تاریخ اوزمانلاریندان بیری "فمه وروب، باش یارماق صفویلرین ساواش ایزلریندندیر" دئییردی. او بئله ایضاح گتیریردی کی صفویلر و حتی گؤزل هونلار دا، ساواشدان اؤنجه قورخونو اؤزلریندن اوزاقلاشدیریب، دوشمنه قورخو سالسینلار دئیه، باشلارینی یاریب، گؤزل و آغ اوزلرینی جیزاردیلار. دوشمن اوز-باشیندان قان آخان اوردونو گؤرنده "بونلار اؤزلرینه رحم ائتمیرلر! باخ گؤر بیزه نه ائدهجکلر" دئییب، قورخویا قاپساناردیلار. کئچمیش دونیادا مودئرن اردولارین اولمادیغی اوچون ساواشی یالنیز روحی گوجلرله قازانماق اولاردی و بو باش یارماق "روحو یوکسهلیشه" ندن اولوردو. اورتا دوغودا و اؤزللیکله ایراندا بو دوروم حالا «بسیج!» آدی ایله داوام ائدیر. بئلنچی اؤلکهلر نیظامی ایستیراتئژیلره، تاکتیکلره، و تئکنیکلره دایانمادان، دوعا ایله روحو یوکسهلن بسیجلردن اؤلکه آراسی و اؤلکه ایچی ساواشلاردا یارارلانیرلار و البته کی اوردولارینین ضعیف اولدوغو یئرده بوندان باشقا دا بیر یوللاری یوخدور. بئلنچی اؤلکهلرده «آهنگران» کیمی روحیییه وئرن اوخوجولار ساواشین ایلک سیرالاریندا یئرلهشیرلر.
هر حالدا، روحییه وئرمکده اصل "میللهتی قویونلوقدان قوردلوغا یؤنتمکدیر!". آنجاق، گؤرونور کی ایندیکی قمه ووروب باش یارانلارین چوخونلوغو قوردلوقدان قویونلوغا و دوشونمهدن باش یارماغا دوغرو یؤنهلیبلر. اونلاردان چوخونو تانیییرام و اونلاردان قورخاغینی دا گؤرمهمیشم. صفویلرین ساواشچیلاری دوشمنی قورخوتماق اوچون باش یاریردیلار! بیلمیزم بونلار کیمی قورخوتماق ایستهییرلر! اونلارین اؤزلرینی شیشیلدیب، آلقیشلانسینلار دئیه، باشلارینی یاریب، شئبئه بزهمکلری ایله قورد اورکلیلیغین چوخ آیریلیغی واردیر. بو زمانهده باش یارماقلا مئیدان اوخوماق اولماز! بو زمانهده قلمله، یازی ایله مئیدان اوخوماق گرهکیر.
دئییلر کی بیر زامان بیر فارس ایله بیر تورک بیر-بیرینه قارشی یوموروق آتماق ایستهدیلر. تورک اوول نوبهنی فارسا وئردی و دئدی کی "اوول سن یوموروق آت" و سونرا آرتیردی "وور! برک وور! ائله وور کی انگیم داغیلسین! ائله وور کی گؤزوم پاتلاسین! و ..." یازیق فارس اؤز اورهیینده "بو اؤزونه رحم ائتمهین یئرده، باخ گؤر منی نه ائدهجکدیر" دئییب، قاچا-قاچا اوزاقلاشدی. ائله بونا گؤره ده، البته، واقتی گلدیکده باش یارماق دا لازیم اولاجاق. واقتی گلدیکده دوشمنین اورهیینه قورخو سالماق اوچون اؤز باشیمیزی دا یارماغیمیز گرهکهجکدیر! اؤز باشینی یارانلار باخ گؤر دوشمنین باشینا نه گتیره بیلرلر.
