آكپˊنين حاكيم اولدوغو توركييه‌نين يانليش اورتادوغو و ايران سيياسه‌تي
مئهران باهارلي
خبه‌رله‌رده اردوغانˊين ليبياˊيا باشاتيلماق ايسته‌نه‌ن ياپديريملارا (تحريمله‌ره) قارشي چيخديغي دئييليردي. بئله‌جه اردوغان، فارسلارين احمه‌دي نئژاد-خامنه ايˊسي و سودانˊدا سوي قيريم ياپان و اينسانليغا قارشي جينايه‌ت ايشله‌يه‌ن ال بشيرˊي ساووناندان سونرا، ايندي ده قذافي رئژيمينه ياپتيريملارا قارشي چيخاراق، اؤز خالقيني قيران قذافيˊني ساوونموش اولدو.
اردوغانˊين گرچه‌كده نه دئديييني و نه دئمه‌ك ايسته‌دييني آنلاماق اوچون، سطيرله‌رين آراسيني اوخومالي، اردوغان و باشقا دينچيله‌رين ديليني بيلمه‌ليسينيز. من بو خبه‌رده و اردوغانˊين سرگيله‌دييي توتومدا قذافي و اونون رئژيميني ساوونماقدان باشقا بير شئي گؤرموره‌م. اردوغان گئچميشده عئيني منطيق و ديلله سودانˊدا سوي قيريم ياپان ال بشيرˊي، سوريه ديكتاتورو بشار اسه‌دˊي و حماس ايله نصروللاهˊين حيزبوللاهˊيني ساوونموشدور. او عئيني منطيقله ايراندا دينچي فارس رئژيميني - ايستانبولدا بله‌دييه باشقاني اولدوغو ايلك گونده‌ن بري- ساووناگلميشدير. اردوغانˊين بو توتومو، بوتونويله ايراندا ياشايان خالقلارا قارشي دوشمانجا اولان بير توتومدور.
اردوغانˊين قذافي سئوگيسي
توركييه دينچيله‌ري آراسيندا قذافيˊيه هميشه سمپاتي وار اولموشدور. بو سمپاتي بوگون ده قذافي اؤز خالقيني قيليجدان گئچيرمه‌كده اولدوغو دؤنه‌مده داوام ائتمه‌كده‌دير. اردوغانˊين قذافيˊيه ارخا چيخماسينين باشليجا نده‌ني بودور.
بوگون قذافي اؤز خالقيني قيليجدان گئچيرير. اؤته ياندان اورتادوغو ايله قوزئي آفريقادا و حتتا بوتون ايسلام دونياسيندا اسه‌ن دئموكراسي يئلينين ائتگيسينده تاريخي بير فورصه‌ت يارانميشدير كي ليبيا خالقي، بو غددار، عقلي دنگه‌سي يئرينده اولمايان ياراتيقدان قورتولسون. آنجاق شو آندا سوي قيريما معروض قالان خالقا كؤمه‌ك يوللاري و يارديم اولاناقلاري قيسيتليدير. دوغرودان موداخيله ايسه ايمكانسيز كيميندير. دولاييسي ايله ياپيلاجاق تك شئي، اورادا موجاديله ائده‌ن خالقا وئريله‌ن معنه‌وي دسته‌ك، ديپلوماسي و ديپلوماتيك يوللاردير. به‌يه‌نسه‌ك ده، به‌يه‌نمه‌سه‌ك ده، ديپلوماتيك يؤنته‌مله‌رين باشيندا، ايران اؤرنه‌يينده اولدوغو كيمي، رئژيمي يؤنه‌ته‌نله‌ره و الي قانا بولاشانلارا ياپديريم (تحريم، سانكسييا) اويقولاماق گلير. دوغرودور، بو ياپديريملار خالقي دا سيخينتييا سوخابيله‌ر و آنجاق اوزون وعده‌ده ائتگي گؤسته‌ره‌بيله‌ر. بونا رغمه‌ن ياپيلاجاق باشقا آلتئرناتيو ده يوخدور. ايشته بورادا اردوغانˊين بو سانكسييالارا قارشي چيخماسي و بونلاري اؤن گؤره‌نله‌ري ايكي اوزلولوكله سوچلاماسي، تام بير ايكي اوزلولوك اؤرنه‌يي اولوپ قذافي رئژيمينه وئريله‌ن آچيق دسته‌كدير.
