بؤگوش (فلسفه)، ديلده‌م (منطق)، ديلده‌ك (استدلال)، شيلتاو (سفسطه)، بوشقوت-دكترين
مئهران باهارلي  سؤزوموز بؤگوش - فلسفه اسكي توركجه‌ده "بؤگوش" كلمهسي فلسه‌فه و حيكمه‌ت؛ و "بؤگو" حكيم و فيلسوفون قارشيليغيدير. بؤگو و بؤگوش كلمه‌له‌ري، فارسجاسي (تمركز فكر و انديشه) اولان "بؤگمه‌ك" مصده‌رينده‌ن كؤكه‌ن آلميشلاردير. بؤگوش كلمهسي بؤگ كؤكونه فئعلده‌ن آد ياپان –ش سون اكي و بؤگو كلمهسي ده عئيني كؤكه فئعلده‌ن آد ياپان –ي سون اكي آرتيريلاراق تؤره‌ديلميشله‌ردير. بؤگ كلمهسي اسكي توركجه‌ده دوشونجه‌نين اوداقلانما و يوغونلاشماسي؛ نسنه‌له‌ر و اينسانلاري بير يئرده قالاييپ ييغماق؛ آخان سويو اؤنونه سد ووراراق توپلاييپ بيريكديرمه‌ك آنلاملاريني داشيميشدير. بورادان حره‌كه‌تله، بير سددين آرخاسيندا سويون بيريكيب ييغيشماسي و توپلانيپ قالانماسي كيمي، "بؤگوش" و "بؤگو"ده ده، دوشونجه و حيكمه‌تين بيلگه بير شخصده بيريكيپ قالانماسي سؤز قونوسودور. بؤگو: حكيم، فيلسوف، عاليم، عاقيل، بصير، فكور، دانا، هوشمه‌ند آنلاملاريندادير. بو كلمه ايلك باشدا، هم عقل و هم جادي ايله گيزه‌ملي معنه‌وي گوجله‌ره يييه اولان كيمسه آنلاميندا ايشله‌ديلميشدير. اسكي توركجه‌ده‌ن بؤگو كلمه‌سينين قوللانيلديغي نئچه اؤرنه‌ك: "بؤگوله‌ر قووراغي" (مجمع حكما)؛ "ايذوك بؤگو بيليگليك" (اييي فلسه‌في بيلگيلي)، "بؤگو بيلگه" (ديواندا: حكيم فرزانه)، "بيلگه بؤگو" (قوتادغو بيليگده: فرزانه حكيم)، "بؤگو بگ كيم ائرسه، بيليگكه ياخين" (حكيم اولان حاكيم، بيليكلي اولمايا ياخيندير)؛ "اول ائلنينگ بؤگوسو حكيمي دوروپ" (او ائلين حكيم و فيلسوفو ايدي)، ... بو كلمه و تركيبله‌ر اسكي توركجه‌ده بؤگو كؤكه‌نينده‌ن ياپيلميشلاردير: بؤگولوك (حكيمليك، بيلگه‌ليك)، بؤگولوك ات اؤز (تن عرفاني)؛ بؤگولوك ارده‌م (تقواي حكمت)؛ بؤگوله‌مه‌ك (جادوگري)؛ بؤگوله‌نمه‌ك (داراي حكمت شدن، دانش عرفاني داشتن، سحر كردن، ...). گئچميشده بؤگو كلمهسي، شخص آدي اولاراق، اؤزه‌لليكله خاقانلارين آدلاريندا ايشله‌ديلميشدير. اؤرنه‌يين: بؤگو خاقان، بؤگو خان، تنگري بؤگو تنگريكه‌ن، كولوگ توق بؤگو تركه‌ن، ... اوغوز توركجه‌سينده وار اولان "بويو" كلمهسي (سئحر، جادي) اسكي بؤگو كلمه‌سينين (ايكينجي آنلامدا) ده‌ييشگه‌سيدير. بوگون ديليميزده كؤكده‌ش اولان ايكي بؤگو (فيلسوف) و بويو (جادي) كلمهسي