پروفسور نصیب نصیبلی
آذربايجاندا ميللي ايدئولوگييانين اساس ديرک‌لريندن ايکيسي – تورکچولوک و آذربايجانچيليق حاقيندا نه قدر يازيليرسا دا – آزدير. يئتر کي، دوغرو-دوزگون يازيلسين. قاتيب-قاريشديريلماسين.
ميللي حرکتين گؤرکملي آراشديريجيسي، عئيني زاماندا ايدئولوقو ميرزبالا محمدزاده بيزيم ميللي فيکير تاريخينده ميلتچيليیي تورکچولوک، دؤولتچي‌ليیي ايسه آذربايجانچيليق اولاراق تانيملايير.[1] 1997-جي ايلين آپرئلينده باکيدا کئچيريلميش "آذربايجانين تورکچولوک و آذربايجانچيليق پروبلئملري" مؤوضوسوندا بين الخالق کونفرانسدا دا مسله محض بو شکيلده قويولموشدور.[2] غرب علمي فيکرينده يايغين اولان ميلت-دؤولت نظريه‌سيندن مسله‌يه باخساق، بونون تاماميله منطيقلي ياناشما اولدوغونو گؤره‌ريک. ميلت قوروجولوغو و مودئرن دؤولت قوروجولوغو آيري-آيري، آوتونوم(مستقل) پروسئس‌لردير. اؤزگون(اوریجینال) پرينسيپ‌لري و ايدئيالاري وار. آنجاق هم قوروجولوق، هم ده سونراکي دؤورلرده اونلار بير-بيري ايله سيخ علاقه ده اولور. بير-بيريني تاماملاماليدير دئيه موطلق بير قايدا يوخدور، بعضاً دؤولتله ميلتين عئيني اؤلکه‌ده ماراقلاري اوست-اوسته دوشمه‌يه بيلير. غربي آوروپادا ميلت-دؤولتلرين يارانماسي، بو سيرادان دئييلن مسله‌لر حاقيندا زنگين ادبيات وار.[3]
بو گون قوزئيده ده، گونئيده ده تورکچولوک و آذربايجانچيليق آنلاييشلارينين قاورانماسيندا چوخ اسکيک‌ليیيميز وار. اصلينده بو پرينسيپ‌لرين علمي-تاريخي شرحينده ائله بير پروبلئم يوخدور. مسله داها چوخ سياسيدير
تورکچولوک نه‌دير؟
ميلت اولماق ايسته‌ين هر بير ائتنوسون تاريخينده "بيز کيميک، هارادان گليب، هارايا گئديريک؟" ،يا دا داها دقيق ايفاده ائتميش اولساق - "بيز کيميک، کئچميشيميز نه‌دير، گله‌جه‌يميز نئجه اولاجاق؟" قاچينيلماز سوالينين قويولماسي ميلتلشمه سورجينين باشلانديغيني گؤسترير. آذربايجاندا اؤزونودرک پروسئسي ده محض بو سوالا جاوابين آختاريشي ايله باشلاييب. ميلتچي‌ليیين بو آدي (تورکچولوک) آلماسي‌نين بيرينجي سببي اودور کي، اونون مئيدانا چيخديغي دؤورده ياد دؤولتلر تورکلویو يوخ سايميش، اونو وارليغيندان و آديندان ايمتيناع يا زورلاميشلار. ايلک تورکچولرين ده اَن بؤيوک خيدمتي "بيز کيميک، آديميز ندير؟" سوالينا جاواب تاپماق اولموشدور. 100 ايلدن آرتيق تاريخي اولان بو حرکت اينکيشاف پروسئسي گئديشينده ميلت‌لشمه‌نين (ميللت اولمانين) باشقا مسله‌لريني ده گوندمه گتيرميشدير. بو گون فيکير و عمل بؤيوک‌لريميزين هاميسي‌ني تورکچو (ميللتچي) سايماق اولار و لازيمدير. بو بؤيوک‌لريميزين سيراسيندا، البت، حسن بَي زردابي، علي بَي حوسئينزاده، احمد آغااوغلو، علي مردان توپچوباشي، محمد امين رسولزاده، فتحعلي خان خويسکي، نصيب بَي يوسيف‌بَي‌لي، حسن بَي آغايئو، اوزئيير حاجيبيلي، جئيهون حاجيبيلي، ميرزبالا محمدزاده، محمد صاديق آران، شئيخ محمد خيياباني، سئييد جعفر پيشه‌وري، علي تبريزلي، محمدتقي زهتابي و ابولفضل ائلچيبَیين اؤزل يئري وار. ايندي حياتدا اولماسالار دا شخصيت‌لري و فيکيرلري ايله اونلار آذربايجاندا تورکچولویو سيمووللاشديريرلار. تورکچولوک يالنيز بو شخصلردن عيبارت دئييل، اونون اون‌مينلرله داشيييجي‌سي اولموش، ايندي ده وار.
آذربايجاندا تورکچولویون تاريخي گئنيش، بير نئچه کيتابا سيغيشماياجاق آراشديرما مؤوضوسودور. بو قيسا قئيدلرده همين جريانين باشلانغيج مرحله سيني بير نئچه ائپيزودلا اؤزتله‌مه‌يه چاليشاق.
