دیرچه لمیش وارلیق

اینسان دیری دیر تا چالیشا دورمویا بیر آن دالغا دایانار کن داهی دالغا اولا بیلمز «آلپار سولدوزلو»   دیرچه لمیش وارلیق به نقل از نشریه ی نوید آذربایجان دوقتور پرویز محمدی –  سولدوز   اینسانین اینامی اوره کده قایناییرسا، دوشونجه سی دیلده باش وئریر و گئتدیکجه دوشونجه سی و آنلاییشی دیل واسیطه سی ایله گوجله نیر . دیل دوشونجه نی گوجله ندیرمه یه واسیطه و آراج اولسادا ، اؤزو هدف و آماج دیر . بللی دیر دیلی گوجله ندیرمه یه و قوروماغا بیر یولو اونو گئنیشلی شکیلده یایماقدیر . هر خالقین تاریخی ،کولتورو ، ادبیاتی ، شعری ، فولکولورو و … دیلینه باغلی دیر و بونلاری قورویان ، ساخلایان و گوجله ندیرن دیل دیر .وارلیق قورویانلار ، کولتور وورغونلاری ، دیل عاشیقلری ، توپراق سئونلر ، اوره کلرینده اومود بئجه رنلر، یول بیرلیک له ، باغیمسیز بیر قزئت و درگی ساحه سینده چالیشماغی ان بؤیوک شرف و اوستون گؤره و سانیرلار . آغیر یوک چیگینلرینده دوغودان باتی یا یوخ ، باتی دان دوغویا ، ایشیق داشی ییرلار . ” نوید آذربایجان ” عنوان ایله تانینان ، زنگین بیر درگی ده چالیشان لار ، کولتور سئون خالقیمیزین دالغالی کؤنوللرینده یاشاماغا و آیدین لیق بسله ین اوره کلرده قوناق اولماغا گووه نیرلر . هر ایلگی بیر تئل ایله باغلانسا دا او تئلی ساخلاماق و ایپکدن توخونموش و اوزولمه ین ایلگی یه چئویرمک  گره کدیر .” نوید آذربایجان ” و خالق آراسیندا یارانان ایلگی ان اسکی ، داواملی و اوزولمه ین بیر ایلگی دیر.  ” نوید آذربایجان ” ایللر بویو یاییلیب ، کؤنوللرده چیچک له نیب گول آچیب و قالارغی سئوگی کیمی اوره کلرده یئر تاپیب . ایندی بوگون نئچه ایلدن سونرا یاییلماغا باشلاییر، بللی دیر تانری نین عنایتی ایله ، اوسانماز چالیشانلاری نین همتی ایله و خالقیمیزین یول بیرلیغی ایله اود یوردونون عطیرلی گوللری تکین چیچکله نیب ، گول آچاجاق ، گؤزللیک لری گؤزه چکیب و اومود یاراداجاق . اینجه سئوینج لری قارینج – قارینج اؤلکه میزده یاشادیب و اؤز صلابتی ایله” یاشایاجاق” . چونکی : ” یارادیب یاشادان ابدی یاشایاجاق ” .آیدین لیق سئون قلم ، گئجه نین توکه نمه سین ، قارانلیق باغریندان سحرین دوغولماسین ” نوید ” وئریر .ایشیق یایان قلم ، اؤلکه نین قوراقین یئر اوزوندن اوزوب گؤیون یئددینجی قاتیندا قورور و ایشیق سئونلری گؤزل آ یلا ، پارلاق اولدوزلارلا ، گولر گونله و آیدین اولکه لرله  قونشو ائیله ییر .دوزگون قلمین هارایینا و باغیرتی سینا شیمشک لر شاخیب و قاراقاباق بولودلار پارچالانیر .صلابتلی قلم قابارلی اللرله شرفه اویغون اولان ایستک لری بولودلارین تارلاسیندا اکیب و دالغالی گؤزلرینین جوشغون پینار ایله سوواریر و داملا – داملا گؤز یاشی ایله پاسلاندیریلمیش گوزگولردن قات – قات پاسلاری سیلیر و قیوریلیب – آچیلان کؤنول یارالارینا ملحم اولور . دوغو دا دوغولان گون کیمی هر گون مین لر قوجاق گونش داشی ییر و ایشیق سئون اینسانلارا ، گونش گؤزله ین گؤزلره ، آیدین لیق بکلین کؤنول لره اومود وئریر .کسگین قلم قیشین قارانلیق دوستاقیندا ایتگین یازی آراییر ، خزان وورموش خیال لاری شاختا دونداران رویا لاری ، پوزقون اومودلاری سولغون دیلک لری و دونداریلمیش دویغولاری چیچک لندیریر و وارلیق دنیزینده اوزوب ، دالغالارلا دالغالانیب ، کئچمیشین دیرلی اینجی لرین اوزه چیخاردیر و خالقلارین وارلیغین و شرفین قورویور و بونا گؤره :تانری قرآن دا قلمه آند ایچیب یازقی سینی هر نه دن اوستون بیلیب سوسمایان قلم ، خالقی سسله ییر ، چاغیریر و اوجا سسله باغیریر :اویانماق ، آیینماق گرکدیر گره ک درین بیر باخیش لا دونیایا باخین آچیلیب ، جالانیب گئچمیش یولوندا وارلیغین بوقچاسی آیدین گؤرونور بوغولموش دویغولار پوزقون آرزیلار تاپدالانمیش ایستک لر سولغون دیلک لر توپراغین اوستونه داغیلیب بوتون تاریخ تارلاسیندا دیرچه لن ” وارلیق”گؤزله ییر چالیشاق گول آچسین بوگون کؤنول سیغناقیندا توپراق