وار اولدوغو كيمي، قيپچاقجادا دا كؤكده‌ش ايكي بوگو (حكيم) و بوگي (جادي) كلمهسي وار اولموشدور. تورك دوشونور و اوزان مئولانا دا، اؤز فارسجا ياپيتلاريندا "بوگي" كلمه‌سيني سئحر و افسون آنلاملاريندا ايشله‌تميشدير. توركجه بؤگو كلمهسي موغولجايا بؤ`ائ اولاراق گئچميش و قادين شامان آنلاميندا اولان موغولجا "ايدوغان"ا قارشيليق، اركه‌ك شامان، قام و قامچي آنلاميني قازانميشدير. موغولجادا بؤگه، بؤگوچو، بؤگه‌چي (شامان، قام)؛ بؤگه‌يين شاسين (شامانيزم)؛ بؤگه مؤرگول (شامانيست اينانج)؛ بؤگه‌له‌مه‌ك-بؤگه‌چيله‌مه‌ك (قامليق ياپماق، قامچيليق ياپماق، شامان تؤره‌ني ياپماق، روحلاري چاغيرماق، بويو ياپماق، شامانلاشماق) كلمه‌له‌ري ده عئيني كؤكه‌نده‌ن ياپيلان تؤره‌تيله‌ردير. بؤگ: بؤگ كلمه‌سينين آنلامي بير سددين آرخاسيندا آخان سويون بيريكيپ توپلانماسي، نسنه‌له‌ر و يا اينسانلارين ييغيشيپ قالانماسي، دوشونجه‌نين يوغونلاشما و اوداقلانماسيدير. موغولجادا عئيني كؤكه‌نده‌ن "بؤگه‌م"-"بؤگه‌ن" (ييغين، قالاباليق، توپاق، يوماق، اؤبه‌ك، يومرو، توپار، قوروپ)؛ "بؤگله‌مه‌ك" (تيخماق، انگه‌ل اولماق، اؤنله‌مه‌ك) و "بوگوگدال"، "بوگومتا" (انگه‌ل، مانئع) كلمه‌له‌ري تؤره‌ديلميشدير. اسكي توركجه‌ده بير مانئع آرخاسيندا بيريكمه‌ك و ييغيشماق آنلاميندا اولان بؤگ كلمه‌سينده‌ن آشاغيداكي تؤره‌تيله‌ر ده وار اولموشدور: بؤگه‌ت (سو توپلاماق اوچون ياپيلميش سد، سويون قاباغينا چكيله‌ن بند؛ سو بيريكديرمه‌ك اوچون قازيلان چوخور)؛ بؤگمه‌ك، بؤگه‌مه‌ك-بؤيه‌مه‌ك، بؤگه‌رمه‌ك (سد ووراراق سويو داليندا توپلاماق، ييغماق؛ سويون اؤنونه بند ياپيپ توپلانماسيني ساغلاماق، گؤل حالينا گتيرمه‌ك؛ سد چكيلمه‌ك، يولو باغلاماق، دوردورماق، حره‌كه‌تينه مانيع اولماق، قاپانماق: اول سوووق بؤگدو=او سويون اؤنونه سد ووردو؛ بگ سوسون بؤگدو=به‌ي سوسونو (عسكه‌ريني) توپلادي؛ تنگيزي قايغوقون بؤگمه‌ز=قاييق دنيزي بؤگمه‌ز)؛ بؤگونمه‌ك، بؤگولمه‌ك، بؤگه‌لمه‌ك، بؤگلونمه‌ك (سد وورولاراق توپلانماق: سوو بؤگولدو، سوو بؤگلوندو: آب راكد شد، سو بؤگلوندو: اوردو توپلاندي)؛ بؤگه‌نمه‌ك-بؤوه‌نمه‌ك (اوغوز توركجه‌سينده سد و بند وورولماسييلا سويون بيريكيپ توپلانماسي؛ بير نسنه‌نين اؤنو انگه‌ل ايله توتولماق؛ اينسانلارين بير آرايا ييغيشماسي)؛ بؤگوشمه‌ك (سد ووراراق سويو توپلاماقدا