...کيميلري آذربايجاندا تورکچولویون ميرزا فتحعلي آخوندزاده (آخونداوو، 1812-78) ايل باشلانديغيني فيکريني ايره‌لي سورور. آخوندزاده‌ني شرطي اولاراق تورکچو سايا بيلريک. اثرلرينين اؤنملي حيصه سي، اؤزلليکله درام اثرلري تورکجه‌دير. آما نظري اثرلرينده، اؤزلليکله "کمال الدوله مکتوبلاري"ندا تورکچولويه ضيد خئيلي ايدئيالاري وار.[4]
...حسن بَي زردابي‌ني (1842-1907) يئني دؤورده ايلک تورکچو سايماق اولار. "اکينچي" قزئتينده (1875-77) ايلک دفعه اولاراق ميللي شوعورون يارانماسينين اؤن شرطلريندن اولان "بيز-اونلار" ديخوتوميياسي/فرقلنديرمه‌سي اورتايا قويولدو. اونون "بيز"ي قافقاز موسلمانلاري، مشريق-زميندير. بو موسلمانلار "اؤز تورک ديليميزده" دانيشير [5] و قافقازين اَن چوخ‌سايلي ميلتيدير. "اونلار" ايسه قافقازداکي خريستيان ميلت‌لريديرلر و گونو-گوندن اينکيشاف ائديرلر. اينکيشافين دا اساس سببي اونلارين علم-تحصيل ساحه سينده فعال اولمالاريدير:"بيزيم قونشولار بيزلردن بيره اللي آرتيق علم تحصيل ائتمه‌يه سعي ائديرلر، يعني زيندگانليق جنگينده اونلارين بيريسي اللي موسلمانا برابردير. اونلارين بيريسي[نين] قازانديغي دؤولتي اللي موسلمان قازانير."[6] ائرمني‌لرين و گورجولرين ياراتديقلاري مکتبلر حاقيندا "اکينچي"نين بير نئچه ساييندا دانيشيلير و اونلار موسلمانلارا اؤرنک گؤستريلير. "اکينچي" دئمک اولار کي، هر ساييندا يئني اوصول (اوصولي-جديد) مکتب‌لرينين ياراديلماسي ضرورتيندن بحث ائدير. بو مکتب‌لرده آنا ديلينين تدريسي ده واجيبدير. چونکي "بئله مکتب‌خانا آچان گرک ياددان چيخارماسين کي، گله‌جکده گرک بيز ده آدام اولاق و هر بير علمي اؤز ديليميزده اوخوداق. اونا بينان ايندي آچيلان مکتب‌خانالاردا اؤز ديليميزي اوخوتماق نه‌کي لازيمدير، بلکه واجيبراقدير."[7] زردابي و دوستلارينا گؤره، مکتب‌لرده درسليک يئرينه ايستيفاده اولونان کلاسيک فارس ادبياتي نومونه‌لريني (فيردوسي‌نين، حافيظين، سعدي‌نين اثرلري و سایره) ده يئني درسليکلرله عوض ائتمک لازيمدير. يئني درسليکلر حاضيرلاماغين چتينليیيني نظره آلان "اکينچي" مؤليف‌لري بو احتيياجين عوثمانليداکي درسليکلر حسابينا اؤدنيلمه‌سيني تکليف ائديرلر. [8]
...اونسي‌زاده قارداشلارينين "کشکول" درگي‌سينده (1881) کيمليک آختاريشلاري ايستيقامتينده درج ائديلميش يازيلار آراسيندا محمد شاه‌تاختلي‌نين (محمد آغا شاه‌تاختينسکي، 1846-1931) بير مقاله‌سي ديقتي چکير. "بير آز دا اؤزوموزدن کي، آذربايجان تورکلريیيک دانيشاق" چاغيريشي ائدن مؤليف، ائتنوسون ياخين کئچميشي و حاضيرکي وضعيتي حاقيندا ماراقلي فيکير سؤيله‌يير: "بيز آذربايجان تورکلري روس ايستيلاسيندان اول اينديکي روس زاقافقازيياسي‌نين(جنوبی قافقازین) موستقيل و يئگانه صاحيبي ايديک. ايران، بيز ايديک. اينديکي وختده اهالي حسابينجا قافقاز قؤوم‌لرينين هاميسيندان چوخلوسو يئنه بيزيک. و هم‌ده اولسون ثروت و موکنتجه [قودرتجه] قونشولاريميزين هئچ بيريندن اسکيک دئييليک. بونونلا بئله هر نئجه اولوبسا-اولوب، بيز ايندي علم و معاريفجه قافقاز ميلتلرينين دالدا قالاني اولموشوخ." مؤليف حساب ائدير کي، "بعضي غرضکار بدخواه‌لارين ايديعالارينين عکسينه" بو گئريده قالميشليق بيزيم ميلتين دايمي خوصوصيتي دئييل. محمد شاه‌تاختلي قونشولارلا يارانميش فرقي آرادان قالديرماغين يئگانه يولونون علم و معاريفه ديقت يئتيرمکدن عيبارت اولدوغونو بيلديرير.[9] مؤليف عئيني مقاله‌ده عوثمانلي تورکجه‌سي ايله آذربايجان تورکجه‌سي (بعضن ده "آذربايجان ديلي" ايشله‌دير) آراسيندا موقاييسه آپارير و اونلاري عئيني ديلين موختليف لهجه‌لري حساب ائدير:"بيزيم ديل ايله عوثمانلي ديلي بير ديلدير. آرالاريندا اولان تفاووت آنجاق لهجه، يا عاوام ايصطيلاحينجا هنگ تفاووتدور." شاه‌تاختلي موقاييسه اوچون آلمان و فرانسيز ديللري داخيلينده موختليف لهجه فرقلريني اؤرنک گؤسترير. عوثمانليداکي تورکجه‌نين فرقلي اؤزلليیي اولاراق او، بو ديلده عرب و فارس سؤزلرينين چوخلوغونو، ائله‌جه ده بو ياد ديللرين قراماتيکاسينين تورکجه‌يه تاثير ائتديیيندن ناراحات اولدوغونو بيلديرير.
