گله جک بیزیمدیر بئی لریم خانیم
آلوولار یوردودور سولدوزوم منیم
سولدوزا آنادیر تبریز وطنیم
قوردلاری اولاجاق ایت لره قنیم
یالتاق لار اوباسی اودلانسین گه رک
***
تورک لرین خالقینا دولاشماق اولماز
داغلاری اوجادیر کی آشماق اولماز
دولاشسان کؤکونه بیل قاشماق اولماز
یا جانلار گئده جک یا قانسین گه رک
***
سوچ سوز اینسانلارا قورشون یاغدیردیز
شوشه تک اوره گی سیندیردیز قیردیز
نامردلیک سویونو باشدان آشیردیز
ائوینیز ییخیلسین یا یانسین گه رک
***
ساتیلمیش اینسانا منیم سؤزوم وار
آناسی چکه جک بیر گون آه و زار
گئنیش بیر دونیادا اولموش اونا دار
قارداشی ساتماقدان اوتانسین گه رک
***
دیل اوسته گئدیبدیر « توحیدین » جانی
تؤکولدو « عسگرین » « همتین » قانی
« حسینیم » آغلاتدی آذربایجانی
وورانلار آل قانا بویانسین گه رک
***
بللی دیر کیمدیلر خالقی وورانلار
میللتین یولونا توزاق قورانلار
قارداشین بوینونا ایپی بورانلار
لئشی لئش اوستونه قالانسین گه رک
***
اویانین اویانین یاتمایین میللت
قارداش قارداشیندان هئی چکیر ذیللت
آد قویما آختارما بللی دیر عیللت
اویانیب بئل بئله دایانسین گه رک
***
سون سؤزوم سیزه دیر میللتیم جانیم
گله جک بیزیمدیر بئی لریم خانیم
یاشاسین سئومه لی آذربایجانیم
قالان یاتانلاردا اویانسین گه رک
No comments:
Post a Comment