كؤمه‌كله‌شمه‌ك: اول مانگا سوو بؤگوشدو= او منه سد ووراراق سويو بيريكديرمه‌كده كؤمه‌ك ائتدي). نوت: بيزجه توركجه‌ده وار اولان ايكي بؤيور و بؤيره‌ك كلمه‌له‌ري ده بؤگ كؤكه‌نلي اولابيله‌رله‌ر. توركجه بؤيره‌ك (بؤگره‌ك، بؤگروك) كلمهسي فارسجا كليه، قلوه آنلاميندادير. بوراسي ووجوددا قانين تصفييه ائديلدييي بير سوزگه‌چدير. قانين بو سوزگه‌جين آرخاسيندا توپلانماسييلا گئريده قان باسينجي اولوشور؛ ايله‌ريده ايسه سوزگه‌چده‌ن گئچه‌ن سيوي بده‌نده‌ن ديشاري آتيلير. باشقا بير دئييشله بؤيره‌ك، قان آخيمي اؤنونده دوران بير بؤگ و سد گؤره‌وي اولان بير اورقاندير. بو اوزده‌ن ده بؤگره‌ك يعني (سد كيمي) آدلانميشدير. –ره‌ك سون اكي "اولدوقجا" و "كيمي" آنلاميندادير. اؤرنه‌يين: يئيره‌ك: اولدوقجا ياخشي؛ بؤگره‌ك: سد كيمي؛ قيسراق: اولدوقجا قيسيلميش؛ به‌يره‌ك: به‌ي كيمي؛ .... (بو كلمه‌ني بؤگور+ه‌ك (كيچيلتمه اكي) اولاراق آچيقلايانلار دا اولموشدور). گونوموزده بؤيور اولاراق سؤيله‌نه‌ن بؤگور-بؤگه‌ر كلمه‌سينين آنلامي ايسه، اينسان گؤوده‌سينين يانلاريندا بؤيره‌يين اولدوغو يئردير. توركجه بؤيره‌ك كلمهسي، موغولجايا بوائرئ اولاراق گئچميشدير. ديلده‌م - منطق ديلده‌ك: توركجه‌ده ديلده‌ك (اسكي توركجه‌ده تيلداق، تيلداغ، تيلتاق، ديلداق، تيلتاغ، ديلداغ، ديلتاغ، ديلتاق، چيلتاق، ...) كلمهسي فارسجا دليل، برهان، برهانه، انگيزه، حجت، سبب، علت، اساس، سند؛ هابئله اوستونده، نامينا، اؤترو، اوچون، ... آنلاميندادير. بو كلمه‌نين باشقا بير آنلامي باهانا، معذيره‌ت، يئرسيز تؤهمه‌ت (اتهام ناروا)دير. ديلده‌كسيز (تيلداقسيز) دليلسيز، اساسسيز دئمه‌كدير. ديلده‌ك كلمهسي، قوزئي دوغو توركول ديلله‌رينده فصيح آنلاميندا دا ايشله‌ديلميشدير. ديلده‌ك كلمهسي، ديلده‌مه‌ك فئعلينين كؤكونه –ك سون اكي آرتيريلاراق ياپيلميش بير كلمه‌دير. ديلده‌مه‌ك فئعلي ايسه، ديل كلمه‌سينه آددان فئعل ياپان –ده سون اكي آرتيريلاراق ياپيلميشدير (ايسته‌مه‌ك-ايزده‌مه‌ك، باغداماق، قولداماق، آلداماق، اونده‌مه‌ك، .... كيمي) اسكي توركجه‌ده ديلده‌ك كلمه‌سينين قوللانيلديغي بير نئچه اؤرنه‌ك: اول تيلداغ اوزه (بدين سبب، بناء عليه، از اينرو)؛ ائذگو نوم تيلداغيندا (به سبب موعظه نيكو)؛ تاپينماق تيلداغي بو ارير (سبب پرستش اين است)؛ ياولاق ائش توش تيلداغيندا (به دليل رفيق و همنشين ناباب)؛ نئگو تيلداغيم بار (چه معذرتي دارم؟)