...علي بَي حسين‌زاده‌نين (1864-1940) "تورکلر کيمدير و کيم‌لردن عيبارتدير؟" باشليقلي 8 بؤلوملو سيلسيله مقاله‌سيني تورکچولویون کلاسيک نومونه‌سي سايا بيلريک. مؤليف تورکلرين کئچميشي حاقيندا تصوورلرين يانليش اولدوغونو، بو يانليشليغين يابانچي يازيلاردان قايناقلانديغيني بيلديرير. او، تورکجه مطبوعاتدا بئله "تورک و تاتارلارين مداري-ايفتيخاري بولونان چينگيزلره و تئيمورلارا داير ناروا سؤزلره راست گلينن" فيکيرلرين فرقينه وارماغا چاغيرير. علي بَيه گؤره، تاريخي کئچميشله باغلي مسله‌لرله ايندي دئييل، "بير نئچه عصر اولدن" مشغول اولماق لازيم ايدي و اونو گله‌جه‌یه ساخلاماق دوغرو دئييلدير. او دا حقيقتدير کي، ميللي تاريخ مسله‌سي "بير، يا ايکي فردين ايشي دئييلدير" ،بو پروبلئمين حلي اوچون "دارالفنون‌لار، مجليس‌لر، جمعيت‌لر مؤوجود اولمالي." مؤليف، آوروپا تورکولوگيياسي‌نين خئيلي ايره‌لي گئتديیيني، بير سيرا آکادئميک مسله‌لرين حلينه مووفق اولدوغونو يازير و بعضي تورکولوق و شرق‌شوناسين آديني چکير. داها سونرا عوثمانلي تورکلريندن شمس‌الدين سامي، نجيب عاصيم کيمي آراشديريجيلارين تشبوث‌لريني اؤرنک اولاراق گؤسترير. يئرلي تورکولوقلارين يئتيشمه‌ديیي بير يانا، خاريجي مؤليفلرين اثرلريني اوخويانلارين بئله اولماديغينا ديقت چکن علي بَي، ايچدن تأسوفلنديیيني بيلديرير.[10] علي بَي حسين‌زاده مقالهسينين سونراکي حيصه لرينده آذربايجان تورکلرينه "تاتار" دئمه‌یين يانليش اولدوغونو بيلديرير، تاتارلارين منشاييني ايضاح ائدير. اونلارين،موغوللارين بير حيصه سي اولدوغونو،آما غربه کوتلوي شکيلده کؤچ ائتمه‌ديکلريني بيلديرير. داها سونرا اسکي تورکلرين "صحنئيي-تاريخيييه‌يه ميلادي-عيسی‌دان 2000 ايل اول چيخديغيني" ،"بايکال جيواريندا اورخون و يئني‌سئي نهرلري سواحيلينده و آلتاي اتک‌لرينده ياشاميش" اولدوقلاريني قئيد ائده‌رک، آنتروپولوژي باخيمدان تورکلرين چئشيدلي تاثيرلره معروض قالديغيني اطرافلي ايضاح ائدير. مقاله‌نين نؤوبتي حيصه سينده حسين‌زاده اورال-آلتاي (توران) ديل قروپونون اؤزلليک‌لرينه کئچير، اونون سامي و هيند-آوروپا ديل قروپوندان فرقيني گؤسترير. او، ايسلامي قبول ائتديک‌لرينه و عرب‌لرله يوز ايللرله ياناشي ياشاديقلارينا باخماياراق، تورکلرين عربلشمه‌مه‌سي‌نين بيرينجي سببي اولاراق تورک ديلينين فرقلي اؤزلليیيني گؤسترير. اثرين سونراکي بؤلمه‌لرينده اسکي تورکلرين اينانيشلاريني، اونلارين اسکي مدنيتيني اَله آلان علي بَي حسين‌زاده، اورتا يوز ايللرده تورکلرين بؤيوک بير جوغرافييادا يازديغي مؤحتشم تاريخدن بحث ائدير. اونون بو اثري دؤورون تورکولوگييا علمي‌نين سون اوغورلارينا اساسلانير و جيدي سياسي اؤنمي واردير. ميللي مفکوره‌نين فورمالاشماسي باخيميندان علي بي حسين‌زاده‌نين "حيات"دا چاپ ائتديرديیي "بيزه هانگي علم‌لر لازيمدير؟" مقالهسينين ده بؤيوک اؤنمي اولموشدور.[11] محض بو مقاله‌سينده حسین‌زاده مشهور اوچلو دوستورونو – "تورک قانلي، ايسلام ايمانلي، فيرنگ قييافه‌لي اولاليم!" - فورموله ائتدي. فؤوق العاده اوغورلو ايفاده اولونموش بو دوستورو ميلتچي کسيم ميلتچي‌ليیين اساس شوعاري اولاراق قبول ائتدي، داها سونرالار ايسه بو ايدئولوژي-سياسي ايستيقامت‌لر – تورکچولوک، ايسلامچي‌ليق، چاغداشچيليق -موستقيل دؤولتين بايراغينداکي رنگلرده سيمووللاشدي (1918).
...احمد آغاوغلو (آغايئو، 1869-1939) آذربايجاندا تورکچولویون مؤحتشم نوماينده‌لريندندير. احمد بَي رئداکتورو اولدوغو "ايرشاد" قزئتينده (1906-7) ميلتچيليک (تورکچولوک) مؤوضوسوندا موذاکيره‌لر آچير. فرهاد آغايئو (اغازاد) ميلتچي‌لييه حصر اولونموش مقاله‌سينده "ميلتين ايستيقباليني تامين ائتمک اوچون بيرلشمک" گرکليیي و بونون اوچون ميلتچي‌ليیين يئگانه اويغون جريان اولدوغو فيکريني ايره‌لي سورور. ائله بوراداجا او يازير: "بير پاره دارولفنون‌لاردا تعليم تاپميش جاوانلار ميلتين بؤيله آغلار حالتيني گؤروبده اونون موهيم احتيياجلارينا اصلا ائعتينا ائتمه‌يوب، اؤزلريني آيري فيرقه‌لر، آيري پارتييالارا مولحق ائدييورلار."[12] فرهاد آغايئوين مقاله‌سينده‌کي فيکيرلر هارون سولطانوو آدلي بير "اينتئلليگئنتين" اعتيراضينا سبب اولدو. هارون سولطانووا گؤره، "ناسيوناليزم او وقت لازيم ايدي کي، بير ديلده، بير يئرده، بير عادتده اولانلاري ييغسين بير يئره... ناسيوناليزم بيزه هئچ لازيم دئييل، بيز ناسيوناليزمدن کئچميشيک." ميلتچيليیي ("ناسيوناليزم"ي) تنقيد ائدن مؤليف، آلتئرناتيو اولاراق سوسياليزم و ايسلامين گرکليیي فيکريني مودافيعه ائدير.[13]رئداکسييا بو موذاکيره‌نين واجيب اولدوغونو بيلديرير و اوخوجولاري موذاکيره‌يه قوشولماغا دعوت ائدير. فرهاد آغايئو اؤزو موذاکيره‌نين داوامي اولاراق بو مؤوضودا بير نئچه مقاله يازير. مقاله‌لرين بيرينده فرهاد آغايئو گؤستريردي: "... ها خياله دوشورم، ها ايمديکي موسلمانلارين نه‌اينکي ناسيوناليزمدن کئچيب اؤتمه‌ديیيني، حتّي ناسيوناليزمه گلوب چاتماديغيني دا موشاهيده ائده بيلمييوروم... يئنه باشا دوشه بيلمييورم کي، رفيقيميز [هارون سولطانوو] بو دونيادان خبر وئرييور، يوخسا آخيرتدن؟"