البته، بیر مسئلهنی ده یاددان چیخارتمامالیییق: هر زادی آلیرسینیزسا، اونون یئرینه باشقاسینی وئرمهلیسینیز! میللهتی چاغیریرسینیز کی "قمه وورمایین! باشینیزی یارمایین!". آنجاق، او ایشی گؤرمهسینلر دئییه، اونون یاخچی اؤزللیکلرینی قوروماق اوچون هانسی ایشی اؤنریرسینیز. میللهتی قانماز و آنلاماز یئرینه قویمایین! حتمن بیلیرسینیز کی میللهتین توپلانماغا و سویوق سیلاح ایله تانیش اولماغینا و نئجه قان تؤکولمکله تانیش اولماغینا، و .. یالنیز بو مئیدان قالیبدیر. او مئیدانی الیندن آلیب، هانسی مئیدانی یارتماق ایستهییرسینز؟! بللی کی بیلیرسینیز قاراباغلیلارین اللرینده هئچ بیر سیلاحین اولماماسینا گؤره و ساواش روحیهلرینین اولماماسینا گؤره باشلارینا قارا باغلادیلار. بو فورصتی میللتدن آلمایین! ایجازه وئرین میللت قمه ایله، قان ایله، باش یاریلماق ایله، و ... تانیش اولسون!
گونئیده و قوزئیده رقص ایکی فرقلی ساحهده گلیشمهیه داوام وئریر. قوزئیده رقص یالنیز تویلاردا و شنلیکلرده و بیر هونر کیمی قوللانماقدادیرسا، گونئیده شاخسئی-واخسئی دئمکله اؤزونو گؤستریر. دوزنلی بیچیمده چییین-چییینه، ال-اله وئریب، آیین اویونو ایله حوسئن دئینلرین یاللی یاس رقصی هئچ ده قوزئیدن دالی قالماییبدیر. بو آغیر یاس آیین اویونو گرچکدن ده باشقا رقصلردن اؤزللـه شیر. بو یاس آیین اویونونو آذربایجانین باشا-باشیندا گؤرمک اولار.
شنلیگه شوونلیک ائتمک آیری، شادلیغی باجارماماق دا آیری بیر ناغیلدیر. بو باسا بورونموش، و یاس اوچون مینلر تؤرن یارتمیش خالق، نه یازیق کی شادلیق اوچون هئچ بیر تؤرهنی یوخدور. بو میللت نئجه شادلیق ائتمهیی یاددان چیخاردیبدیر! گونئیلیلری دئییرم! چوخلو شادلیق آدینا قورولان تؤرنلره قاتیلیرام، آنجاق، یئمکدن و بیر آز ال-موسیقی چالیب، رقص ائتمکدن باشقا گؤرنمیرم. ائله بیل شادلیق یانی بو: یئ، چال، اوینا! قدیم زامانلار، اسکی کئچمیشلرده میللت بیر یئره توپلانیب، ناغیل دئییب، تاپماجا تاپیب، شبشهره قوروب، قووال چالیب، تار سسلندیریب، بی-گیزیر (شاه-وزیر)، ولا دؤیدو، گول-گول، و ... اویناییب، و گرچکدن شادلیغین نه اولدوغو چوخ یاخچی دوشونوردولور: حرکتله دولو بیر شادلیق! ایندی آما، ائله بیل قبیرلردن خوتلانیب، اوتولو کؤینکلره، دوم-دوز موجسسهمه کیمی اوتوروب، گولومسهیه-گولومسهیه، شاخ-شاخ گولورلر! هانی او کئچمیشین شاققیلدامالاری! هانی او کئچمیشین قاققیلدامالاری! یاسلا یاشلانان یاشاماق یانی بو.
آذربایجان میللی حرکتینین ایچینده قورونان قورپلار و قورپجوقلار ال-اله سانسور بازارینی قیزیشدیرماقدادیرلار. "او بیزدن دئییل، او بیزدن دیر!" سؤزو داها آغیزدان-آغیزا دولانیر. "او اونلارین یازیسیدیر، بو بیزیمکیدیر ! او اونلارین بایراغیدیر، بو بیزیمکیدیر! او اونلارین قوروپودور، بو بیزیمکیدیر! او اونلارین شههریدیر بو بیزیمکیدیر! او اونلاری آذربایجانیدیر، بو بیزیمکگیدیر! او اونلارین دیلیدیر، بو بیزیمکیدیر!" .. سؤزلری گرچک تجزیهنین گؤسترجهسیدیر. بو میللت فیزیکن و روحن گوندن-گونه بؤلونمکدهدیر! باغیشلایین! بو شیرین پاستانین (کئیکین) سون بؤلومو کیمین ایدی؟!