؛ تيلداغينداكي (اؤترو، اوچون، اوستونده)؛ تيلداغليق (سبه‌ب اولان، سبه‌بي اولان)؛ ... ديلده‌مه‌ك (تيلداماق، تيلتاماق) فئعلي (حجت آوردن، دليل آوردن، استدلال كردن)؛ اساسلانماق، بير شئيه باخماق، بير شئيي نظه‌ره آلماق؛ ديلده‌نمه‌ك (تيلتانماق، تيلدانماق) سبب شدن، اساسلانماق؛ ديلده‌كله‌مه‌ك (ديلتاغلاماق، تيلداغلاماق) دليل گتيرمه‌ك، عذر آوردن، بهانه آوردن، بحث كردن آنلاملاريندادير. ديلده‌م: ديلده‌مه‌ك كؤكه‌نينده‌ن ياپيلان ديلده‌م كلمهسي، منطيق آنلامينا قارشيليق اؤنه‌ريلميشدير. بو كلمه، ديلده‌مه‌ك فئعلينين كؤكونه (ديلده) –هم سون اكي آرتيريلاراق تؤره‌ميش بير كلمه‌دير. (ياشام=زندگاني، بوته‌م=دين، بيچه‌م=سبك، اسلوب، توتام= به اندازه يك مشت، قورام= تئوري، ... دولام، بورام=گوجلو قوخو، يوردام=يئيينليك، باجاري (يورتماق`دان)، گؤركه‌م= احتشام، آرتام، گره‌م، دؤنه‌م=دوره، ديزه‌م=ريتم، دوزه‌م=دوزاژ كلمه‌له‌ري كيمي). ديلده‌م كلمهسي هم عره‌بجه كؤكه‌نلي منطيق و هم اونون آوروپا كؤكه‌نلي قارشيليغي اولان لوجيك`ين ايچه‌ردييي قاوراملاري اؤزونده بارينديرماقدادير. ١-منطيق كلمه‌سينين آوروپا ديلله‌رينده اولان قارشيليغي لوجيك، لوژيك logic كلمه‌سيدير. لوجيك، يونانجا لوگيكه (logike ايستيدلال ائتمه اوزلوغو=صنعه‌تي) و او دا لوگيكوس`دان (logikos قونوشما و ايستيدلال ائتمه‌كله ايلگيلي) آلينمادير. بورادان حره‌كه‌تله منطيق`ين توركجه قارشيليغي اولان كلمه‌نين ده ايستيدلال`لا باغلانتيلي اولماسي دوغالدير. ايستيدلال`ين توركجه‌ده‌كي قارشيليغي ايسه ديلده‌ك`دير (تيلداغ). ٢-عره‌بجه كؤكه‌نلي منطيق كلمهسي، نوطق و يا قونوشما ايله ايلگيليدير. ديلده‌ك و منطيقه قارشيليق تؤره‌ديله‌ن ديلده‌م كلمهسي ده ديل و قونوشما ايله ايلگيلي اولدوغو اوچون، منطيق كلمه‌سينه سون كرته اويقون بير قارشيليقدير. ٣- منطيق فلسه‌فه‌نين دوشونجه بيچيمله‌ري ايله ايلگيله‌نه‌ن بير داليدير. بيليم و پيسيكيياتري آچيسيندان ايسه دوشونجه‌نين بيچيمي، دوشونجه‌نين منطيقسه‌ل ايچ اويومو ايله ائش آنلامليدير. دوشونجه بيچيمي و يا منطيقسه‌ل ايچ اويوم، دوشونجه‌نين آخيمي و ديزه‌مي (ريتمي) ايله بيرليكده، دوشونجه سوره‌جيني اولوشدورارلار. دوشونجه سوره‌جي- دوغرودان گؤزله‌مله‌نه‌مه‌دييي اوچون- دولايلي