Türkçülük, Türkiyeçilik değil!*
Hilal
یئر اوزونده اولان خالقلارین هامیسینین گئچمیشی، گله نكلری(عنعنه لری) واردیر. هئچ خالق گؤیدن یئره دوشمه ییب یوخدان دا بیردن اورتایا چیخماییبدیر. بو خالقلارین گلیشمه سوره جینین (پروسه سینین) بیر- بیریندن دئگیشیك اولماسیندا هئچ سؤز یوخدور. بیریسینین یازیلمیش تاریخی اولوب، بیریسینین ده گئچمیشی سینه لرده یاشاییب سؤنوب یادا یاشاماقدادیر. تورك لرین ده دونیادا اولان باشقا خالقلار كیمی بللی گئچمیشی، اویقارلیقلاری واردیر. دونیا امپراطورلوقلاری یارادماقلارینا باخمایاراق توركلر هر زامان خوشگؤرولو(تولئرانسلی) اولوب، حؤكوم سوردوكلری خالقلارا سایقی، ایستی قانلیقلا یاناشیب، اونلارین دینلرینی، یاخچی دبلرینی بئله منیمسه ییب یاییمیشلار. بونلار، توركلرین توتوجو(فوندامئنتالیست) اولمادیقلارینین آیدین فاكتلاریدیر. تورك لرین گئنیش آلاندا (ساحه ده) یاشادیقلارینا، ییغجام حؤكومتلری اولمادیقلارینا گؤره، تورك بویلاری(قبیله لری) بیر-بیریندن بیرآز دئگیشیك -یاشادیقلاری یئردن آسیلی اولاراق- گلیشمیشلر. آنجاق، بو اونلارین توركلوكلرینی ایتیرمك آنلامینا گلمیر، بونون ترسینه اونلار توركلویو داها گئنیشله دیب یاییمیشلار. سؤزوموزو آیدینلاتماق اوچون تورك، توركلوك، توركچولوگین نه اولدوغونو آچیقلامالییق.
تورك كیمدیر؟ تورك سویوندان(ائتنیكدن) اولان، تورك كولتورو داشییان اینسانا تورك دئییلر. بئله سینه تورك آتا -آنادان اولان، اؤز دیلینی دانیشا بیلمه ین كیمسه ده تورك ساییلار. اؤرنك اوچون، آلمانیادا اولان توركجه دانیشا بیلمه ین تورك قورشاقی (نسلی) آلمان ساییلمیر؛ ائله ده فرانسادا اولان عربلر فرانسیز ساییلمیرلار. ایران آدلاندیریلان یئرین، روسییانین تورك اولمایان یئرلرینده چوخ ساییدا اؤز دیللرینی دانیشا بیلمه ین توركلرین اولماسی دا بوندان قایناقلانیر.
توركلوك نه دیر؟ توركلوك، تورك اینسانینا باغلی اولان یاشاماق كولتورودور. بو یاشاماق كولتورو، اؤزونو دین ایله یاناشی یئمك، ایچمك، توی، یاس، توپلومسال ایلیشگیلر، یازین(ادبیات) ائله ده آنلیقدا(ذهنیتده) گؤستریر. توركجه دانیشماق، توركلویون بیر پارچاسیدیر، آنجاق توركلوك توركجه دانیشماقدان آسیلی دئگیل. بونو آیدینلاتماق اوچون ایران آدلاندیریلان یئر یاخچی بیر اؤرنك دیر. بورادا تورك اولمایان خالقلارین یاشاماق كولتورو، توركلرین یوز ایللر بویو بو اؤلكه یه حؤكومت ائتدیكلرینه گؤره -توركجه دانیشمادیقلارینا باخمایاراق- تورك كولتوروندن بؤیوك چاپدا ائتكی لنمیش. بونو اونلارین یئمكلرینده،گونجل یاشاملاریندا، ایلیشگیلرینده، اینانچ لاریندا -اینانچ یالنیز دینسل اینانچ ساییلمامالیدیر-، بایراملاریندا هابئله باشقا گله نکلرینده ده گؤرمك اولار. بونون ترس اؤرنكی ده بولغارلاری سایماق اولار. بولغارلار كؤكونده تورك اولموشسالار دا، چوخدان بری اسلاولارین ایچینده یاشایاراق دیللرینی ایتیریب، خریستیان اولوب، كولتورلرینی قورویا بیلمه یره ك اونلارین ایچینده ارییب تورك كیملیكلرینی ایتیریبلر.