اردوغانˊين ياپديريملارا قارشي چيخماسي، بير سيرا شخصين سانديغينين ترسينه، ليبياˊدا چاليشان توركييه‌لي توركله‌ري قوروماقلا دا ايلگيلي دئييلدير. او گرچه‌كده‌ن بو ايشچيله‌ري قوروماق ايسته‌سه‌يدي، اونلارين گئري گتيريلمه ايشله‌مي ايله اوغراشيپ باشقالارينين چؤزوم آراييشينا انگه‌ل اولمامالييدي. آنجاق اردوغان آچيقجا دونيانين قذافي رئژيمينه قارشي ائيله‌مه گئچمه‌سيني سوچلايير. بو ايسه، ايچينده بولوندوغوموز كونژونكتورده قذافي رئژيمينه وئريله‌ن آچيق بير دسته‌ك، اونا يئنيده‌ن ليبيا خالقينا حاكيم اولابيلمه فورصه‌تي ياراتماقدير.
توركييه؛ فاشيست و ديكتا قذافي رئژيميني ساوونماق يئرينه، ليبيا خالقينا ياپيلان وحشيليكله‌ري قينامالي، ليبيا دئوله‌تينين خالقين تمه‌ل اؤزگورلوكله‌ري و اينسان حاقلارينا سايقيلي داورانماسيني ايسته‌مه‌لي و اوراداكي توركييه‌ليله‌ري تخلييه ائتديكده‌ن سونرا، مشروعييه‌تيني چوخدان ايتيرميش اولان قذافيˊنين ان قيسا سوره‌ده گؤره‌وده‌ن آيريلماسيني و بوتون سوچلولارين عداله‌ته تسليم ائديلمه‌سيني ايسته‌مه‌ليدير.
توركييهˊنين اينديكي اورتادوغو سيياسه‌تي تمه‌لده‌ن يانليشدير.
توركييهˊنين اينديكي اورتادوغو سيياسه‌تي تمه‌لده‌ن يانليشدير. چونكو ثابيتليك آدينا بؤلگه‌نين آنتي دئموكراتيك ايستاتوسونو، ديكتا رئژيمله‌ري و سؤمورگه‌نين سونوجو اولان سينيرلاريني قوروماني آماجلايير. يانليشدير چونكو تكجه ائكونوميك ايليشگي و چيخارلاري گؤزه‌تير و بيچيمله‌نمه‌سينده دئموكراسي، بؤلگه‌نين دئومكراتيكله‌شمه سي، خالقلارين اؤزگورلوكله‌ري و اينسان حاقلاري ان كيچيك بير رول اوينامير. يانليشدير چونكو ايدئولوژيك تمه‌ل.له‌ر و سيياسي ايسلاما گؤره بيچيمله‌نميشدير.
آكپˊنين اورتادوغو و قوزئي آفريقا سيياسه‌تينين ايكي تمه‌لي واردير: سيياسي ايسلام و ائكونوميك چيخارلار. بو ايكيسينين سونوجو مئوجود ايستاتوكونو قوروماق و كوزمئتيك بير سيرا اوزئيسه‌ل ده‌ييشيكليكله‌ري ساوونماقدير. آنجاق بؤلگه‌ده گرچه‌ك ده‌ييشيكله‌ري، بؤلگه‌ده‌كي ديكتا و دينچي دئوله‌تله‌رين دئموكراسي و لاييكلييي منيمسه‌مه‌سي، بورالاردا ياشايان خالقلارين اؤزگورلوكله‌ري و اينسان حاقلاريني ساوونماق، آكپˊنين سيياسه‌تله‌رينده يئري يوخدور. حتتا آكپ بؤلگه‌ده كي گرچه‌ك و راديكال ده‌ييشيكليكله‌ره و ان باشدا رئژيم ده‌ييشيكليكله‌رينه شيدده‌تله قارشيدير. بوندان دولايي دا آكپ توركييه‌سي بوگون بؤلگه‌ده كي ان فاشيست، ديكتا و دينچي رئژيمله‌رين موتته‌فيقي حالينا گلميشدير. ايسته‌ر خامنه اي و احمه دي نئژادˊين ايرانˊي اولسون، ايسته‌ر ليبياˊنين قذافيˊسي، سورييه‌نين اسه‌دˊي، سودانين ال بشيرˊي، حماس و يا لوبناˊنين حيزبوللاهˊي اولسون.