يوللاردان و ان باشدا شخصين قونوشما و ديليني گؤزله‌مله‌مه و ده‌يه‌رله‌نديرمه آراجيليغي ايله آنلاشيلار. بئله‌جه ديل، بيزي دوشونجه سوره‌جينه، دوشونجه سوره‌جي ده بيزي دوشونجه بيچيمي ويا دوشونجه‌نين منطيقسه‌ل ايچ اويومونا گؤتوره‌ن بير آراجدير. ديلده‌م كلمهسي ديل`ده‌ن منطيقه اوزانان بوتون بو سوره‌جي اؤزونده يانسيدير. ٤-اسكي توركجه‌ده ديلده‌م (تيلدام) كلمهسي ناطيق، ناطيق اولان شخص، گؤزه‌ل دانيشان، فصيح، ديل قيوراقليغي اولان آنلاميندا دا ايشله‌ديلميشدير. آنجاق بو كلمه، منطيق آنلاميندا اولان ديلده‌م كلمه‌سينده‌ن فرقلي اولوپ، ديل كؤكونه آددان آد ياپان –ده‌م سون اكي آرتيريلاراق تؤره‌ديلميشدير. (ارده‌م =فضيله‌ت؛ بيرده‌م =بيرليكده؛ تنگريده‌م =ايلاهي؛ بوقدام =كيفلي؛ گونده‌م =گونه‌شلي؛ اؤكته‌م =مغرور؛ سايدام =شففاف؛ چييده‌م=زعفران؛ ايلده‌م؛ يولدام =مكتب، طريق؛ قولدام؛ ايزده‌م؛ ييلدام؛ ...) بو باغلامدا اسكي توركجه‌ده تيلانقو (نوطق يئته‌نه‌يي) و تيلانقورماق (نوطق ائتمه، نوطق يئته‌نه‌يينه يييه اولماق) باغلانتيلي كلمه‌له‌ر ده وار اولموشدور. اوس دوزه‌ن: توركييه‌ده منطيق كلمه‌سينه قارشيليق "اوس دوزه‌ن" تركيبي اؤنه‌ريلميشدير. بيزجه بو اؤنه‌ري سورونلو بير تركيبدير: ١- اوس دوزه‌ن تركيبي، يوخاريدا آچيقلانان لوژيك و منطيق كلمه‌له‌رينين ايچه‌ردييي قاوراملاري (ايستيدلال و قونوشماني) ايچه‌رمه‌مه‌كده‌دير، اونلارا دؤنوك دئييلدير. ٢-اوس دوزه‌ن تركيبي، ديلده‌م`ين ترسينه، بيليم-پيسيكيياتريده ديل و قونوشما ايله منطيق و دوشونجه بيچيمي آراسينداكي وار اولان سيخي ايليشگيني اؤزونده بارينديرماماقدادير. ٣-آنلام اولاراق اوس دوزه‌ن، منطيق قاوراميني قارشيلامايير. چونكو اوس دوزه‌نينين آنلامي هوش و عقلين نيظاميدير، اويسا منطيق هوش و عقلين نيظامي دئييلدير، بلكه دوغرو ايستيدلال و دوزگون ائحتيجاج صنعه‌تينين دوزه‌نلي آراشديريلماسي دئمه‌كدير. ٤-اوس دوزه‌ن يئني دئگيسي، اسكي توركجه‌ده گئچگيسي اولان كؤكله‌رله دئييل، يئني توركجه‌ده (توركييه توركجه‌سينده) سون دؤنه‌مده اؤنه‌ريله‌ن بير كؤك (دوزه‌ن) يارديمي ايله ياپيلميشدير. اويسا يئني دئگي ياپمانين ان اؤنه‌ملي ايلكه‌له‌رينده‌ن بيري، ديلده وار اولان گئچگيلي كؤكله‌ري قوللانماقدير. ٥- تك كلمه اولان منطيق`ه قارشيليق اؤنه‌ريله‌ن اوس دوزه‌ن، تك دئييل، ايكي