[14] احمد بي آغايئو بير قدر سونرا اؤزو بو دارتيشمالارا قوشولوب، "ميلت و ميلتچيليک" باشليقلي دؤرد حيصه‌دن عيبارت مقاله يازدي. بو مقاله باکي مطبوعاتيني سوسياليزم ("آدميت") فيکرينه آلوده اولماقدا ايتيهام ائدن "ترجومان" قزئتينين بير مقاله‌سينه جاواب اولاراق يازيلميشدي. احمد بَي بو ايديعانين دوغرو اولماديغيني بيلديرير و ميلتچيليک حاقيندا اؤزونون باخيشلاريني ايضاح ائدير. او بيلديرير کي، "هر فردين عؤمرونده اولدوغو کيبي بير ميلتين عؤمرونده ده دؤوره‌لري وار. بو دؤوره‌لري کئچمک مجبوري بير عملدير." داها سونرا مؤليف آوروپا اؤلکه‌لريندن اؤيرنمه‌یين واجيب اولدوغونو دئيير، آوروپا تاريخينده ميلتچي‌ليیين اويناديغي موثبت قوروجولوق رولوندان بحث ائدير و گؤسترير کي: "... جومله ميلتلرين ان پارلاق مرحله‌لري همان "ميلتچيليک" دئييلن دؤوره‌لريدير! الان عوموم دونياني حئيرتده قويان، عوموم دونيايا حؤکم‌فرما اولان، او موشعشع [پارلاق]، او موقطع‌دير، اؤز علوم، صنايع‌سي ايله اوج-اعلی‌يا [يوکسک‌لره] چاتميش فرانساني، اينگيلتره‌ني، آلمانيياني، ايتاليياني بو عظمت، بو حشمته چيخاران همان ميلتچيليک، همان ناسيوناليزم دؤوره‌سي اولدو!"[15] احمد بَي باشقا مسله‌لرله ياناشي هر ميلتچي‌ليیين موثبت اولماديغي فيکرينده ده ايصرار ائدير.روسييادا پروشکئويچين ميلتچيليیي ايله تورگئنئوين ميلتچيليیي آراسيندا بؤيوک فرق اولدوغونو ايضاح ائدير. ائله بوراداجا او، اؤز ميلتينين عئيب‌لريني، باشقا ميلتلرين موثبت کئيفيتلريني گيزلتمه‌یي خيانت سايير: "حقيقي ميلتچي ميلتيني تنقيد ائتمکدن، ميلتينين عويوباتيني [عئيب‌لريني]، قوصوراتيني گؤرکزمکدن، ميلتينين آزارلاريني، دردلريني آريييب دا آچيق-آچيغا دئمکدن نه‌اينکي چکينمييورلر، بلکه بير آن بؤيله قافيل اولمييورلر. و همچنين حقيقي ميلتچيلر غئير ميلتلرين آراسيندا اولان گؤزل صيفتلري، گؤزل عادتلري، گؤزل بنالري [قوروملاري؟] اؤز ميلتي اوچون ايمتيثال ائدوب [اؤرنک بيليب]، ميلتيني بو گونه شئي‌لري اخذ ائتمه‌یه تحريک و تشويق ائتمکدن چکينمييورلر."[16]
...رسولزاده‌نين "آچيق سؤز" قزئتي (1915) اومتچي‌ليیين دئييل، ميلتچي‌ليیين (تورکچولویون) ميللي ائليتين شوعوروندا دومينانت-آپاريجي آخيما چئوريلديیي‌نين گؤستريجيسيدير. ميللي مطبوعاتدا ايلک دفعه قزئتين باشيندا "گونده‌ليک تورک قزئته‌سيدير" يازيلدي.
...عؤمر فايق نئمانزاده 1917-جي ايلده "من کيمم؟!" آدلي مقاله‌سينده يازيردي: "من ايديعا ائتمک دئييل، اوجا سسله باغيريرام کي، بيز اؤزوموزو تانيميريز، بيز اؤز ميلتيميزين بوش آديني بئله بيلميیيريز... ه، ائي تورک! ايستر داريخ، ايسترسه قاريخ، ياخاندان ال چکه‌جک دئييلم. سن هر شئيي اؤيرنمک ايسته‌ديیين حالدا نييه بيرجه زادي - يعني اؤزونو بيلمک ايسته‌ميرسن، نييه اؤز وارليغيندان، اؤز ووجودوندان، اؤز سوي و نسليندن خبرين يوخدور؟ نييه سنه "کيمسن؟" دئديکلري واخت حقيقي جاوابيندا عاجيز قاليرسان؟ نييه ساده‌جه دئيه بيلميرسن کي، من تورکم."[17]
آذربايجان دئموکراتيک رئسپوبليکاسي دؤورو (1918-20) ايلک دفعه اولاراق ميلتله دؤولتين بير-بيريني تاماملاديغي، دؤولتين تورکچولويه صاحيب چيخديغي بير دؤوردور. ميلتين و ميللي ديلين آدي رسمي‌لشدي؛ 1918-جي ايلين 27 اييونوندا ناظيرلر کابينئتي "دؤولتي ليسانين تورکجه اولماسي" حاقيندا قرار وئردي؛ ميللي تحصيل سيستئمينين قورولماسي ايشلري باشلاندي؛ پارلامان صدرينين موعاويني حسن بَي آغايئو اونا عونوانلانميش ديلکچه‌نين (ريزه‌نين) اوستونده يازميشدي: "عريضه تورکجه ليساندا اولماديغيندان انجامسيز قالير" ؛محمد باهارلي ايلک دفعه اولاراق ائتنوگئنئز مسله‌لريني آراشديردي.[18]
رسولزادنين "بولشئويک تورکچولویو دؤورو" آدلانديرديغي 1920-36-جي ايللرده تورکچولویون ايره‌ليده قالديرديغي بعضي پروبلئملر حلل ائديلدي، يا حلي ايستيقامتينده موهوم ايشلر گؤرولدو: ائتنيک کيمليیين (تورک ميلتي، تورک ديلي، تورک ادبياتي، تورک مدنيتي، تورک تئاتري و سایره.) تثبيتي، تحصيل سيستئمينين ميللي‌لشمه‌سي و اينکيشافي، ميللي ديلده تميزليک، ميللي ادبياتين و مدنيتين اينکيشافي و سایره. آنجاق بو پروسئس 1930-جو ايللرين اورتالاريندان داياندي، داها دوغروسو، بير سيرا ساحه‌لرده ترس يؤن آلدي. سووئت ديکتاتورو ایستالي‌نين امري ايله ميلتين، ديلين، ادبياتين، کولتورون و سایره آدي دَييشديريلدي؛ "تورک" آدينا تابو قويولدو؛ تاريخچي‌ليکده "آذربايجانلي" کونسئپتي قبول ائديلدي و وطنداشين تاريخ شوعورو قاريشديريلدي...