توركييهˊنين اينديكي اورتادوغو سيياسه‌تي آمئريكانين سويوق ساواش دؤنه‌مينده ايزله‌دييي و ايفلاس ائتدييي سيياسه‌تين عئينيسيدير. گونوموزده آمئريكا دا بونو آنلاميش كي بو اؤلكه‌نين چيخارلارينا اويقون اولان، ثابيتليك باهاناسي ايله ديكتا دينچي و فاسيد رئژيمله‌رله ايتتيفاق قورماق، اونلاري دسته‌كله‌مه‌ك دئييلدير. ترسينه آمئريكانين گرچه‌ك و اوزون وعده‌لي چيخارلاري و قاليجي ثابيتلييي يارادان، خالقلارين اؤزگورلوك و اينسان حاقلاريني، دئموكراسيني دسته‌كله‌مه‌كدير. آنجاق توركييه هله ده بو گرچه‌يي باشا دوشمه‌ييپ خالقلارين اؤزگورلوك و اينسان حاقلاريني دسته‌كله‌مه‌ك يئرينه و ثابيتلييي قوروماق آدينا خامنه اي، اسه‌د، ال بشير، قذافي، حماس و حيزبوللاهˊلا عئيني جرگه‌ده يئر آلير. بونونلا دا هم توركييه‌نين اوزون وعده‌لي چيخارلارينا ترس داورانير، هم ده بؤلگه‌نين دئموكراتيكله‌شمه‌سينه و قاليجي ثابيتلييه اولاشماسينا انگه‌ل اولور. ايريجا بؤلگه خالقلارينين سمپاتيسيني ده ياواش ياواش ايتيرير.
آكپˊنين ايكي اوزلو اورتادوغو سيياسه‌تي
اردوغان باشقالاريني ليبيا قونوسوندا ايكي اوزلو اولماق و پئترول سئوداسي ايله حره‌كه‌ت ائتمه‌كله سوچلايير. اويسا گرچه‌ك بودور كي اورتادوغو و قوزئي آفريقا قونوسوندا آكپ حؤكومه‌تينين اؤزو ايكي اوزلو بير سيياسه‌ت يئريدير. آكپ و اؤزه‌لليكله اردوغان-داووت اوغلو ايكيليسي اوچون، اورتادوغو و قوزئي آفريقادا دئموكراتيكله‌شمه، فاسيد، يوز و ديكتا رئژيمله‌رين اؤز خالقلارينا ياپديغي باسقيلار و سوي قيريملارا سون وئرمه، بورادا ياشايان اينسانلار و خالقلارين اؤزگورلوك موجاديله‌سينين ان كيچيك اؤنه‌مي يوخدور. اردوغان – داووت اوغلو اوچون اؤنه‌ملي اولان شئي، ايسلامي قارداشليق، اوجوز آنتي آمئريكان و آنتي ايسراييل شوعارلار و ان باشدا دا قيسا سوره‌لي ائكونوميك چيخارلار و موفت پئترول و گاز الده ائتمه‌كدير. بو ائكونوميك چيخارلار اوچوندور كي آكپ، ايراندا دينچي فاشيست عيرقچي فارس دئوله‌تينين موتته‌فيقي حالينا دؤنوشو وئرميشدير و ايراندا ياشايان خالقلاري و ان باشدا تورك خالقيني پئترول و گازا ساتميشدير.
