ده ديليميزده وار اولماسي، بيزيم تورك اولدوغوموزو دانان فارس دئوله‌تي و پان ايرانيستله‌ره قارشي سونابيله‌جه‌ييميز، ديليميز و خالقميزين (بودونوموزون) بايري (باستان) و اسكي (قديم) توركجه ايله توركله‌ره باغلي اولدوغونون ان ساغلام قانيتلاريندان بيريدير. بو سسين اليفباميزا آلينماسينين، تورك خالقيني فارس خالقي و ايراني سوي-گئچميشده‌ن آيريشديران بير ايشله‌وي ده اولاجاقدير.
٢-ساغير ن سسي، بو سسه صاحيب اولان ان اسكي و اسكي توركجه متنله‌رين (بتيكله¬رين) يازيپ اوخوماسيني قولايلاشديرديغي كيمي، دقيقله‌شديره‌ر.
٣-ساغير ن سسينين تورك لاتين اليفباسيندا اؤزه‌ل بير حرفله گؤسته‌ريلمه‌سي، تورك ديلينين ايران و آزه‌ربايجانداكي چاغداش لهجه‌له‌رينده (ساوا٬ سولدوز٬ قاشقاي٬ خوراسان٬ قوزئي آزه‌ربايجان، ....) يارانان و يارانماقدا اولان گؤركول (اده‌بي)، كؤكله‌شيك (كيلاسيك) و فولكلور ياپيتلارينين ثبت و اوخونوشونو قولايلاشديرماق (آسانلاشديرماق) و ايريمله‌شديرمه‌ك (دقيقله‌شديرمه‌ك) كيمي ايشله‌وله‌ري واردير.
٤-اولوشدورولاجاق يئني لاتين آبئجئ، آزه‌ربايجان توركله‌رينين بوتون آلت قوروپلاريني – ايران´ين قوزئي باتيسي (گونئي آزه‌ربايجان)، ايران´ين گونئيي (قاشقايورد)، ايران´ين قوزئي دوغوسو (آفشاريورد) و عراق توركمان اوجقار اوباسيني -قاپساياجاق بيچيمده تاسارلانيپ دوزه‌نله‌نمه‌ليدير. اونلارين ائحتيياجلاريني گؤز اؤنونده بولوندورمالي و داها دا اؤنه‌مليسي اونلارين قاتقيسي ايله، اونلارلا بيرگه اولوشدورولوپ گليشديريلمه‌ليدير. آنجاق ايندييه‌جه‌ن بو اؤنه‌ملي قونويا گره‌كه‌ن اؤزه‌ن گؤسته‌ريلمه‌ميشدير. بو آچيدان، قاشقاي اوجقار اوباميزين (ديياسپوراميزين) گنجله‌رينين منيمسه‌ديكله‌ري اؤز لاتين اليفبالارينا آلديقلاري و اؤزه‌ل بير حرفله ائنگما - Ŋ ŋ گؤسته‌رديكله‌ري ساغير ن سسينين، آزه‌ربايجان`ين لاتين اليفباسيندا دا عئينه‌ن آلينماسي و گؤسته‌ريلمه‌سي ياشامسال اؤنه‌‌مه صاحيبدير. بو ياپيلماز ايسه، تورك خالقينين ميللي بيرلييي ضره‌ر گؤروپ و خالقيميزين ايكي اليفبالي آيري ائتنيك قوروپلارا بؤلوشمه تهليكه‌سي دوغار.
٥-بعضي شخصله‌ر ديليميزه يئني بير سسين آرتيريلماسينا قارشي اولدوقلاريني سؤيله‌ييرله‌ر. آنجاق بورادا كيمسه ديليميزه حتتا اده‌بي و اؤلچون (مئعيار) توركجه‌يه يئني بير سس آرتيريلماسيني ايسته‌مير. چونكو ساغير ن و يا نگ-نق سسي ذاته‌ن بوگون ده ديليمزده واردير. بورادا ايسته‌نيله‌ن شئي، ديليميزده وار اولان بير سسين، اليفباميزدا دا اؤزه‌ل بير ايشاره‌تله گؤسته‌ريلمه‌سيدير. آماج، اسكي متينله‌ر، لهجه و آغيزلاردا ياراديلان اثه‌ر و ملزه‌مه‌ني ثبت ائده‌ركه‌ن بونلاردا گره‌كلي اولدوغو دوروملاردا ايشله‌ديله‌ن نگ-نق سسيني گؤسته‌رمه‌ك اوچون اولاناق ياراتماقدير.
٦-داها آز اؤنه‌ملي اولماق اوزه‌ره، نگ-نق سسينين گؤسته‌ريلمه‌سي بير سيرا ديل بيلگيسي آلانينداكي قاريشيقليقلاري اؤنله‌يه‌بيله‌ر. اؤرنه‌يين ايكنجي و اوچونجو تكيل شخصله‌ري آييرد ائتمه‌ك اوچون: "گلديييني" بيچيمينده يازيلان كلمه‌نين ايكي آنلامي اولابيله‌ر، بو آنلاملار نگ-نق قوللانيلديغي دورومدا قولايجا بير بيرينده‌ن آييرت ائديلير: "سنين گلدييينگي" يا دا "اونون گلديييني". يا دا گئنئتيف (-ين) حالي ايله ايكينجي تكيل شخص يييه‌ليك اكيني آييرد ائده‌بيلمه‌ك اوچون: "آدامين" اولاراق يازيلان كلمه‌نين ايكي آنلامي واردير كي نگ-نق قوللانيلسا بونلار بير بيرينده‌ن قولايليقلا آييرت ائديله‌بيله‌ر: "آدامين الي" و "سنينگ آدامينق".
يوخاريدا سؤيله‌نه‌نله‌رين ايشيغيندا منجه،ñ بيچييينين تورك لاتين آبئجئسينه اكله‌نمه‌سي يئرينده بير داورانيشدير. ديليميزده وار اولان بو سس اوچون، فونئتيك و مودئرن اليفباميزدا دا آيريجا و اؤزه‌ل بير حرف اولماليدير. آلمانجا اليفباسيندا ايتي ويا كسكين س حرفينه (ß) يئر وئريلدييي كيمي.
تورك اليفباسينين (آزه‌ربايجان-ايران) بوتونله‌شديريلميش لاتين آبئجئسي: اوتوز دؤرد بيچيك و بير هيم (ايشاره‌ت)
Aa, Bb, Cc, Çç, Dd, Ee, Əə, Ff, Gg, Ğğ, Hh, Iı, İi, Jj, Kk, Ķķ, Ll, Mm, Nn, Ññ, Oo, Öö, Pp, Qq, Rr, Ss, Şş, Tt, Uu, Üü, Vv, Xx, Yy, Zz, ‘
گرچه‌يه هو
Sozumuz, a window opening to the life/culture of the turkish nation of iran/south azerbaijan: |
No comments:
Post a Comment