سووئت رئژيمينين سونلاريندا، اؤزلليکله پئرئسترويکا’دان باشلاياراق تورکچولوک يئنيدن جانلاندي، اسکي ايرثين منيمسه‌نيلمه‌سي اوچون موعين ايشلر گؤرولدو؛ يئني ايدئيالار و فيکير آداملاري مئيدانا چيخدي. اَن يئني دؤور تورکچولویون ليدئري ابولفضل ائلچي‌بَي درين معنالي دوستور ايره‌لي سوردو: "آذربايجان خالقي تورکلویونو درک ائتديکدن سونرا ميللي پروبلئملريني حلل ائتمه‌يه باشلاياجاق." ابولفضل ائلچيبَیين پرئزيدئنتليیي دؤورونده (1992-93) دئکولونيزاسييا سياستي چرچيوه‌سينده ايجتيماعي حياتين ميللي‌لشمه‌سي يؤنونده موهوم آدديملار آتيلدي؛ قوووه‌ده اولان آناياسايا اويغون اولاراق آذربايجان ديلينين دؤولت اورقانلاريندا ايشله‌ديلمه‌سي تامين ائديلدي؛ 1992-جي ايلين دئکابرين 22-ده ميللي مجليس "دؤولت ديلي حاقيندا قانون" قبول ائده‌رک، دؤولت ديلينين "تورک ديلي" اولماسي مسله‌سينده تاريخي عدالتين يئريني تاپماسيني تامين ائتدي؛ تحصيل سيتئمينين ميللي‌لشمه‌سينه باشلاندي؛ ميللي مکتب‌لرين ایستاتوسو و پوپوليارليغي آرتدي؛ کيريل عوضينده قبول ائديلميش لاتين قرافيکاسي ايله يئني درس کيتابلاري چاپ ائديلدي؛ تورک يئر آدلارينين برپاسي ايشي سورعتلندي؛ ميللي مجليس روسلاشديريلميش سوي‌آد سونلوق‌لارينين ("اوو" ،"يئو" کيمي) دَييشديريلمه‌سي‌نين آسانلاشديريلماسي قايدالاري حاقيندا قرار وئردي. آنجاق بو سورج اوزون چکمه‌دي، بير ايلدن سونرا ميللي حاکيميت دئوريلدي.
گونئيده ايسه تورکچولویون يئني مرحله‌سي ايسلام اينقيلابيندان (1979) سونرا باشلانميشدي. آنا ديلينده اونلارلا قزئت-درگي چيخدي، ميللي حياتين پروبلئملري اوزرينه يوزلرله مقاله يازيلدي. وارليق درگيسي يازارلاري باشدا دکتر جاواد هئيت اولماقلا يئرلي تورکچولویو علمي اساسلارا اوتورتدو، ميللي تاريخيميز عوموم‌تورک تاريخينين بير بؤلومو اولاراق اله آليندي، فارس عيرقچي‌ليیينه قارشي ايدئولوژي-مدني موباريزه جبهه سي آچيلدي. اون مينلرله اينسانين ایستاديونلاردا و باشقا ييغیناق يئرلرينده "هاراي، هاراي، من تورکم!" هايقيرتيلاري سپيلن توخوملارين وئريملي تورپاغا دوشمه‌سي‌نين گؤستريجيسيدير... [19]
بير سؤزله، تورکچولوک مئيدانا چيخديغيندان بو يانا يالنيز اوچ دفعه(!)، اؤزو ده ائپيزوديک اولاراق دؤولت سيياستينين اساسيني اولوشدوردو: آذربایجان دؤولت رئسپوبلیکاسی (1918-20)، ائلچي‌بَي حاکيميتي (1992-93) و 21 آذر (1945-46) دؤورلرينده. قالان واخت – روسييا ايمپئريياسي (تخمینن.1805 - 1917)، سووئت ايتتيفاقي (1920-1991)،کوسموپوليت-آوتوريتار علی‌يئولر ايقتيداري (1993-دن سونرا)، پهلوي‌لر (1925-79) و ايسلام جومهوريتي (1979-دان سونرا) زاماني تورکچولوک دؤولت حاکيميتينين باسقي‌لاري، بعضاً رئپرئسسييالاري آلتيندا اؤزونه يول تاپمالي اولدو. دراماتيک تاريخيميز آذربايجاندا تورکچولویون (ميللتچي‌ليیين) نظري جهتدن بيتکين‌ليک قازانماسينا دا ايمکان وئرمه‌دي. نظري جهتدن فورمالاشماسي بير يانا، بير نئچه نسيل اولکي تورکچولرين ياراتديغي ايرثه، اونلارين ميراثچي‌لاريندان ياديرغاديلدي، اَن اؤنملي‌سي ايسه اونلارين قارشييا قويدوغو پروبلئملرين اکثريتي بو گون ده قالماقدادير. گونوموز قوزئيده و گونئيده تورکچولویون، مثلا، ميللي مدنيت (کولتور) ساحه‌سينده اَن آکتوال وظيفه‌لري بونلار ساييلا بيلر:
تورک ميلتي، تورک ديلي، تورک ادبياتي، تورک کولتورو و سایره آنلاييشلارين برپا ائديلمه‌سي؛
دوغرو-دوزگون، اينانديريجي تاريخ شوعورونون فورمالاشديريلماسي؛
قوزئيده تحصيل سيستئمينين ميللي‌لشمه‌سي و چاغداشلاشماسي؛ گونئيده ميللي تحصيل سيستئمينين قورولماسي؛
ميللي ديلده تميزليک و ديلين اينکيشافي؛
اسکي ايدئولوژي-سياسي ايرثين (زردابي، احمد آغااوغلو، علي حسین‌زاده، علي مردان توپچوباشي، رسولزاده، ميرزا بالا محمدزاده و باشقالاری) منيمسه‌نيلمه‌سي؛
ميللي بيرليک فيکرينين (يئرليچيليک و طايفاچيليغين آلتئرناتيوي) فورمالاشديريلماسي؛
آدلارين و سويادلارين ميللي‌لشمه‌سي؛
آذربايجان جوغرافيياسي خاريجينده‌کي سويداشلارلا علاقه لرين گوجلنديريلمه‌سي؛
تورک دونياسينين بيرليیي شوعورو و سایره.
[1] ميرزا-بالا مئحمئت-زادئ، ميللي آذئربايجان حارئکئتي. ميللي آذ. "موساوات" حالک فيرکاسي تاريحي، بئرلين: فيرکا ديواني، 1938، ص. 21.
[2] آذربايجانين تورکچولوک و آذربايجانچيليق پروبلئملري، باکي: آي-اولدوز، 1998، 160 ص.
[3] مثلن، باخين: H. Kohn, Prelude to Nation-States. The French and German Experience, 1789-1815, NJ: Princeton, 1967; C. Tilly (ed.), The Formation of National States in Western Europe, NJ: Princeton, 1975; Peter Alter, Nationalism, London etc.: Edward Arnold, 1985 (özəlliklə,4-cü bölüm); Anthony Smith, The Ethnic Origins of Nations, Oxford, 1986; John Stoessinger, The Anatomy of the Nation-State and the Nature of Power, in Richard Little and Michael Smith (ed.), Perspectives on World Politics, London and NY: Routledge, 1992, pp. 23-35; Orhan Türkdoğan, Türk Ulus-Devlet Kimliği, İstanbul: İQ, 2005.
