ديل ياراسي: بلي، آري، ائوئت، هه، هن، هه‌يه، هه‌يا، هي، ايله‌ل

 مئهران باهارلي

 بلي: آزه‌ربايجان بودونجونون (جومهورييه‌تينين) توغرالي (رسمي) ديلي و يا آزره‌بايجانجادا دوغرولاما و اونايلاما، گرچه‌كله‌مه دوروملاريندا (هن، ياخشي، اولدو، ائله‌دير، تامام، پئك اييي، اولور، اولدو، دوغرو، كسين، قوشقوسوز، .... آنلاملاريندا) ايشله‌ديله‌ن "بلي" دييه بير كلمه واردير. بو كلمه فارسجا اولوپ توركجه "ائوئت" كلمه‌سينين قارشيليغيدير. "بلي" كلمه‌سينين "ائوئت"ده ن باشقا ديليميزده بير نئچه باشقا قارشيليغي دا واردير. او جومله‌ده‌ن "هن"، "هه"، "هه‌يه"، ...

 بلي كلمه‌سينين، فارسجادا "بله"، "بعله"؛ كوردجه‌ده "بلئ" (Belê)؛ تاجيكجه‌ده "بالئخ" (Балеҳ) بيچيمله‌ري واردير. آزه‌ربايجان توركجه‌سينده ايشله‌ديله‌ن "بهBə " اداتي دا، فارسجا بليˊنين ده‌ييشگه‌سيدير. بيزجه توركجه‌ده، نه يازيلي ديلده و نه دانيشيق ديلينده، فارسجا "بلي" كلمه سي و ده‌ييشگه‌له‌ري ("به") قوللانيلماماليدير.

 هريHəri : آزه‌ربايجاندا بير سيرا تورك لهجه‌له‌رينده ايشله‌ديله‌ن "هري" كلمه‌سي، فارسجا "آري" كلمه‌سينده‌ن كؤكه‌ن آلميشدير. بو كلمه‌نين فارسجادا "آره"، كوردجه‌ده "ارئ" (Erê)، و تاجيكجه‌ده "اورئخ" (Oреҳ) بيچيمله‌ري ده واردير. بيزجه توركجه‌ده، نه يازيلي ديل و نه دانيشيق ديلينده، فارسجا "آري" كلمه‌سي و ده‌ييشگه‌له‌ري ("هري") قوللانيلماماليدير.

 ائوئتEvet : فارسجا بلي و آري آنلاملاريندا ايشله‌ديله‌ن توركجه بير كلمه‌دير. گونوموزده "ائوئت" كلمه‌سي يالنيز توركييه و آزه‌ربايجان توركجه‌له‌رينده قوللانيلير. آزه‌ربايجان توركجه‌سينين بيرسيرا لهجه‌سينده "ائوئت" كلمه‌سي، "اه‌وه‌ت" (Əvət) اولاراق سؤيله‌نير.  ائوئت كلمه‌سي اسكي ياغما، توخسي، قيپچاق توركولل.ه‌رينده "ائووئت" (Ewet)، اوغوزلاردا "ائمئت" (Emet, Evet) و اؤته‌كي توركولل.ه‌رده يئمئت (Yemet) اولاراق سؤيله‌نيردي. چاغاتايجادا عئيني آنلاملاردا "اووات" (Uvat)، "اووات" (Ovat) و قاراخانليجادا "اووا" (Uva) كلمه‌له‌ري وار اولموشدور. چاغداش توركمه‌نجه‌ده "هاوا" (Hawa) و "خاوا" ايله بير سيرا توركول ديلله‌رينده ايشله‌ديله‌ن "اوباOba " كلمه‌له‌ري ده "ائوئت"ده‌ن پوزمادير.

 ائوئت كلمه‌سينين كؤكه‌ني حاققيندا ده‌ييشيك گؤروشله‌ر اورتايا آتيلميشدير. بير گؤروشه گؤره يانيتلاما اوچون قوللانيلان ياه (Yah) اونله‌مي و "مات" (Mat) بركيشديريجينين بيرله‌شمه‌سينده‌ن يانيتلاما اونله‌م (ندا) و ايلگه‌چي (اداتي) اولان ائوئت و يان بيچيمله‌ري اولوشموشدور: ياه+مات = يامات = يئمئت = يئمئت = ائمئت = ائبئت = ائوئت. (ذكي اه‌يوب اوغلو توركجه ائوئت كلمه‌سينين اسكي ايراني پهله‌وي ديلينده‌كي آواثا (Avatha, Avad)دان آلينديغيني ساولاميشدير. آنجاق بو گؤروش هئچ بير كؤكه‌ن بيليمچي ساريسيندان قبول ائديلمه‌ميشدير).

