گونئی آذربایجان میلی حرکیتی ایران آدلانان توپراقارین فیکری و اینسانی آچیلاریندان ان پتانسیل لی حرکتی دیر، هئچ بیر سیتماتیک گوجو سوره جی اولمادان صیرف وطن و میلتلرینه اولان سوروملولوغ حیسسندن، گئدن فعالیتلر بو سوزون ایثباتی دیر. آنجاق نه یازیق کی بو فعالیت لر برنامه سیزلیک سونوجوندا دواملی اولاراق کئتمه دن یاریدا قالیر. فعالیت لرده دوامسیزلیقلارین چوخلو سببلری ورادیر او جومله دن: ایچه ریده اویغولانان باسقی رئژیمی، مادی قایناقلارین اولماماسی و اینسجام سیز تصمیم سیتمینی دئمک اولار.
آمما یوخاری دا گتیردیگیمیز سورونلار بیر فعالین الی ایله یوخ بلکه زامانیندا گئنیش ایش بیرلیگی سونوجوندا چؤزومه اولاشاجاق . آنجاق ایندیکی دورومدا بیر سیرا سورونلار واردیر کی فعاللارین آپاردیغی ایشلرین اوصولو اساسیندا حرکت ائتمه مه سی، سوروملولوق حیسسینین ضعفی یادا همین فعاللار طرفیندن آچیقلانمایان سببلردن دوغولور. بو سورونلاری بیرنئچه سی:
سانالاشان حرکت:
سون ایللرده ایران دا یاشانان اولایلار سونجوندا گونئی آذربایجان اؤنه می آرتیر. گونئی آذربایجان میلی حرکتینین بیر یاندان بؤیوک اینسانی سرمایه یه صاحیب اولماسی و دیگر طرفدن گونئی آذربایجان توپلومونون اساس ایسته کلرینی یانسیتان تک ایجتیماعی و سیاسی جریان اولدوغوندان دولایی هم حاکمیتین و همده ایران مرکزیت چی مخالیفتینین دیقت مرکزینده یئر آلیر. آرتان اؤنم سایه سینده حاکمییت گون به گون باسقیسین فعاللارا چوخالداراق بو حرکتی ضعیفلندیرمه یه چالیشیر. بو باسقیلار سونوجوندا توپلوم ایچه ریسنده فعالیت ائتمک اورتامی آرادان گئدیب، بو سببدن فعالار تک چالیشما یئرین اینترنت اولاراق گؤرور و سانال دونیا یا دوغرو یؤنه لیر لر.
سانال فعالیت لر البته کی بوگونکو دونیانین گرکلریندن دیر، آما اونوتمایاق کی بو فعالیت لر او زامان ائتگیلی اولور کی توپلومو دا گئدن اولایلار و یارانان سورونلاری، اولدوغو کیمی یانسیتاراق اولایلارا ایضاح و سورونلارا چؤزوم اؤرتسین. آمما نه یازیق گؤرورک کی فعاللار سانال دونیایا دوغرو چکیلدیکجه توپلومدا گئدن دوغرولاری اونوتوب و اینترنتی فعالیتین یاراتدیغی راضیلیق حیسسیندن دولایی میلتیمیزین سورونولارینین یانیندان راحات جا و ایلگیله نمه دن گئچیرلر. بو مئسله او حالدا دوام ائدیر کی گونئی آذربایجاندا کیتله آراسیندا اینترنت یانلیز بیر ایلنجه یادا سیناق تاریخنین اؤیرنمک آراجیدیر. بو ادعا یا ایثبات گئچن ایکی ایلده اورمو گؤلو قوروما سینا اعتراض میتینگله رینده گؤردوک کی اعتراض گونون بیلدیری و رئکلامی یانلیز اینترنت-ده گئتدیگینه گؤره توپلوموموزون بؤیوک کسیمی او گونکو اعتراضی یغینجاغیندان خبری اولماییب و گؤزله نیلن سونوجلارین آزی الده ائدیلدی.
آنجاق بوتون گونئی آذربایجان فعاللاری گونئی آذربایجان آیدینلاری رتبه سین داشییرلار. بیز گئچمیشده آیدینلاریمیزین میلتدن اوزاقلاشما بدلین آغیر هزینه لر له اؤدییریک(آیدینانم دئیه کیتله دن اوزاق گزمک بیزه پان فارسیست آیدینلاردان قالما بیر گله نکدیر). یوخاریدا دئدیکلریمیز بو آنلامدا دئییل کی فعاللار بو آغیر باسقیلی گونلرده اؤزلرین آغیر هزینه له ره معروض قویسونلار. دئمک ایسته دیگیمیز بو کی گونئی آذربایجان میلی فعاللاری هر زامان توپلومون ایچینده اولوب و دوستلوق و یا هر سببدن یارانان قوروپلارین ایچینه داخیل اولوب همین قوروپلارین فیکری رهبری اولاراق اؤزلیکله گنجلری دوغرو یؤنه یؤنلدیرسینلر.