كلمه‌ليك بير تركيبدير. اويسا يئني دئگي تؤره‌تمه‌ده اؤنه‌ريله‌ن كلمه‌له‌ر، ايلكه اولاراق اصل كلمه‌ده‌ن داها قيسا اولماليديرلار. تك كلمه‌له‌ره قارشيليق ايكي كلمه‌ليك بيله‌شيكله‌ري اؤنه‌رمه‌ك گنه‌لده ساخينجاليدير. شيلتاق: توركجه ديلده‌ك و يا اويغورجادا تيلداغ كلمهسي موغولجايا چيلتاغ، شيلتاغ، شيلتاا؛ خالخا موغولجاسيندا شالتاق، شالتاخ؛ اسكي موغولجايا سيلتاق، ... اولاراق گئچميشدير (توركجه‌ده ت-د` له‌رين موغولجادا چ-ش-س`له‌ره دؤنوشمه‌سي اولايي. تنگيز-چنگيز، تور-جور اؤرنه‌كله‌ري كيمي). موغولجادا شيلتاغ-سيلتاق كلمهسي سبه‌ب، دورتو، عاميل، گودو، گره‌كچه، وسيله، باهانا، اويون، حيله، فيريلداق آنلاملاريندادير. عئيني كؤكه‌نده‌ن سيلتاماق فئعلي سبه‌ب اولماق، سبه‌بي اولماق، آراج اولماق، وسيله اولماق، كيمي گؤرونمه‌ك، باهانا بولماق، سبه‌ب گؤسته‌رمه‌ك؛ و سيلتاقان (شالتاقان) سبه‌ب، گره‌كچه، باهانا، وسيله، آراج دئمه‌كدير. توركجه تيلداغ كلمهسي موغولجايا گئچديكده‌ن سونرا شيلتاق بيچيمينده توركجه‌يه گئري گلميشدير. بوتون توركول ديلله‌رينده وار اولان بو موغولجا بيچيم (شيلتاق، شيلتا، شيلتو، سيلتوو، سيلتاو، ...) بهانه، عذر، معذرت؛ سوچ آتما، قارالاما، قارا چالما، حاقسيزليغا اوغراميش دؤيولوپ سؤيولموش كيمي باغيريپ چيغيرما، اورتاليغي گورولتويه وئرمه‌ك، يايقارا، ياپماجا اولاراق باغيريپ چيغيرماق، فيريلداق چيخارتماق آنلاملاريني داشيماقدادير. چاغداش توركجه‌ده شيلتاماق، شيلتاقلانماق و شيلتاق آتماق فئعلله‌ري (بهانه آوردن، بهانه پيدا كردن، معذرت آوردن، بهانه تراشيدن، دنبال فرصت گشتن)؛ سبه‌ب تاپماق، باهانا اويدورماق؛ شيلتاقچيق (باهانا تاپماقدا يئته‌نه كلي اولان) آنلاملاريندادير. بو كؤكه‌نده‌ن شيلتاو يئني دئگيسي سفسه‌طه و شيلتاولاماق سفسه‌طه ائتمه‌ك آنلاميندادير. شيلتاق كلمهسي فارسجايا دا گئچميشدير. بوشقوت-دكترين اسكي توركجه‌ده بوشغوت كلمهسي دكترين، آموزه، اصول حقيقي، عقيده، اؤيره‌تي، قوموت (راهكار، امر)، يؤنله‌نديرمه، يؤنه‌رگه، .... آنلاملاريندادير. بورادان بوشغورماق (اؤيره‌تمه‌ك، اؤيوت وئرمه‌ك، اؤنه‌رمه‌ك، يؤنله‌نديرمه‌ك)؛ بوشغونماق (اؤيره‌نمه‌ك، اؤيوت آلماق، يؤنله‌نديريلمه‌ك، قوموت آلماق)؛ بوشغوت (اؤيره‌نجي)؛ بوشغوتچو (گرچه‌كله‌ري اؤيره‌ده‌ن، قوموتان، تعليم وئره‌ن، تعليمات