[4] گئنيش بيلگي اوچون، مثلن، باخين: http://www.gunaz.tv/aze/14/articleCat/1/articleID/2345-AZERBAYCANDA-TURK-VARLIGI-Siyasi-ideoloji-terefi-1.html/inner/1
[5] اکينچي. 1875-1877. تام متني. ترانسليتئراسيا و ترتيب ائدني توران حسنزاده، باکي: آوراسيا پرئس، 2005، ص. 26.
[6] اکينچي، ص. 83.
[7] يئنه اورادا، ص. 274.
[8] يئنه اورادا، ص. 161-162.
[9] کشکول، 13 مارت 1891، سايي 118.
[10] علي بَي حسین‌زاده، سئچيلميش اثرلري،ترانسليتئراسييا و ترتيبي اوفئلييا بايراملي‌نيندير، باکي: چاشي‌اوغلو،2007، س. 312-313.
[11] حيات، 8 اييون 1905، ن 2
[12] فرهاد آغايوف، هانسي عقيده‌ده اولماليييز، ايرشاد، 14 آوقوست 1906، ن 191، س. 3.
[13] هارون، ناسيوناليزم، ايرشاد، 8 سئنتيابر 1906، ن 211، س. 2-3.
[14] فرهاد آغايوف، هانسي مومکوندور؟ ايرشاد، 11 سئنتيابر 1906، ن 213، س. 2. علاوه اولاراق باخين: فرهاد آغايوف، ناسيوناليزم و باکو قزئته‌لري، ايرشاد، 27 سئنتيابر 1906، ن 227، ص. 2.
[15] احمد بَی آغايئف، ميلت و ميلتچيليک، ترقي، 22 يانوار 1909، ن 16، ص. 2.
[16] يئنه اورادا، 26 يانوار 1909، ن 19، ص. 2.
[17] آذربايجان پوبليسيستيکاسي‌نين آنتولوگيياسي. ترتيب ائدن جلال بَيديلي (ممدلوو)، باکي: شرق-غرب، 2007، ص. 443، 447.
[18] باخين: http://www.gunaz.tv/aze/14/articleCat/1/articleID/2345-AZERBAYCANDA-TURK-VARLIGI-Siyasi-ideoloji-terefi-1.html/inner/1
[19] مثلن، باخين: http://www.gunaz.tv/aze/14/articleCat/1/articleID/2326-DR-ZEHTABININ-CURUTMESI.html/inner/1; http://www.gunaz.tv/aze/14/articleCat/1/articleID/2315-VARLIQ-MEKTEBI.html/inner/1; http://www.gunaz.tv/aze/14/articleCat/1/articleID/2313-HESEN-RASIDININ-SORUSDURMASI.html/inner/1;http://www.gunaz.tv/aze/14/articleCat/1/articleID/2292-TEBRIZLI-ELININ-HARAYI.html/inner/1
تورکچولویوموزله آذربايجانچيليغيميز (2 )/ پروفسور نصیب نصیبلی
تورکچولویوموزله آذربايجانچيليغيميز (2 )/ پروفسور نصیب نصیبلی
آذربايجانچيليق ندير؟
قاجار ايرانيندان قوپارديلاندا قوزئي آذربايجان فئودال-خانليق بؤلونموشلویونو ياشاماقدا ايدي، هله ميلتلشمه سورجي باشلاماميشدي، بوتؤو وطن آنلاييشي يوخ ايدي. قارشيسيندا بيتکين‌لشميش ميللي دَيرلر سيستئمي بولماديغيندان رومانوولار روسيياسي‌نين بورادا سياستي، پروسئسي يؤنلنديرمکده زورلوق چکمه‌دي. روس حؤکومتي بوراني باکي، يئليساوئتپول (گنج) قوبئرنييالاري(والی‌لیک‌لری) و زاکاتال دايره‌سينه بؤلدو، "آذربايجان" آنلاييشينا اساسن ائتنوقرافيک آراشديرمالاردا راست گلمک مومکون ايدي. اون دوققوز يوز ايلين 30-40-جي ايللرينده کئچميش خانليقلارين تاريخيني يازماق سيفاريشي آلميش يئرلي مؤليف‌لر، حتّي عباس‌قولو آغا باکيخانوو بئله آرازدان قوزئيده‌کي تورپاقلاري آيري-آيري ايالت آدلاري ايله قئيد ائديرلر. روس يازارلاري‌نين بعضي‌لرينين "آذربايجان"ي يالنيز قاجار ايرانين قوزئي-باتيسينا عاييد ائتمه‌لري ده روس سيياستينين بوراني (قوزئي آذربايجاني) روسييا ايمپئريياسينين داخيلي قوبئرنيياسينا چئويرمک ایستراتئژيسيندن قايناقلانيردي. روس سيياستينين باشقا، داها اؤنملي اؤزلليیي ايسه بورانين اهالي‌سيني ايران و عوثمانليدان ياديرغاتماق و اوزاقلاشديرماق ايدي. بو سيياستين ايلک آدديملاري قراف وورونتسووون قافقاز جانيشين‌ليیي دؤورونده (1844-54) آتيلدي. اونون ميرزا فتحعلي آخوندزاده‌يه درام اثرلريني يئرلي دانيشيق ديلينده يازماقدا ايصرار ائتمه‌سي فاکتي بللي گئرچکليکدير. سونراکي ايللرده ده موستملکه حاکيميتي بورادا پارتي‌کولياريزمين (ايالتچي‌لي‌یين) آرتماسينا چاليشدي. يئني ياراديلماقدا اولان آيدين کسيمين ايالتچي‌ليک مئيللري دستکلندي. بو کسيمين اورتاق ادبي تورکجه‌دن فرقلي يئرلي ادبي ديل ("آذربايجان ديلي") ياراتماق مئيلي محض بو سيياستين تاثيري ايله ياراندي.