ساوادسیز فعاللار
تراختورون لیگ برتر گلدیگیندن بویانا گؤنئی آذربایجان میلی حرکتینده یئنی بیر دؤنمه باشلادی. تراختور فوتبال تاخیمینین اویونلاری گنج نسلین میلی دویغولارینی قارشیلایاجاق بیر اورتام حاضیرلادی. بو دوروم میلی حرکتی چوخلو اولوملو یؤندن ائتگیله ییر سه اولومسوز ائتگیلری ده واردیر. اولوملو یؤنلردن ان اؤنملی سی، تراختور واسیطه سی ایله گونئی آذربایجان مسئله سی توپلومدا اؤزلیکله گنج نسل آراسیندا گونده مده قالاماسی دیر.
آما ان قاباریق اولان اولومسوز یؤن گنج نسیلین مطالعه دن اوزاقلاشماسی دیر. تراختور تاخیمینین اویونلاریندا گنجلرین انرژی سی بوشالیر و بو واسیطه ایله بوینونالارینا دوشن گؤروی یئرینه گتیردیکلرین دوشونوب اوردان چیخدیقدان سونرا باشقا فعالیته گرک گؤرمه دن یاشاملارینا دوام ائدیرلر. اؤبیر یاندان سا تیراختور اویونلاریندا تمامأ احساسی اتمسفر حاکیم اولور، بئله کی اوردا اولان گنج گونئی آذربایجان مسئله سین علمی آچیدان باخمایی گرک گؤرمور. بو دورمو سایه سینده یئنی نسل مطالعه دن (بش سطردن چوخ اولان یازینی اوخومام دئین لر)اوزاق و تراختوردان باشقا هئچ گونده می تانیمیر.
اگر بو دوروم بئله داوام ائتسه اطمینان لا ذئمک اولار کی گونئی آذربایجان میلی حرکتی گؤزله نیلن سونوجلاری آلمادان گله جک ده میلتیمیزی داها چتین دوروملار ایله قارشی قارشی یا گتیرجک.
خاریجده یاشایان فعاللارین دورومو
ایران حاکیمیتی سو ایللرده خاریجی دؤولت لر طرفیندن آرتان فشار و ایچه ریده یارانان اولایلار سونوجو مخالیف جریانلارا آغیر باسقی اویغولاییرو گونئی آذربایجان میلی حرکتیده بو باسقیدان ان چوخ ائتگیله نن حرکتلردندیر. ایران دؤولتی طرفیندن آرتان باسقی گؤنئی آذربایجان میلی فعالارینی خاریجه کؤچمه سینه سبب اولوب . بو کؤچلر سایه سینده گونئی آذربایجان میلی حرکتی خاریجده چوغونلوغو آکادمیک تحصیل آلمیش شخصلر صاحیب اولور.
ماهیتلریندن آسیلی اولمایاراق باشقا حرکتلره باخدیغیمیزدا همین حرکتلرین جغرافیا اولاراق قاپسام آلانیندان اوزاق اولان شخصلرین او جغرافیادا گئدن اولایلاری رسانه لر یولو ایله دونیا یا یاماق و همین اولایلاری دونیا اینسان حاققلاری اؤرگوتلرینین گوندمینه داشییب و اولایلارین یاشادیغی جغرافییانی دؤنیا دؤولتلرینین دیقت مرکزینه چئورمک دیر.
آنجاق خاریجده یاشایان گونئی آذربایجان فعالارینین آپاردیغی ایشلر الرینده اولان ایمکانلارا باخدیغمیزدا چوخ آز گؤرونور. گونئی آذربایجان فعالاری چوخو باتی اؤلکه لرینده یاشاییر کی همین اؤلکه لرده دمکراتیک سیستمین حاکیم اودوغونا گؤره آپاریلان فعالیتن گونئیده اولدوغو کیمی چئشیدلی قیسیتلامالار ایله اؤزبه اؤز دئیل.