توركچولوك نه دیر؟ توركچولوك دوشونه (ایدئولوژیه)، دینه باغلی اولمایاراق بوتون توركلرین اورتاق اولوسال دگرلرینی قورویوب، توركلویو، توركو ساوونماقدیر. توركچولوكده دیل، كولتور، یازین ان باشدا گلن فاكتورلاردان دیرلار. توركچو، بیر ائل، یورد، اؤلكه یه یوخ، اؤزونو بوتون تورك ائللرینه باغلی بیلیر. توركچو بیریسی، گئنیش آنلامدا (معنی ده) بیر اینترتورك، دئملی بیر اینترناسیونالیست كیمی دیر. توركچو، توركلرین سیاسال بیرلشمه لرینه ماراقلی اولماسا دا، قارداشلیغینی، دایانیشمالارینی(همرایلیکلرینی) ساوونور. توركچویه پانتوركیست دئییلمز، آنجاق پانتوركیستلر ده توركچو ساییلارلار.
آذربایجان مین ایللردن بری توركلرین آنایوردو اولوب، بو توپراقدان توركلر بیر چوخ یئرلره حؤكوم سوروب ائله ده كؤچ ائدیبلر. آذربایجان بیر تورك اؤلكه سی اولاراق توركلویون یاتاقی، قایناغی ساییلیر. بیلیندیگی كیمی توركچولوك دوشونجه سی ا. قاسپیرالی دان سونرا آذربایجاندا گلیشیب، اوبیر تورك ائللرینه ده بوردان سیچیراییبدیر. 20 -جی یوزایله یاقینلاشیركن توركلرین دونیادا گوج ایتیرمه لری داها دا قیوراقلاشیر. اوندان سونرا توركلرین بؤیوك بؤلومو روس - فارس حاكمیتلرینین الینده اسیر دوشرکن توركیه ده اوسمانلی(عثمانلی) امپراطورلوغونون ییخیلماسیندان سونرا، توركلر بؤیوک اؤندر مصطفی کامال پاشا باشچیلیغی ایله اؤزلرینه یئنی، چاغداش بیر دئولت قورماغی باشاریب بئله سینه تورك ایله توركچولویو قورویورلار. بو اسیرلیك دؤورونده قوندارما سؤزلر، تاریخلرله روس - فارس شوونیستلری توركلری اؤز كؤكلریندن اوزاقلاشدیرماغا، اونلارا اسكیكلیك كومپلكسینی آشیلاماغا چالیشیرلار. بو سوره ده، تورك اولماق بؤیوك سوچ(گناه) ساییلاراق توركلویه قارشی آلچاقجاسینا پیس تبلیغلر آپاریلیر. یالنیز، توركیه اولدوغو كیمی قاچان توركلرین سنگری اولوب، اوردا تورك ایله توركچولوك داها گوجلنه ره ك اؤزونو بیر آتیلقان(دینامیك) گوجه چئویریر. بوگون ده توركیه نی توركچولویون باش آتی سایماق اولار.
بونا قارشی روسلار ایله فارسلار دا بوش دورماییب، "تورك"لره(توركیه یه) قارشی اولومسوز(منفی) تبلیغلرینی سوردوروبلر. بو تبلیغلرده تولكوجه سینه توركیه، تورك، توركچولوك هر زامان بیر آنلامدا ایشله نره ک تورك خالقلارینین ایچینده آیریلیق سالینیلیب، توركیه یه قارشی دا بیر قارشیلیق(آنتیپاتی) یارادیلیبدیر. بو دوغرولتودا توركوستاندا(اورتا آسیادا)، آذربایجاندا دیلیمیزین آدی دئگیشیلیب، تورك دیلینه یئنی قوندارما آدلار تاخاراق آنتی تورك، توركیه اولدوقلارینی گؤستریبلر. بئله سیاستلر، كولتور، اویقارلیق سؤمورگه چیلیگینین ان آچیق- آیدین بیچیمی ساییلیرسا دا، نه یازیق هله ده بیر چوخ تورك ائللرینین آیدینلاری بو یاخیجی-ییخجی سیاستین فرقینده اولماییب، اؤز خالقلاریمیزین اولوسال چیخارلارینا ترس اولان دوشونجه لری ایره لی سوروب ساوونورلار.