"خالقلار حبس‌خاناسي" روس ايمپئريياسينين چؤکمه‌سيندن (1917-جي ايلين فئورالي) سونرا يارانميش نيسبي ليبئرال شراييط آذربايجانين ميللي قوووه‌لرينه اراضي موختاريتي شوعاريني اورتايا آتماق ايمکاني وئردي. قافقاز موسلمانلاري قورولتاييندا (1917-جي ايلين آپرئلي)، عوموم‌روسييا موسلمانلاري قورولتاييندا (ماي)، غئيري-روس خالقلارين کييئو قورولتاييندا (اييون) ميللي-دئموکراتيک قوووه‌لرين آذربايجانا گئنيش اراضي-ميللي موختاريت طلبينه اويغون قرارلار وئريلدي. همين ايلين اوکتيابريندا موساوات پارتيياسينين ايلک قورولتاييندا قبول ائديلميش يئني پروقرامدا يازيلميشدي: "فيرقه طرفيندن آذربايجان، تورکوستان، قيرغيزيستان، باشقيرديستان کيمي تورک اؤلکه‌لري محللي موختاريت آلماليديرلار."[1] آما روسييانين يئرلي نوماينده‌لري ميللي قوووه‌لره موختاريت يئرينه "خارابازار" وعد ائدير، حتّي "آذربايجان" آديني بئله قبوللانا بيلميرديلر.[2] سياسي پروسئس‌لرين سونراکي گئديشاتي بلليدير: محض عوثمانلي‌نين بيرباشا ايصراري و تضييقلري ايله گونئي قافقازين روسييادان باغيمسيزليغي ائعلان ائديلدي (1918-اين آپرئلي)؛ آنجاق موستقيل زاقافقازييا(جنوبی قافقاز) فئدئراسيياسي اوزون ياشامادي؛ مايين 26-دا گورجوستان فئدئراسييادان چيخديغيني ائعلان ائتدي؛ آذربايجان ميللي شوراسي بو دفعه يئرلي ايلحاقچيلارين موقاويمتيني قيراراق مايين 28-ده آذربايجانين ايستيقلالي حاقيندا مشهور بياننامه‌ني ائعلان ائتدي؛ تاريخده ايلک دفعه اولاراق "آذربايجان" آدلي دؤولت ياراندي، اونون سرحدلري جيزيلدي.[3] سونرالار محمد امين رسولزاده يازاجاقدي: "روسييا ايداره‌سينده‌کي موسلمانلارا "تورک" دئديرتمک ايندي آرتيق قازانيلميش بير داوادير. يالنيز "تورک" کلمه‌سي دئييل، "آذربايجان" آدي دا قازانيلميشدير"[4] 1918-20-جي ايللرين قازانجلاري سيراسينا قوزئي آذربايجانين سرحدلرينين بليرلنمه‌سي و مودافيعه‌سيني ده بونلارا آرتيرماق اولار.
بو آرادا قاجار ايراني "آذربايجان" آديندا دؤولتين يارانماسينا منفي موناسيبتيني گيزلتمه‌دي. تئهران، "آذربايجان" دؤولتيني، ائله‌جه ده آديني اؤزونون وارليغي اوچون تهلوکه بيلديیيندن ايلک اؤنجه اونو تانيماقدان ايمتيناع ائتدي، پاريس صولح کونفرانسيندا حتّي "قديم ايران تورپاغي" اولدوغو اوچون بو تورپاقلارين اونا بيرلشديريلمه‌سيني طلب ائتدي، آنجاق سونرا "قافقاز آذربايجاني" ايله ايکي‌طرفلي موناسيبتلر قوردو.[5] داها سونرالار تاريخين بو فاکتي فارس عيرقچيلرينه آرازدان قوزئيده‌کي تورپاقلارين "آذربايجان اولماديغيني" ثوبوت ائتمک اوچون لازيم اولاجاقدي.[6]
قوزئي آذربايجانين ايکينجي دفعه ايشغاليندان سونرا (1920-جي ايلين 27 آپرئلي) يئني دؤولت قورومونون اوستونده‌کي"آذربايجان" آدي قالدي، آنجاق اسکي فرانسيز تيپلي موستملکه رئژيمي (بيرباشا ايداره‌چيليک) يئني اينگيليس تيپينه (دولايلي ايداره‌چيليک) دَييشدي؛ چاريزم دؤورونده پلانلانان ايشلر سووئت دؤورونده داها آرديجيل و غدار شکيلده داوام ائتدي. هم ده يئرلي کومونيست عونصورلرين فعال ايشتيراکي ايله. سووئت آذربايجاني تورپاقلارينين بير حيصه‌سي (زنگه‌زور، گؤيچه، بورچالي‌نين اورتا زولاغي، قارايازي) قونشولارا وئريلدي، اوسته‌گل بورادا "ساعاتلي بومبا" - ائرمني موختاريتي ياراديلدي.
سووئت رئژيمينين آزاد ايدئولوژي حياتا سون قويماسينا باخماياراق، يئني شراييطده اينکيشاف ائدن مدنيت، ايلک اؤنجه ادبيات يئني نسيلده وطنچيليک دويغولارينين گوجلنمه‌سينه ندن اولدو. گونئيده 21 آذر حرکاتي بو دويغولارين آرتماسينا علاوه ایستيمول وئردي. ميللي شوعورون، عوموميتله، ميلتچي‌ليیين ييپرانماسينا باخماياراق، آذربايجان وطنداشلاريندا وطن دويغوسو (وطن‌پرورليک روحو، پاتريوتيزم) يوکسلدي. ميللي فيکرين داشيييجي‌سي اولان، عئيني زاماندا اونو گليشديرمک ميسيياسينا يوکوملو اولان آذربايجان موهاجيرتي بو يئني گئرچکليیين فرقينده ايدي. موساوات پارتيياسينين 1936-جي ايل تاريخلي يئني "پروقرام اساسلاري"ندا تورکچولوکله آذربايجانچيليق بير-بيريني تاماملايان وحدت حاليندا عکسيني تاپدي: "بؤيوک تورکلويه منسوب بير مملکت اولماسي حسبي ایله [سورتي ایله] آذربايجان، ديگر تورک ائللري ايله کولتورل صورتده باغليدير. بو باغليليغين بوندان اول اولدوغو کيمي بوندان سونرا داهي [دا] قورونماسيني موساواتچيليق جيديتله مودافيعه ائدر... آذربايجان، قديم زامانلاردان بري تاريخين موختليف دؤورلرينده کندينه مخصوص سياسي وارليق گؤستره‌رک موستقيل دؤولت حاليندا ياشاميشدير. آذربايجان خالقي ايسه عصري ميلت اولماق اوزره، زنگين بير کولتور حياتينا ماليک بولونموش و بونون منطيقي نتيجه‌سي اولاراق سياسي بير ايدئال داشيميشدير."[7]
يوخاريدا آدي چکيلن "بومبا" سووئتلرين ضعيفله‌ديیي سون دؤورده پارتلاديلدي و 1987-جي ايلدن سونرا ائرمنيستانين مشوم تجاووزو ("قاراباغ پروبلئمي") باشلادي. ائرمنيستانين تجاووزونو دف ائده بيلمه‌ين آذربايجان، بؤهران دؤورونه گيردي. دؤولتين تورپاق بوتونلویونون پوزولماسي بؤهران کيمي قبول ائديلمه‌سه ده بو، داوام ائتمکده‌دير.