باغریندا سارسیلماز و اوسانماز قلمین بیر دیله گی وار مین بیر جانی ، هر جانیندا مین بیر آماجی و او ده یرلی “‌دیلک ” یاشادماق دیر اود یوردونو قارینج – قارینج کؤنول لرده و قوروماقدیر قاباریق وارلیغینی ، اولای لار اوزرینده . بئله بیر قلم قارانلیقدان کؤچوب ، ایشیق لیغا چاتماغی گرچک لرین آغیر یوکون داشاییب ، حقیقت یولونا ایز سالماغی اؤزل گؤره و بیلیب و گؤزل آماج سانیر و کؤنلوموزون ساحه سینده یابانجی دویغولارین آت چاپمالارینی و دوغال ایستک لر و دویغولاریمیزین یابانجی آیاقلارین آلتیندا ازیلمه سینی چکه نمیر و اؤزگورلوک زیروه سینه چاتماق اوچون اوجالیق سئون قارتال کیمی قانادلانیر ، قاناد چالیر و اوجالاردا اوچماغی تجروبه ائدیر و گؤیون یئددی نجی قاتیندان اوجا سسله سسله نیر :گرچک عاشیق لری ! حاق وورغونلاری !حقیقت قویمایین ترسینه دؤنسون گرچک گره ک اولدوز سایاق پارلاسین نور ساچان اولدوزو  قویمایین سؤنسون سوسموش قلم بو اوجا هارایی ائشیدیر ، اوره گی چیرپینیر ، بارماق لارلا هاماش اولور گؤز یاشی تؤکور کاغاذلا سس سسه وئریب پیچیلداشیرلار. پاییز قوشلاری کیمی سطیرلرین بوداقلاریندان او بیری بوداقلارا قونور عاشیق لارین باغریندا کی ساز کیمی سیزلاییر و گرچک وورغونلارینا قاریشیر و بئله سسله نیر :قلم ندیر؟ یازماق اوچون ظولمات کؤکون قازماق اوچون گؤز اونونده حاق سؤزلری قاطار – قاطار دوزماق اوچون ***یونولماییب آزماق اوچون خوش ایلقاری پوزماق اوچون ناحاقلیغین آجیلیغین اوره کلره سیزماق اوچون بئله لیک له بوتون قلملر آغیر گؤره ولرین دویورلار و گرچک لری گؤزه چکیرلر . مینلر ایلقیم کی اؤزلرین دنیز شکلینده گؤستریردیلر ایتیرلر و دوز یول لار گؤزوموزون اؤنونده بیتیرلر . ( توپراق ) آغیر اویخودان اویانیر ، نفس چکیر ، هوسله نیر و چیچک له نیر. یارالی قارتال لار اوخلانمیش قاناد ایله اونودولموش اوچوش لارین یادا سالیب ، قانادلانیب و قاناد چالیرلار. زیروه بزه نیب ، آماج باغرین آچیب ؛ صلابتلی اوچقان قارتاللارین یارالارینا ملحم قویوب اونلاری باغرینا باسا .ایندی گونش سایاق، ایشیق ساچان ، آنلاییش یایان و اینام پایلایان ” نوید آذربایجان ” سای سیز سئوینج له یاییلماقا باشلاییر و بیز گلجه یه گؤز تیکمیشیک کی :گؤزلردن آخان یاش اولاجاق می  سئل ؟ سولونموش دویغولار آچاجاق می  گول ؟ ویجدانین قولاغی ائشیدمز اولسا تاپدانمیش ایستک لر آچاجاق می  دیل ؟ ***باغیمسیزوارلیغی بوتؤو کیملیکی ده یرلی تاریخی اؤزل کولتورو قاباریق کئچمیشی گؤزل توپراغی بیر خالقین آماجین اوستون بیر دیلین اونودماق ، اونودماق اونودماق اولماز هیجران پرده سینده آسیمیلاسیون ماهنی سین چالانلار گؤز تیکیبلر بیر بؤیوک خالق وارلیغین دان ، کیملیگیندن ، تاریخیندن ، کولتوروندن و ان گوجلو و اوستون دیلیندن و بوتون ایستک لریندن ال چکیب آیریلسین و گئتدیکجه اوزاقلاشسین . داها بیلمیرلر کی وارلیق قورویانلار گونشین قاپیسین خالقین اوزونه آچیب لار و دامارلاریندا دولانان قان وارلیغین جوشغون پیناریندان جوشور و قانادلاریندا اوچوش جسارتی گون به گون آرتیر و بیلیب لر سئوگی لره گؤز یومماق اولماز . ایندی کؤنول ائوینه پارلاق اولدوزلاری قوناق ائدیب ، قارا قاباق بولودلارین و بوتون قارانلیقلارین قوپاراغین گؤتوروب سورگون سالماق ، ظولماتین کدرلی اوره گین اوزوب و باغرین دئشمک و چیسگین دومانلیغین کؤکسون سؤکمک و سئوگی نین گور اوجاغین گورله ندیرمک ، زنگین آخان و شاققیلدایان شلاله لرین و اوجا هارایلی وولکانلارین و یام – یاشیل یازین گؤزللیک لرین گؤزه چکمک ، کسرلی قلملرین گؤره ویدیر .اوزاق دوشن اولدوزلارین قاش – گؤز آتان یالقیز گونون آیین – شایین اویموش آیین اولکر آدلی یئددی یارین کؤینک سیخان بولودلارین ووقارلی قوتسال یوللارین شانلی توپراق آل بایراقین قارلی – قارلی اوجا داغین گیزلی – گیزلی گیزلرینی باسدیریلمیش ایزلرینی آچیق – آچیق آچیقلاماق یازارلارین گؤره ویدیر یازان : دوقتور پرویز محمدی - سولدوز