اینسانین دانیشیق دیلینی آخار سویا بنزه تسك، او دیلده دانیشان خالق دا بیر دنیزه اوخشایار. هر نه قده ر او دنیز گئنیش، بؤیوك اولسا آخار سویون گوجلو اولماسینین ائله ده دنیزین زنگینلیگینین گؤسترگه سیدیر. بؤیوك خالقلارین دیللری گئنیش چاپدا ایشله نیب، ایشله دیكجه ده زنگینله شیر. اؤرنك اوچون فرانسیز دیلینه بیر باخاق.
ایللر اؤنجه فرانسیز دیلینی یالنیز فرانسیزلار –فرانسانین ایچینده بیر خالق- دانیشیردی، آنجاق فرانسیزلارین سؤمورگه چیلیك سیاستی سونوجوندا بو گون دونیادا اوتوزون اوستونده اؤلكه فرانسیزجا دانیشیر. بونلارین چوخونلوغونو قاراآفریقا اؤلكه لری اولوشدورور. فرانسیزلار اؤز دیللرینی، كولتورلرینی یاییب گئنیشلندیرمك اوچون "فرانكوفون" آدی آلتیندا، بوتون فرانسیزجا دانیشان اؤلكه لری بیر آرایا توپلاییب، بیر فرانسیز بؤلؤگؤ (بلوكی) یارادیبلار. بیز توركلر ایسه، اؤز دیلیمیز توركجه اولاراق اوبیر تورك ائللری، اؤلكه لری ایله بیر آرایا گلمكدن چكینیب قورخوروق! سانكی بیر آرایا گلیب، اورتاق دیل-كولتوروموز گئنیشله ندیریب تانیتدیرساق باغیشلانیلماز بؤیوك بیر سوچ ایشله میش اولاریق!
توركیه نین بو گون پاراسل(مادی)، گلیشمیش تئكنیك، یئتیشمیش كادر باخیمیندان اوبیری تورك اؤلكه لرینه گؤره قاباق اولماسی بیر آچیق گئرچك دیر. بوتون توركلر توركیه ده اولان "اولوملو" گلیشمه لری قوللانیب منیمسه مه لی، قالان یولو دا گله جكده بیرلیكده گئتمه یه چالیشمالیدیرلار. توركچولویون سینیری(حد-مرزی) یوخدور، هئچ بیر اؤلكه نین ده تك الینده (انحصاریندا) دئگیل. اؤز دیل، كولتورلرینه یئیه دوروب، بو گونكو دونیا اؤلچولرینه اویغون اونو گلیشدیرمک توركلویو سئون، تورك اولان خالقلارین بوتونونون دوغال(طبیعی) حاقیدیر. بیر توركیه لینین تورك اولدوغو دیین(قدر) بیر توركمن، آذربایجانلی، اؤزبك، تاتار، باشقیر، قیرقیز، قازاق دا توركدور. هئچ بیر تورك ائلینین اوبیریسینه توركچولوكده اوستونلویو یوخدور، آنجاق بیری الی-قولو آچیق اولاراق گلیشیب، اوبیریسی ایسه سؤمورگه چیلیک بویوندوروغو آلتیندا ازیلیبدیر. ایندی ایسه، دموكراتیك بیر بیچیمده ال-اله وئره رک گؤللوكدن چیخیب، دنیزه دؤنره ک گله جگیمیزی گوونجه آلتینا آلماق بوتون تورك بویلارینین گؤرویدیر. توركیه، تورك دونیاسینین بؤیوك بیر پارچاسی دیر. اونو باش سایساق، گؤوده سی(بدنی) توركوستان، الی-قولو باشقا تورك ائللری، اوره گی ده آذربایجان دیر. توركچولوك، توركیه چیلیك دئگیل. توركچولوك شوونیزمه، سؤمورگه چیلیگه قارشی باشقا تورك ائللرینی ده سئومك دیر.
*بو یازی ایلک، آلمانیادا چیخان "اولوس" قزتینین 12-جی ساییسیندا 1996-دا یاییملانیب، ایندی ایسه یازی باخیمیندان دوزلیش آپاریلیبدیر.
No comments:
Post a Comment