دوعا ایسلام دینینده چاغیرماق آنلامیندادیر. ندن چاغیرماق و نهیه چاغیرماق! بللی کی دوعا ائدن چاغیریر! دوعا ائدیلن چاغیریلیر! چاغیران نهیه چاغیریر: ائو! ماشین! پول! ریفاه! و ... آلماق اوچون چاغیریرمی؟! هاچان بیر قوناغی پول و یاردیم اوچون چاغیرارلار! تانرینی اؤز اورک سیفرامیزا قوناق ائتمک اوچون چاغیریب، اوندان پذیرایی ائدیب، بیزیم سوچلاریمیزی، آرامیزدا اولان کودورتلری و اینجیمکلری باغیشلا دئییریکمی، یوخسا، اونو چاغیریریق کی بیزه یاردیم ائدیب، بیر شئی وئرسین؟! ایکی الیمیزه دیللنچیلر کیمی آچیب، تانریدان دیلنمک ایستهییریکمی، یوخسا، باغیشلانماق! ایکی الیمیزی ندن دوعادان سونرا اوزوموزه چکهریک: تانریدان دیلندیغیمیز پارانی و یاردیمی اوزوموزه چکهریکمی، یوخسا تانرینین معنوی باغیشلاماسینی! البته کی تانرینین باغیشلادیغی تمیز روح باغیشینی اوزوموزه چکهریک!
بو میللت دوعا دهلیگینی ایتریب، چاغیرماق یئرینه دیلنمهیه آلیشیبدیر. ائو ایستهییرسنمی؟ ماشین ایستهییرسنمی؟ ساغلیق ایستهییرسنمی؟ و ... گئت اؤزون قازان: سندن حرکت، تانریدان برکت! تانری دوعا ایله جان باغیشلاسایدی حوسئن (ع) ایمامیمیز دا اونو ایستهمک اوچون دوعا ائدردی! ایمام حوسئین (ع) سنین-منیم سوچلاریم باغیشلانسین دئیه تانریینی چاغیردی و اؤز قیزیل قانینا بلندی. دونیا مالی یا آخرت مالی ایستهییرسنسه سونوجو گؤزلهمدن ایش گؤر! سونوجو تاپیشیر تانرییا! حرکتی اؤزووه سونوج بیل، برکتی یوخ!
«ایمام حوسئین» (ع) مظلومیییهتینه آغلایان آذربایجان تورکلری او اولو ایمامی ائله اؤزلرینه اولقو توتوبلار کی اؤزلرینی مظلوم کیمی گؤسترمکله او ایماما یاخین اولماق ایستهییرلر. حوسئنچیلیک ائله اونلارین روحلارینا ایشلهییبدیر کی حوسئین کیمی باشی کسیلمک، حوسئین کیمی مظلوم اولماق، و ... اونلارا بیر ایفتیخار اولوبدور. بیلمیرم کی، ایمام علی(ع)ین یاریلان باشی کیمی باشلارینی یارانلار نه قدر اؤزلرینی او ایماما یاخین گؤره بیلرلر. آنجاق، کئشکه یالنیز باشی کسیلن اتشان ایمام حوسئینی اؤزلرینه اولقو توتانلار، بیر آز دا اولسون ایمام علی (ع) اؤزلرینه القو توتاردیلار. او ایمام کی ساواشلارین هامیسیندا اوزو آغ چیخدیر و دوشمنین گونونو قارالتیبدیر. صولح ائدن ایمام حسن (ع) و قانینا بهلهنن قییام ائدن ایمام حوسئین (ع) و «حسن-حوسئین» اولماق یئرینه کئشکه ایمام علی (ع) اؤزوموزه اولقو توتاردیق! کئشکه قوللاری قلم ابوالفضل (ع) کیمی اؤز حوسئینیمیز، اؤز دیلیمیز، اؤز وطنیمیز و اؤز میللهتیمیز یولوندا ساواشا بیلردیک.
کوردون، ائرمنینین، و حتی فارسین آذربایجانلیلار کیمی مظلوم حوسئینی یوخدور! اونلار یزید اولماغی حوسئین اولماقدان یاخچی باجاریرلار. آذربایجانلی اؤزونو هئچ زمان یزید یئرینه قویوب، باش کسه بیلمیر! آما، بیر کورد سو ایچیم کیمی اوشاق، قادین، قوجا، و ... تانیمادان یزید اولماغی یاخچی باجاریر. مظلوم آذربایجانلیلارین هر گونو عاشورادیر!
