(۱)
سنسیز باغلاردان کئچشم
گوللره نه دئیه رم
عؤمرومه راحاتلیق سئچسم
یوللارا نه دئیه رم
آرزو چوخ ، عؤمور قیسسا
حسرت قالدیق او یازا
گؤز یاشلاریم آخارسا
سئللره نه دئیه رم
آرزوموز گول آچماسا
گوللر کؤنول آچماسا
کؤنوللر دیل آچماسا
ایللره نه دئیه رم
بیر سؤز کئچدی اورکدن
کئچمرم بو دیلکدن
ساز چیخماسا کؤینکدن
تئللره نه دئیه رم
حسرتی یاندیرماسام
یولونو دؤندرمه سم
سوکوتو دیندیرمه سم
گوللره نه دئیه رم
بیز نه کسک ، نه داشیق
یانماق اوچون یارانمیشیق
ائو ـ ائو وئرمه سک ایشیق
ائللره نه دئیه رم
ووصال گوماندا قالسا
یوللار طوفاندا قالسا
تبریز دوماندا قالسا
ائللره نه دئیه رم
(۲)
دئسم دونیا قدر سئویرم سنی ، اینانما
دئسم سما قدر سئویرم سنی ، اینانما
دئسم سئللر قدر سئویرم سنی ، اینانما
دئسم گوللر قدر سئویرم سنی ، اینانما .
بعضا دیل یانیلار ، دیل چاشا بیلر
اورکدن سورغوسوز دانیشا بیلر
گلمز نه حئسابا ، نه سایا سئوگیم
سیغیشماز بو گئنیش دونیایا سئوگیم .
دونیایا سیغمایان بو سئوگیم کی وار
منیم اوره ییمده یاشایار ، قالار
اوره ییمده چاتار ابدییه ته
اینان بو سئوگی یه بو محبته ...
(۳)
بیر عؤمورم ، یازیم سن سن
بیر نغمه یم ، سازیم سن سن
بیر اوره یم ، آرزوم سن سن
هارا گئتسن آپار منی .
بیر چیچه یم ، شئهیم سن سن
بیر صؤحبتم ، نئییم سن سن
بیر بوداغام ، مئهیم سن سن
هارا گئتسن آپار منی .
بیر لایلایام دونیام سن سن
بیر جوت گؤزم پؤیام سن سن
بیر سئوگی یم سئودام سن سن
هارا گئتسن آپار منی .
بیر باغچایام ، باریم سن سن
بیر زیروه یم ، قاریم سن سن
بیر سینه یم ، تاریم سن سن
هارا گئتسن آپار منی
بیر اوجاغام ، اودوم سن سن
بیر عنوانام ، آدیم سن سن
بیر قوشام ، قانادیم سن سن
هارا گئتسن آپار منی
گئنیش گؤیلر قوشا قالسین
آیریلیق داغ ـ داشا قالسین
ایزلریمیز قوشا قالسین
هارا گئتسن آپار منی ، آپار منی ... .
(۴)
گئجه یوخوما گلدی
اول کی تک گؤزلدی
گاه آغلادی ، گاه گولدو
تبریزین کوچه لری
یول سالدیم کوچه باغا
قول سالدیم کوچه باغا
دؤنوبدو نئجه باغا
تبریزین کوچه لری
اهراب ، قاراغاج اوستو
سورخاب دئ کیمدن کوسدو
ساندیم یولا گول دوزدو
تبریزین کوچه لری
شئشگیلان نغمه لندی
هر یانا نور الندی
منه خوش گلدین دئدی
تبریزین کوچه لری
شام قازاندان آدلادیم
قونقا باشینا چاتدیم
آی ناغیلیم ، بایاتیم
تبریزین کوچه لری
مارالان باغچا ـ باغچا
گوللردن توتدو خونچا
هئی باخدیلار دالیمجا
تبریزین کوچه لری
چرنداب سؤزه دؤندو
هر داشی کؤزه دؤندو
هارایا ، سسه دؤندو
تبریزین کوچه لری
لئیلاوا چشمه ـ چشمه
کیم دئییر بوردان کئچمه
باخسین حسرت کؤچومه
تبریزین کوچه لری
منیم سس دونیام سینیز
ساحیلسیز دونیام سینیز
بیر تبریز دونیام سینیز
تبریزین کوچه لری
گئجه یوخوما گلدی
اول کی تک گؤزلدی
گاه آغلادی ، گاه گولدو
تبریزین کوچه لری
تبریزین کوچه لری ...
No comments:
Post a Comment