وئره‌ن)؛ بوشغوتلو (اؤيره‌نيم آلتيندا اولان) توره‌وله‌ري ياپيلميشدير. بوشقوت كلمهسي اؤيره‌نجي و شاگيرد؛ بوشقور كلمهسي اؤيره‌تمه‌ن، ائييتمه‌ن و تعليماتچي آنلاملاريندا دا ايشله‌ديلميشدير. چاغداش بوشقوت كلمهسي دوكترين، دوشونجه مكته‌بي و اؤيره‌تي آنلاميندا قوللانيلابيله‌ر. موغولجادا بوشوق (ايلاهي امر، تقدير، آلين يازيسي، كهانه‌ت، حدس، تخمين، تعليمات، ايذين، تصميم، ...) و بوشوقلاماق (اؤنجه‌ده‌ن خبه‌ر وئرمه‌ك، كهانه‌تده بولونماق، غئيبده‌ن خبه‌ر وئرمه‌ك، وحي ائتمه‌ك) كؤكده‌ش كلمه‌له‌ردير. لغتنامه مختصر فارسي-تركي: استدلال كردن: ديلده‌مه‌كDildәmәk ، ديلده‌مله‌مه‌كDildәmlәmәk اسلوب: بيچه‌مBiçәm انگيزه: دورتوDürtü بهانه: شيلتاقŞıltaq تفلسف: بؤگوشسه‌مهBögüşsәmә تئوري: قورامQuram دكترين: بوشقوتBoşqut دليل: ديلده‌كDildәk دين: بوته‌مBütәm روند: سوره‌جSürәc سفسطه: شيلتاوŞıltav طريقت: يولدامYoldam علم: بيليمBilim غريزه: گودوGüdü فرزانه: بيلگهBilgә فرم: بيچيمBiçim فضيلت: ارده‌مӘrdәm فلسفه: بؤگوشBögüş قاورام: مفهومQavram مستدل: ديلده‌كليDildәkli معني: آنلام Anlam منطق: ديلده‌مDildәm نظام: دوزه‌نDüzәn هنر: اوزلوقUzluq واريانت: ده‌ييشگهDәyişgә قيسا سؤزلوكQısa Sözlük : آخيمAxım : جريان آراجArac : واسطه آراجيليقAracılıq : وساطت آراشديرماAraşdırma : بررسي، تحقيق آنلامAnlam : معنا ات‌اؤزӘtöz : تن ارده‌مӘrdәm : فضيلت اوزلوقUzluq : هنر اوسUs : هوش اؤكده‌مÖkdәm : مغرور اولايOlay : حادثه اؤيره‌تمه‌نÖyrәtmәn : آموزگار، معلم اويساOysa : در حاليكه اويومUyum : هماهنگي ايچه‌رمه‌كİçәrmәk : محتوي بودن ائش آنلامليEşanlamlı : مترادف ايلكهİlkә : اصل ائييتمه‌نEyitmәn : مربي بارينديرماقBarındırmaq : در خود جاي دادن، پناه دادن باغلانتيليBağlantılı : مرتبط بوته‌مBütәm : دين (بوتمه‌كBütmәk : ايمان آوردن) بوشقوتBoşqut : دكترين، آموزه، مكتب فلسفي بوشقورماقBoşqurmaq : آموزاندن يك مكتب و آموزه بؤگلونمه‌كBöglünmәk : راكد شدن در پشت يك مانع بؤگمه‌كBögmәk : متمركز كردن و انباشتن بؤگه‌تBögәt : سد، بند بؤگه‌رمه‌كBögәrmәk : سد كردن بؤگه‌مه‌كBögәmәk : سد كردن بؤگوBögü : فليسوف بؤگوشBögüş : فلسفه بؤگوشسه‌لBögüşsәl : فلسفي بؤگوشسه‌مهBögüşsәmә : تفلسف بؤگوله‌نمه‌كBögülәnmәk : داراي حكمت شدن بويوBüyü : سحر، جادو بيچه‌مBiçәm : اسلوب، سبك بيچيمBiçim : فرم بيلگهBilgә : فرزانه بيله‌شيكBilәşik : تركيب بيليمBilim : علم توركولTürkül : توركيك تؤره‌وTörәv : مشتق دالDal : شاخه ده‌يه‌رله‌نديرمهDәyәrlәndirmә : ارزيابي ده‌ييشگهDәyişgә : واريانت دورتوDürtü : انگيزه دوزه‌مDüzәm : دوزاژ (دارو) دوزه‌نDüzәn : نظام دوزه‌نليDüzәnli : سيستماتيك، منتظم دوغالDoğal : طبيعي دولايليDolaylı : غيرمستقيم دؤنوكDönük : معطوف ديزه‌مDizәm : ريتم ديلده‌كDildәk : دليل، برهان، استدلال، حجت ديلده‌كسيزDildәksiz : بي دليل، بي پايه ديلده‌كله‌مه‌كDildәklәmәk : استدلال كردن، دليل آوردن، معذرت آوردن ديلده‌كليDildәkli : به سبب، معلول ( بو داورانيش، بيلگي ديلده‌كليدير: اين رفتار به سبب دانائي است، معلول آگاهي است)، مستدل ديلده‌مDildәm : منطق ديلده‌مسه‌لDildәmsәl : منطقي ديلده‌مه‌كDildәmәk : استدلال كردن، دليل آوردن ديلده‌نمه‌كDildәnmәk : مستدل شدن ديلده‌ييDildәyi : سبب چيزي، دليل امري (بو داورانيشين ديلده‌يي، بيلگيدير: دليل اين رفتار، آگاهي است) ساخينجاليSaxıncalı : داراي محظور، اجتناب كردني سايدامSaydam : شفاف سوره‌جSürәc : روند سورونلوSorunlu : مساله دار شيلتاقŞıltaq : بهانه شيلتاماقŞıltamaq : بهانه تراشيدن شيلتاقانŞıltaqan : بهانه تراش، كسي كه بسيار بهانه تراشي مي كند شيلتاوŞıltav : سفسطه شيلتاوچيŞıltavçı : سفسطه كار، سفسطه كننده شيلتاولاماقŞıltavlamaq : سفسطه كردن قارشيليقQarşılıq : معادل قاورامQavram : مفهموم قورامQuram : تئوري، نظريه قوللانماقQullanmaq : به خدمت در آوردن قوموتQomut : امر (قوموتماقQomutmaq : به هيجان آوردن، به حركت در آوردن) قووراقQuvraq : مجمع كرتهKәrtә : درجه كؤكKök : بن گودوGüdü : غريزه گؤركه‌مGörkәm : احتشام گؤزله‌مله‌مهGözlәmlәmә : مشاهده گئچگيGeçgi : سابقه گئچگيليGeçgili : سابقه دار گيزه‌مليGizәmli : اسرارآميز ياولاقYavlaq : بد، ناشايست يولدامYoldam : طريق، طريقت يوردامYordam : چابك و سريع، كاردان بودن يؤنله‌نديرمهYönlәndirmә : جهت دادن يئني دئگيYenidegi : نئولوژيسم Sozumuz, a window opening to the life/culture of the turkish nation of iran/south azerbaijan: http://sozumuz.blogspot.com/ http://sozumuz-turk-dovletler.blogspot.com/ |
No comments:
Post a Comment