بیر سیرا یولداشلاردان دئییرلر کی بیز قورپلو و تیمی ایشلهیه بیلمیرک و قوروپلو ایشلهمک کولتورو بیزده یوخدور! آما، من بئله دوشونمورم! من دوشونورم کی قورپلو ایشلهمک لاپ بیزیم قانیمیزدادیر و بیزیم «یالنیز ایشلهمک» کولتوروموز یوخدور! یولداشلارین چوخونون بئینینه بیر ایش و بیر دوشونجه یئتیرینده، او ایشی و دوشونجهنی تئزلیکله باشقالاری ایله پایلاشیب، او ایشی بیرلیکده باشلاماق و گؤرمک ایستهییرلر، تکلیکده ایش گؤرمکدن قاچیرلار! بو گؤستریر کی بیزیم میللت تک-تک چالیشماق ایستهمیر و بیر ایشی قورپلو گؤرمهیه چوخ ماراقلیدیر. بو میللهتین نئجه ایش گؤردویونه باخارساق، گؤرونور کی اکینچیلیکده، قالیچیلیقدا، صنعتی ایشلرده، حوسئینچیلیکده، و بوتون ساحهلرده میللت بیرلیکده چالشماغی تک چالیشماقدان چوخ ایستهییر. هئچ کیمی تکلیده ساواش مئیدانینا گیرمک ایستهمیر!
آنجاق، هر ایشه و هر دستهیه بیر دستهباشی لازیمدیر. بیز اؤیرنمهلیییک کی هر ایشی گؤرمک (ائتمک) اوچون و یئرینه یئتیرمک اوچون، لازیمدیر کی اؤزوموز دستهباشی اولوب، باشقالارینین یاردیمینی ایستهیک. "ییغیلاق گئدین ساواشا" دئمک یئرینه، "من گئدیرم ساواشا، سن ده بئلیمی باغلا! سن ده سیلاحیمی تمیزله! سن ده یئمهییمی حاضیرلا! و ... " دئیک! بئینیمیزه چاتان هر ایشه و حرکته اؤزوموز دستهباشی اولاق.
1385دن دؤرد ایلدیر کی تبریزده یاشاییرام! بو شهرده او قدر سورونلار، چتینلیکلر، آخساقلیقلار، و ... گؤرموشم کی دئمه! آما، بیلمیرم ندن بو میللت یازمیر! ندن اؤز سورونلارینی یازماق ایستهمیر! یازیلمایان درده نئجه درمان تاپماق اولار؟! دئییلمهین درده نئجه مرحم تاپماق اولار؟! دئمیریم بیر اوزمان کیمین، بیر سییاس کیمین، بیر ادیب کیمین، بیر موورریخ کیمین، بیر دوهتور کیمین، بیر موقتصید کیمین و ... یازین! البته کی ائله یازماق دا گرهکیر، آنجاق، او ساحهلرده اوزمان اولانلارا. آما، کولته ایچینده اولان دردلریمیزی یازین، لوطفاً! تاکسیدا، اوتوبوسدا، یولدا، ائوده و ائشیکده ائشیتدیغینیز و دوشوندویونوز دردلری کاغاذ اوستونه گتیرمهلیسیز و اوزمانلاردان درمان ایستهمهلیسیز!
پوللو یولداشلاریم! لازیم دئییل کی سیز واقتینیزی اؤز ساحهنیزده اولمایان اینسانی و ایجتیماعی دردلره درمان تاپماغا ایشلهدهسیز! یئتر کی پولونوزدان اینسانی بیلگیلر اوزره اولان اوزمانلاریمیزا وئریب، اونلاردان یازیلمیش درمان ایستهیهسیز. آما، سیز ده یازمالیسنیز! یاز قارداشیم یاز!
قورخو ایله سئومک اولماز! سئویرسنسه قورخودان یوخ، ایستهمکدن سئو! تانرینی سئو! تانری خورتلان دئییل کی اوندان قورخاسان. تانری گولنده دیشلری قرلتمز! تانری گولن اوزدن خوشلانار. میللهتی قورخاقلیغا آلیشدیرمادان، سئوگییه آلیشدیرین آی ماللالار!
No comments:
Post a Comment