بير سيرا شخصله‌ر توركييه‌نين اورتادوغو و قوزئي آفريقا و اؤزه‌لليكله ايراندا يئريتدييي سيياسه‌تي، بورالاردا خالقلار و اينسانلارين دئموكراتيك ايسته‌كله‌ري و اؤزگورلوكله‌ري ايله اينسان حاقلاريني ساوونماق يئرينه، ديكتا و دينچي رئژيمله‌ري ساوونماسيني، توركييه‌نين گوجسوز اولدوغونا باغلايير و توركييه‌نين گوجلو اولدوغوندا، بوتون توركولل.ه‌ري (توركيكله‌ري) دسته‌كله‌يه‌جه‌ييني سؤيله‌ييرله‌ر. منجه دوروم هئچ ده بئله دئييلدير. بوگون توركييه يئته‌رينجه گوجلودور. آنجاق ايران توركله‌رينه قارشي فارس دينچي عيرقچي ايران دئوله‌تيني دسته‌كله‌يير حتتا اونون موتته‌فيقي حالينا گلميشدير. عيراقدا توركمانلارين اؤز دئوله‌تله‌رينه قاووشمامالارينين باشليجا سوروملوسو، توركييه‌نين منيمسه‌دييي يانليش عيراق و كورد سيياسه‌تله‌ري اولموشدور. سوريه‌ده ياشايان تورك خالقي دا توركييه‌ده‌ن ان اوفاق بير دسته‌ك گؤرمه‌ميش كي هئچ، آكپˊنين اسه‌د رئژيمي ايله ايتتيفاقينا تانيق اولموشدور. باشقا بير دئييشله اولاي توركييه‌نين گوجله‌نمه‌سينده دئييلدير، بو گوجو هانسي آنلاييشين قوللاناجاغيدير.
ذاته‌ن توركييه‌نين بؤلگه و اؤزه‌لليكله تورك خالقيميزين ايران، عيراق و سورييه توركله‌ريني دسته‌كله‌مه‌سينه ائحتيياج دا يوخدور. يئته‌ر كي توركييه اوجوز پئترول و گاز و قيسا ائكونوميك چيخارلار اوچون بو اؤلكه‌له‌ر و رئژيمله‌رينين دئموكراتيكله‌شمه‌سينه و اؤزه‌لليكله ده فئدئراللاشماسينا قارشي چيخماسين و بورالارا حاكيم اولان فاشيست و ديكتا رئژيمله‌ره آچيق دسته‌ك وئرمه‌سين، يئته‌ر كي توركييه خالقلار و رئژيمله‌ري آراسيندا آپاريلان ساواشيمدا طره‌فسيز قالسين.
گونئي آزه‌ربايجاندا لاييك، مودئرن، اينسان حاقلاريني اؤنه‌مسه‌يه‌ن توركييه سئوگيسي
تبريزده گنجله‌رين توركييه جومهورباشخاني عبدوللاه گولˊه گؤسته‌ردييي سئوگي تپگيسي، توركييه‌يه يعني آتاتورك توركييه‌سينه، لاييك و مودئرن، آوروپانين بير پارچاسي اولان توركييه‌يه گؤسته‌ريله‌ن سئوگي ايدي. بونون آكپ حؤكومه‌تي و ياپديقلاري ايله ايلگيسي يوخدور. ذاته‌ن خالقيميز آكپˊنين گرچه‌ك دينچي و فارس موتته‌فيقي اولان ايچ اوزونو داها دا آنلايينجا، آكپˊيه اولومسوز تپگي وئرمه‌يه باشلاياجاقدير. دوغروسو دا بودور. لاييك و مودئرن توركييه دئوله‌تينه اولان سئوگي ايسه، داوام ائده‌جه‌كدير.
بيزيم ياراريميزا اولان، توركييه‌نين دوغرودان هر هانسي بير اؤلكه‌ده موداخيله‌سي دئييلدير. اورتادوغودا فاسيد، ديكتا و دينچي رئژيمله‌رين ييخيلماسيدير. توركييه‌نين بيزه و اؤزونه ياپابيله‌جه‌يي ان يارارلي خيدمه‌ت بو فاسيد، ديكتا و دينچي رئژيمله‌رله ايتتيفاق قورماق و اونلاري قولداماق و اونلارين چؤكمه‌سيني گئجيكديرمه‌ك يئرينه، بؤلگه‌ده اسه‌ن دئموكراسي يئلينين پيچيلتيسيني ائشيتمه‌ك و اينسان حاقلاري ايله خالقلارين اؤزگورلوكله‌ريني ساوونماقدير.