آما تأسوفلر اولسون گؤروروک خاریجده یاشایان فعاللارین بیر سیرا سی آپارماسی گرکن فعالیتدن اوزاقلاشاراق گونئی ده نه و نئجه ایش گؤرولمه سینه دایر تصمیملر توتورلار. خاریجده توتولان تصمیم نئچه ندنه گؤره هئچ زامان دوغرو سونوجلارا سبب اولماز: بیرینجی سی بیر چئوره نی ائتگی له ین تصمیم لری توتماغین شرطلریندن بیری او چئوره ده یاشاییب و یاخیندان سورونو آراشتیریب و دوغرو اویغولاما یولون تاپماقدیر، ایکینجی سی تصمیمی توتان فرد اویغولانان چئوره ده اولمادیغی زامان و همین تصمیمین یانیتلارین گؤرمه دیگینده گله جکده ده دوغرو چؤزم یوللاری اورتمه دن فیکرلرینین هاراسینین یانلیش یادا دوغورو اولدوغین اؤیرنمه یه ییب اؤزونه و چئوره سینه سورونلار یاراداجاق.
البته یو خاری دا دئدیکلریمیز بو آنلامدا دئییل کی خاریجده یاشایان فعاللار گؤنئی ده یاشاماییب لار. بو فعاللارین هامیسی گونئی آذربایجاندا بویا باشا چاتیبلار، آنجاق اینسانین پسکولوژی سی ایله علاقه لیدر کی چتینلیک له ره معروض قالدیغی بیر یئری ترک ائتدیگی زامان تئزلیکله اورانی اونوتماغا چالیشیب و همین چتینلیک لردن خوش خاطیره اولاراق یاد ائدرلر.
کانالیمیز
گوناذ تی وی گونئی آذربایجان مسئله سین یاینلانان تک کانال دیر. بو کانال یاینا باشلادیغی ایلک گونلرده چوخ ائتگیلی اولموشدور و حتی دئمک اولار کی بو کانال 85 اولایلارینین یارانماسیندا بویوک رول اوینادی. آنجاق ایلک یاینا باشلادیغی گونلر له توتوشدوردوغوموزدا توپلوم آراسیندا داها آز ایزله نیلیر و یارانان بوشلوغو تأسوفلر اولسون کی گون به گون چوخالان فارس کاناللاری دولدورور.
گونئی آذربایجان میلی حرکتیمنین تک کانالی عنوانینا صاحیب اولان گوناذ تی وی چئشیدلی و یارادیجیل پروقراملارین چوخ آز سویه ده اولماسی سونوجوندا گونئی آذربایجاندا گئنیش کیتله نین ماراغین قازانمادان یاینینا دوام ائدیر. حال بو کی تلوزیون ایندیکی زاماندا اینسانلارین باخیش آچیسین ائتگی له مه گوجونه صاحیب اولماسیندان دولایی چوخ اؤنملی دیر. گوناذ تی وی-ده گونئی آذربایجان مسئله سینین دوغرو آلقیلانما سیندا بؤیوک رولو واردیر کی کیفییتلی یایی آپاردیغییندا ایچه ریده فعاللارا و گله جه ییمیز اوچون چوخ فایدالی اولاجاق. البته اولا بیلسین کی بو کانالین داها کیفییتلی پروقراملار یاینلاماسیندا آچیقلانمایان انگللر واردیر، اومود ائدیریک بویازی همین انگللرین آچیقلانماسینا سبب اولا.
یوخاریدا سادیغیمیز سورونلار گونئی آذربایجان میلی حرکتینین ان اؤنده گئدین سورونلاری کیمی گؤرونور. بو سورونلارین چؤزومونون بیر بؤلومو فعاللارین الیده اولماسادا بؤیوک قیسمی فعاللرین شخصلری ایله ایلگیلیدیر. نئجه کی گؤروروک کی هر سیستم یادا دوزنلنمیش بیر ایجتماعی جریان یادا یاپینین بیرئی لری اؤزلرینی ایصلاح ائتدیگی زامان کلان سورونلادا چؤزومه دوغرو یؤنلیر. گونئی آذربایجان میلی فعاللاری مسئله یه، دوغرو باخدیقلاریندا و هاردا نئجه داورانمالارینی بیلدیکلری زامان گونئی آذربایجان میلی حرکتی سون درجه گوجلو یولونا دوام ائده جک.
خاطیرلادماق لازیمدیر کی بو یازی یانلیز بیر انتقادی یازیدیر و هئچ کیمسه نین و یا قورومون آپاردیغی فعالیتی کوچومسه مک قصدی یوخدور.
ائلچین
گونئی آذربایجان 90.5.19
No comments:
Post a Comment