 ههHə : ائوئت (فارسجادا بلي، آري، دهه، ياللاه، زود باش) آنلاميندا ايشله‌ديله‌ن تمه‌ل اونله‌م-ايلگه‌چدير. آزه‌ربايجان و توركييه توركجه‌له‌رينده ههˊنين چئشيتلي ده‌ييشگه‌له‌ري واردير: "ههHə -هئHe " (اورفا، اوردو، آدانا، آفيون، ايسپارتا، بوردور، مانيسا، باليكئسير، كوتاهيا، اسكي شئهير، ساقاريا، قوجا ائلي، بولو، قاستامونو، چانقيري، توقات، اوردو، گيره‌سون، تيرابزون، گوموشخانا، ريزه، آرتوين، قارس، ارزينجان، وان، بيتليس، آلازيغ، مالاتيا، خاتاي، سيواس، قايسئري، نئوشهير، قونيا، نييده، ايچ ائل، موغلا، قيرخلار ائلي، كركوك، قيبريس)؛ "هئئHee " (دنيزلي، مانيسا، چاناق قالا، بيله‌جيك، اسكي شهير، قوجاائلي، آماسيا، توقات، اوردو، گيره‌سون، تيرابزون، ريزه، آرتوين، ارزينجان، قازييانتئپ، سيواس، قايسئري، نيييده، آنكارا، ايچ ائل، موغلا، ارزروم)؛ "هئهHeh "  (دنيزلي)؛ هه هه Hehe (كوتاهيا، ريزه، آرتوين، قاستامونو)؛ هي (Hı)؛ هاHa ؛

 اويقورجادا (H̡ə) اولاراق قوللانيلير. آزه‌ربايجان توركجه‌سينين قازاق لهجه‌سينده "هه كيHə ki " بيله‌شگه‌سي آخير كي، نهايه‌ت، سونوندا آنلاميندادير.

 هنHən : هه ايلگه‌جينه تاكيد سون اكي اولان –نˊنين آرتيريلماسي ايله اولوشموشدور. هن؛ هه كلمه‌سينده‌ن داها كيبار و اينجه اولاراق قبول ائديلير. بو كلمه گونئي آزه‌ربايجان و توركييه آزه‌ربايجانيندا ايشله‌كدير (ارزرومدا Hien)

هه‌يه Hәyә: ائوئت آنلاميندا اولان ايكينجي تمه‌ل كلمه‌دير. هه‌يه، گونئي آزه‌ربايجانˊين بير چوخ بؤلگه‌سينده (باتي آزه‌ربايجان اوستاني)، ايرانˊين گونئيينده (قاشقاي ائلي آراسيندا) و توركييه آزه‌ربايجانيندا (قارس، ارزروم، ...) يايقيندير. هه‌يهˊنين ده چئشيتلي لهجه‌له‌ريميزده چوخ ساييدا ده‌ييشگه‌سي واردير: هه‌يه Heğe Heye, (آنكارا، آفيون، ايسپارتا، دنيزلي، آيدين، باليكئسير، توقات، گوموشخانا، قارس، قازييانتئپ، ماراش، خاتاي، سيواس، يوزقات، قايسئري، نييده، قونيا، آدانا، ايچ ائل)؛ هه آ Hea (ارزروم)؛ هگه Hege (گوموشخانا)؛ هه‌يه‌ك Heyek (زونقولداق)؛ هك Hek (زونقولداق)؛ هكي Heki (گوموشخانا)؛ هنگيه Heñye (يوزقات)؛ هيييا Hıyya (دنيزلي)؛ ...

 تاتارجادا (Äye) اولاراق سؤيله‌نير. آزه‌ربايجان توركجه‌سي لهجه‌له‌رينده هه‌يه بلي (Hәyә bәli)  (بلي، آري) و آدانا لهجه‌سينده "هه‌ياHəya " تركيبله‌ري واردير. ناخجيواندا ايشله‌ديله‌ن هه‌يه (اه‌يه) تركيبي ايسه، ائوئت آنلامينداكي هه‌يه ايله ايلگيسيز اولوب، فارسجا "اگر" كلمه‌سينده‌ن پوزمادير.

 هويHoy : بو كلمه بيرينه خطاب ائده‌ركه‌ن، بيريني جارلاركه‌ن، و يا بيرينين خطابي و جاريني يانيتلاركه‌ن ايشله‌ديلير (جواب هاي، بلي، از علائم خطاب، اي، آهاي). قاراچاي بالكارجادا "هوو"، "هاو"، هو"، "هووا" بيچيمله‌ري واردير (hav, ho, hovva, hov). توركجه ميزده "هوي وئرمه‌كHoy vermək " بيرينين جارينا يانيت وئرمه‌ك آنلاميندادير.

 يا، ياه، يئه(Ya, Yah, Yeh) : اسكي توركجه‌ده ائوئت آنلاميندا ايشله‌ديلميشديرله‌ر.

 ايله‌لİləl : اسكي توركله‌ر آراسيندا، به‌يله‌ره و خانلارا يانيت وئريله‌ركه‌ن ائوئت يئرينه سؤيله‌نيردي.

 اييي، اييا، ائيي(İyi, İya, Eyi) : چئشيتلي توركول ديلله‌رده ائوئت آنلاميندا قوللانيليرلار.  

 سونوج: يوخاريدا آنلاتيلانلارا داياناراق بيزجه گونئي آزه‌ربايجان و ايراندا تورك خالقينين گؤركول (اده‌بي) و دانيشيق ديلله‌رينده فارسجا بلي و آري كلمه‌له‌ري و اونلارين ده‌ييشگه‌له‌ريني (بعلي، بله، آره، هري، به، ...) كسينليكله قوللانماماسي، و بونلارين يئرينه توركجه "ائوئتEvet "، "هنHən "، "هه‌يهHəyə " و "ههHə " اونله‌م-ايلگه‌چله‌ريني ايشله‌تمه‌سي اويقوندور.

Sozumuz, a window opening to the life/culture of the turkish nation of iran/south azerbaijan: http://sozumuz.blogspot.com/
http://sozumuz-turk-dovletler.blogspot.com/

http://elobaoymaqlarimiz.blogspot.com/

http://demoqrafi.blogspot.com/
http://tomarlar.blogspot.com/

http://xatun.blogspot.com/