منجه بيز آرتيق گرچه‌كله‌ري اولدوغو كيمي گؤرمه‌ليييك، آكپˊنين اورتادوغو سيياسه‌تي سيياسي ايسلام و پارا قازانمانين گره‌ييدير. مودئرن چاغين آنلاييشي و اينسانجا، اؤزگورجه ياشاما دورتوسونون گره‌يي دئييلدير. توركييه ليبيا، ايران، سورييه، سوداندا مودئرن دئوله‌تله‌رين قورولماسينا دسته‌ك وئرمه‌لي و اينسان حاقلاري ايله خالقلارين اؤزگورلوكله رينين تاپدالانماسينا قارشي چيخماليدير. آنجاق شو آندا توركييه بو ياپماسي گره‌كه‌نله‌ري، سيياسال ايسلام و ائكونوميك چيخارلاردان دولايي ياپمايير. اردوغان سوي قيريم ياپان ال بشيرˊي دسته‌كله‌يير، اؤز خالقيني يوخ ائده‌ن قذافيˊيه ياپديريم ياپيلماسينا قارشي چيخير. سئچيمله‌رده حيله ايله ايش باشينا گله‌ن احمه‌دي نئژادˊي ايلك قوتلايان اولور، تئرور اسديره‌ن حماسˊي ساوونور، داووت اوغلو ايراندا دئموكراسي واردير دئيير، داش قالاغين ايرانˊين ايچ سورونو اولدوغونو ايدديعا ائدير، ....
توركييه بونو آنلاماليدير: توركييه خالقي نه قده‌ر دئموكراسيني حاق ائديرله‌رسه، اوتادوغو و قوزئي آفريقا خالقلاري دا او قده‌ر دئموكراسيني حاقق ائدير. قيبريسين قوزئيينده ياشان تورك توپلومو نه قده‌ر باغيمسيز اولما و اؤزونو يؤنه‌تمه‌ني حاق ائديرسه، گونئي آزه‌ربايجاندا ياشايان تورك خالقي دا او قده‌ر باغيمسيزليق و اؤزونو يؤنه‌تمه‌ني حاق ائدير. توركييه بونو دا ايييجه قاوراماليدير: آرتيق قوشا اؤلچون (استاندارد مضاعف) دؤنه‌مي بيتميشدير.
AKPnin hakim olduğu Türkiyənin yanlış Ortadoğu və İran siyasəti
Mehran Baharlı
Xəbərlərdə Ərdoğanın Libyaya başlatılmaq istənən yapdırımlara (təhrimlərə) qarşı çıxdığı deyilirdi. Beləcə Ərdoğan, Farsların Əhmədinejad Xamneyisi və Sudanda soyqırım yapan və insanlığa qarşı cinayət işləyən Əl Bəşiri savunandan sonra, indi də Qaddafi rjiminə yaptırımlara (Sanksiyalara) qarşı çıxaraq öz xalqını qıran Qaddafini savunmuş oldu.
Ərdoğanın gərçəkdə nə dediyi ni və nə demək istədiyini anlamaq üçün, sətirlərin arasını oxumalı, Ərdoğan və başqa dinçilərin dilini bilməlisiniz. Mən bu xəbərdə və Ərdoğanın sərgilədiyi tutumda Qaddafi və onun rejimini savunmaqdan başqa bir şey görmürəm. Ərdoğan geçmişdə eyni məntiq və dillə Sudanda soyqırım yapan Əl Bəşiri, Suriyə diktatoru Bəşar Əsədi və Həmas ilə Nəsrullahın Hizbullahını savunmuşdur. O eyni məntiqlə İranda dinçi Fars rejimini, İstanbul bələdiyəsi başqanı olduğu ilk gündən bəri , savunagəlmişdir. Ərdoğanın bu tutumu, bütünüylə İranda yaşayan xalqlara qarşı olan, düşmanca bir tutumdur.
Ərdoğanın Qaddafi sevgisi
Türkiyə dinçiləri arasında Qaddafiyə həmişə səmpati var olmuşdur. Bu səmpati bugün də, Qaddafi öz xalqını qılıcdan geçirməkdə olduğu dönəmdə davam etməkdədir. Ərdoğanın Qaddafiyə arxa çıxmasının başlıca nədəni budur.
Bugün Qaddafi öz xalqını qılıcdan geçirir. Ötə yandan Ortadoğu ilə Quzey Afriqada və hətta bütün İslam dünyasında əsən demokrasi yelinin etgisində tarixi bir fürsət yaranmışdır ki Libya xalqı bu qəddar, əqli dəngəsi yerində olmayan yaratıqdan qurtulsun. Ancaq şu anda soyqırıma məruz qalan xalqa kömək yolları və yardım olanaqları qısıtlıdır, doğrudan mudaxilə isə indilik imkansız kimidir. Dolayısı ilə yapılacaq tək şey orada mücadilə edən xalqa verilən mənəvi dəstək, diploması və diplomatik yöntəmlərdir. Bəyənsək də bəyənməsək də diplomatik yöntəmlərin başında, İran örnəyində olduğu kimi rejimi yönətənlərə və əli qana bulaşanlara yaptırım (Təhrim, Sanction) uyqulamaq gəlir. Doğrudur, bu yaptırımlar xalqı da sıxıntıya soxabilir və ancaq uzun vədədə etgi göstərəbilər. Buna rəğmən yapılacaq başqa alternativ də yoxdur. İştə burada Ərdoğanın bu sanksiyalara qarşı çıxması və bunları öngörənləri iki üzlülüklə suçlamsı tam bir iki üzlülük örnəyi olup Qaddafi və rejiminə verilən açıq dəstəkdir.
Ərdoğanın yaptırımlara qarşı çıxması bir sıra şəxsin sandığının tərsinə Libyada çalışan Türkiyəli Türkləri qorumaqla ilgili deyildir. O gərçəkdən bu işçiləri qorumaq istəseydi, onların geri gətirilmə işləmi ilə uğraşıp başqalarının çözüm arayışına da əngəl olmamalıydı. Ancaq Ərdoğan açıqca dünyanın Qaddafi rejiminə qarşı eyləmə geçməsini suçlayır. Bu isə, içində olduğumuz konjunkturdə Qaddafi rejiminə verilən açıq bir dəstək, ona yenidən Libya xalqına hakim olabilməsinə fürsət yaratmaqdır.
Tükiyə, faşist və dikta Qaddafi rejimini savunmaq yerinə, Libya xalqına yapılan vahşilikləri qınamalı, Libya devlətinin xalqın təməl özgürlükləri və haqlarına sayqılı davranmasını istəməli və oradadakı Türkiyəliləri təxliyə etdikdən sonra məşruiyətini çoxdan itirmiş olan Qaddafinin ən qısa sürədə görəvdən ayrılmasını və bütün suçluların ədalətə təsmil edilməsini istəməlidir.
Türkiyənin indiki Ortadoğu siyasəti təməldən yanlışdır
Türkiyənin indiki ortadoğu siyasəti təməldən yanlışdır. Çünkü sabitlik adına, bölgənin anti demokratik statusunu, dikta rejimləri və sömürgənin sonucu olan sınırlarını qorumanı amaclayır. Yanlışdır çünkü təkcə ekonomik ilişki və çıxarları gözətir və biçimlənməsində demokrasi, bölgənin demokratikləşməsi, xalqların özgürlükləri və insan haqları ən kiçik bir rol oynamır. Yanlışdır çünkü ideoloik təməllər və siyasi islama görə biçimlənmişdir.
AKPnin Ortadoğu və Quzey Afriqa siyasətinin iki təməli vardır: Siyasi islam və ekonomik çıxarlar. Bu ikisinin sonucu mevcut statukoyu qorumaq və kozmetik bir sıra üzeysəl dəyişiklikləri savunmaqdır. Ancaq bölgədə gərçək dəyişiklikləri, bölgədəki dikta və dinçi devlətlərinin demokrasi və laikliyi mənimsəməsi, burada yaşayan xalqların özgürlükləri və insan haqlarını savunmaq AKPnin siyasətlərində yeri yoxdur, hətta AKP bölgədəki gərçək və radikal dəyişikliklərə ən başda rejim dəyişikliklərinə şiddətlə qarşıdır. Bundan dolayı da AKP Türkiyəsi bugün bölgədəki ən faşist, dikta və dinçi rejimlərin müttəfiqi halına gəlmişdir, istər Xamneyi və Əhmədinejadın İranı olsun, istər Libyanın Qaddafisi, Suriyənin Əsədi, Sudanın Əlbəşiri, ,Hamas vəya Lübnaın Hizbullahı olsun.
Türkiyənin indiki ortadoğu siyasəti Amerikanın soyuq savaş dönəmində izlədiyi və iflas etdiyi siyasətin eynisidir. Günümüzdə Amerika da bunu anlamış ki bu ölkənin çıxarlarına uyqun olan sabitlik bahanası ilə dikta, dinçi və fasid rejimlərlə ittifaq qurmaq, onları dəstəkləmək deyildir. Tərsinə Amerikanın gərçək və uzun vədəli çıxarları və qalıcı sabitliyi yaradan, xalqların özgürlük və insan haqlarını, demokrasini dəstəkləməkdədir. Ancaq Türkiyə hələ də gərçəyi başa düşməyip xalqların özgürlük və insan haqlarını dəstəkləmək yerinə və sabitliyi qorumaq adına Xamneyi, Əsəd, Əlbəşir, Qaddafi, Hamas və Hizbullahla eyni cərgədə yer alır. Bununla da həm Türkiyənin uzun vədəli çıxarlarına tərs davranır, həm də bölgənin demokratikləşməsinə əngəl olur. Ayrıca bölgə xalqaların səmpatisini də yavaş yavaş itirir.
AKPin ikiüzlü Ortadoğu siyasəti
Ərdoğan başqalarını Libya qonusunda ikiüzlü olmaqla və petrol sevdası ilə hərəkət etməklə suçlayır. Oysa gərçək budur ki Ortadoğu və Quzey Afriqa qonusunda AKP höküməti nin özü ikiüzlü bir siyasət yeridir. AKP və özəlliklə Ərdoğan Davutoğlu ikilisi üçün, Ortadoğu və Quzey Afriqada demokratikləşmə, fasid, yoz və dikta rejimlərin öz xalqlarına yapdığı basqılar və soyqırımlara son vermə, burada yaşayan insanlar və xalqların özgürlük mucadiləsinin ən kiçik önəmi yoxdur. Ərdoğan Davutoğlu üçün önəmli olan şey, İslami qardaşlıq, ucuz anti Amerikan və anti İsrayil şuarlar və ən başda da qısa sürəli ekonomik çıxarlar və müft petrol və qaz əldə etməkdir. Bu ekonomik çıxarlar üçündür ki AKP, İranda dinçi ırqçı faşist Fars devlətinin müttəfiqi halına dönüşüvermişdir və İranda yaşayan xalqları və ən başda Türk xalqını petrol və qaza satmışdır.
Bir sıra şəxslər Türkiyənin Ortadoğu Quzey Afriqa və özəlliklə İranda yeritdiyi siyasətin, buralarda xalqlar və insanların demokratik istəkləri və özgürlükləri ilə insan haqlarını savunmaq yerinə, dikta və dinçi rejimlərini savunmasını, Türkiyənin gücsüz olduğuna bağlayır və Türkiyənin güclü olduğunda bütün Türkülləri (Turkicləri) dəstəkliyəcəyini söyləyirlər. Məncə heç də belə deyildir. Bugün Türkiyə yetərincə güclüdür, ancaq İran Türklərinə qarşı Fars dinçi ırqçı İran devlətini dəstəkləyir, hətta onun müttəfiqi halına gəlmişdir. Iraqda da Türkmanların öz devlətlərinə qavuşamamalarının başlıca sorumlusu Türkiyənin mənimsədiyi yanlış Iraq və Kürd siyasətləri olmuşdur. Suriyədə yaşayan Türk xalqı da Türkiyədən ən ufaq bir dəstək görməmiş ki heç, AKPnın Əsəd rejimi ilə ittifaqına tanıq olmuşdur. Başqa bir deyişlə olay Türkiyənin güclənməsində deyildir, bu gücü hansı anlayışın qullanacağıdır.
Zatən Türkiyənin bölgə və özəlliklə İran, Iraq və Suriyə Türklərini dəstəkləməsinə ehtiyac da yoxdur. Yetər ki Türkiyə ucuz petrol və qaz və qısa ekonomik çıxarlar üçün bu ölkələr və rejimlərinin demokratikləşməsinə və özəlliklə federallaşmasına qarşı çıxmasın və buralara hakim olan faşist və dikta rejimlərə açıq dəstək verməsin, yetər ki Türkiyə xalqlar və rejimləri arasında aparılan savaşımda tərəfsiz qalsın.
Güney Azərbaycanda laik, modern və insan haqlarını önəmsəyən Türkiyə sevgisi
Təbrizdə gənclərin Türkiyə cumhurbaşxanı Abdullah Gülə göstərdiyi sevgi təpgisi, Türkiyəyə yanı Atatürk Türkiyəsinə, laik və modern, Avupanın bir parçası olan Türkiyəyə göstərilən sevgi idi. Bunun AKP höküməti və yapdıqları ilə ilgisi yoxdur. Zatən xalqımız AKPnin gərçək dinçi və Fars müttəfiqi olan içüzünü daha da anlayınca AKPyə olumsuz təpgi verməyə başlayacaqdır. Doğrusu da budur. Laik və modern Türkiyə devlətinə olan sevgi isəö davam edəcəkdir.
Bizim yararımıza olan, Türkiyənin doğrudan hər hansı bir ölkədə mudaxiləsi deyildir, Ortadoğuda fasit, dikta və dinçi rejimlərin yıxılmasıdır. Türkiyənin bizə və özünə yapabiləcəyi ən yararlı xidmət bu fasit, dikta və dinçi rejimlərlə ittifaq qurmaq və onları qoldamaq, onların çökməsini gecikdirmək yerinə bölgədə əsən demokrasi yelinin pıçıltısını eşitmək və insan haqları ilə xalqların özgürlüyünü savunmqadır.
Məncə biz gərçəkləri artıq olduğu kimi görməliyik, AKPnin Ortadoğu siyasəti siyasal islam və para qazanmanın gərəyidir, modern çağın anlayışı və insanca, özgürcə yaşama dürtüsünün gərəyi deyildir. Türkiyə Libya, İran, Suriyə, Sudanda modern devlətlərin qurulmasına dəstək verməli və insan haqları ilə xalqların özgürlüklərinin tapdalanmasına qarşı çıxmalıdır. Ancaq şu anda Türkiyə, bu yapması gərəkənləri siyasal islam və ekonomik çıxarlardan dolayı yapmayır. Ərdoğan soyqırım yapan Əlbəşiri dəstəkləyir, öz xalqını yox edən Qaddafiyə yaptırım yapmaya qarşı çıxır, seçimlərdə hilə ilə iş başına gələn Əhmədinejadı ilk qutlayan olur, teror əsdirən haması savunur, Davutoğlu İranda demokrasi var deyir, daşqalağın İranın iç sorunu olduğunu iddia edir.....
Türkiyə bunu anlamalıdır: Türkiyə xalqı nə qədər demokrasini haq edirlərsə, Ortadoğu və Quzey Afriqa xalqları da o qədər demokrasini haq edir. Qibrisin quzeyində yaşayan Türk toplumu nə qədər bağımsızlıq və özünü yönətməni haq edirsə, Güney Azərbaycanda yaşayan Türk xalqı da o qədər bağımsızlıq və özünü yönətməni haq edir. Türkiyə bunu da iyicə qavramalıdır: Artıq qoşa ölçün (double standard) dönəmi bitmişdir.
Sozumuz, a window opening to the life/culture of the turkish nation of iran/south azerbaijan: http://sozumuz.blogspot.com/
http://sozumuz-turk-dovletler.blogspot.com/
http://sozumuz-turk-dovletler.blogspot.com/
No comments:
Post a Comment