گونئيده ده "آذربايجان" مفهومو و اونون جوغرافيياسي اون ايللرله پهلوي و ايسلام جومهوريتي رئژيملرينين باسقي‌سينا معروض قالدي. 1937-جي ايل يئني اراضي-اينظيباطي بؤلگوسونه گؤره، آذربايجانين خئيلي حيصه سي 3-جو و 4-جو اوستانا (يالت) بؤلوندو، قالان حيصه لري قونشو اوستانلارا قاتيلدي.اوستانلارين آدينداکي تاريخي آدلار گؤتورولدو. زنجان، قزوين، ساوه، سولطان آباد و همدان بو اوستانلاردان کناردا قالدي. داها سونرالار (1941) بيجار 4-جو، آستارا ايسه 3-جو اوستاندان قوپاريلدي. ايسلام جومهوريتينين حاضيرکي اراضي-اينضيباطي بؤلگوسونه گؤره، تورکلرين کومپاکت مسکون اولدوغو ائتنيک زونادا شرقي آذربايجان، غربي آذربايجان، اردبيل، زنجان، همدان، تئهران، مرکزي (اراک)، قوم، البرز (قزوين) اوستانلاري ياراديليب. بو جور بؤلونمه گونئيلي‌لرده وطن دويغوسونون ("بوتؤو آذربايجان") دولغونلاشماسينا مانع اولور. او بيري ياندان، کوردلرين کومپاکت ياشاديقلاري بعضي تورپاقلار غربي آذربايجان اوستاني ترکيبينه قاتيلميشدير. اوسته ليک، سون 20-30 ايلده بو اوستانين اهاليسي سورعتله و دورمادان کوردلشديريلمکده‌دير. بو، گله‌جکده يئني "قاراباغلارين" اورتايا چيخماسي اوچون اويغون اورتام يارادير.
گونئيلي‌لرين آذربايجانچيليق فيکرينه ياناشماسيندان بحث ائدرکن بير موهوم مسله‌يه موناسيبتيميزي بيلديرمه‌يه گرک وار. داها دوغروسو،تورکچو يازارلارين بير بؤلومونون بوتون ايراني وطن سايمالاري سببي اوزرينده دورماق گرکدير. بيزجه، بو ياناشماني آشاغيداکي دليل‌لرله ايضاح ائتمک اولار. 1) ايراندا آذربايجان/تورک مسله‌لرينه حصر ائديلميش کيتاب و مقاله‌لرين يازارلاري، "تجزيه-طلبليک"ده (بؤلوجولوکده، سئپاراتيزمده) ايتتيهام اولونماماق اوچون بو "قورويوجو کمر"دن ايستيفاده ائتمک مجبوريتينده‌ديرلر؛ 2) تاريخي آذربايجاندان کناردا مسکونلاشميش تورکلرين (شيراز اطرافينداکي قاشقاي تورکلري کيمي) وارليغي؛ سون 50-60 ايلده ميليونلارلا تورکون آذربايجاندان ايرانين باشقا يئرلرينه کؤچمه‌سي، آذربايجانداکي تورکلرين ايراندا ياشايان تورکلرين ياريدان آزينا چئوريلمه‌سي؛ "آذربايجان آيريلسا، قالان سويداشلاريميزين طالعيي نئجه اولاجاق؟" انديشه‌سي؛ 3) سون مين ايلده ايران دؤولتينين ياشاماسيندا تورکلرين، خوصوصن حاکيم تورک خاندانلارينين موهوم رولو؛ گله‌جک ايراندا فارس ديلي ايله ياناشي تورکجه‌يه ده رسمي دؤولت ديلي ایستاتوسونون وئريلمه‌سي ايسته‌یي؛ "ايراني بيز ياشاتديق، بيز اونا حاکيم اولدوق، ايندي نييه اونو فارسلارا وئرک؟" ايديعاسي.
بيرينجي دليل، يا سبب منطيقه اويغوندور، اونون اوزرينده دورماغا دَيمز. ايکينجي دليله گلديکده، دونيادا ميللي دؤولت سرحدلريندن کناردا ميليونلارلا سويداشي، يا اسکي وطنداشي اولان اؤلکه‌لر وار. بو دؤولتلرين وارليغي، سرحدلري کناريندا قالان سويداشلارين ایستاتوسونون يوکسلمه‌سينده ان حساس فاکتور رولونو اويناماغا قاديردير. ائتنوسون ميللي دؤولت ايچينده‌کي و خاريجينده‌کي حيصه لري آراسيندا سيخ ايش‌بيرليیي‌نين ياراديلماسي ايسه يالنيز تئخنيکي پروبلئمدير. آذربايجاندان کناردا ياشايان تورکچو اينسانلارين بير قيسمينده "آذربايجانچيليق" دويغوسونون اولماماسي، يا ضعيفليیي، بيزجه، غئيري-عادي حاديثه کيمي قارشيلانماماليدير.
اوچونجو دليل. گله‌جک ايرانين آوسترييا-ماجاريستان ايمپئراتورلوغو، يا چئخوسلوواکييا کيمي بير "دوعال دؤولت"ه چئوريلمه‌سي چاغديشي بير ايستک اولا بيلر. چونکي 1) ايران اسکي ايمپئرييا خاراکتئريني ساخلاماقدادير، ایييرمي و ایييرمي بير يوزيللر اوچون ايمپئرييالارين يئنيدن قورولماسي دئييل، داغيلماسي خاراکتئريکدير؛ 2) ايران اهاليسي يالنيز فارسلاردان و تورکلردن عيبارت دئييل، گله‌جک ايراندا باشقا خالقلارين دا حاقلارينين تاميني، بو سيرادان اونلارين ميللي ديللرينه رسمي ایستاتوسون وئريلمه‌سي طلب ائديلير؛3) تورک خاندانلاري ايرانا حاکيم اولموشلار (بوگونکو ايران/فارس دؤولتينين باشيندا دوران آيت الله خامنه‌اي کيمي)، آنجاق تورکلر حاکيم ائتنوس/ميللت اولماميشلار؛ 4) تورکلر يالنيز آذربايجاندا چوخلوقداديرلار (تئهران ايستيثنا اولا بيلر)، آذربايجان سرحدلرينين خاريجينده ياشايان تورکلر آزليقداديرلار، يئرلي اهالي ايله رقابت آپاراجاق گوجه صاحيب دئييللر؛ 5) گونئي آذربايجانين گله‌جه‌یيني پايلاشا بيله‌جه‌یي اَن اويغون اؤلکه قوزئي آذربايجاندير و سایره "ايرانا حاکيم اولاجاغيق" خولياسي ايله ياشايانلارا بير تاريخي فاکتي خاطيرلاتماق فايدالي اولا بيلر.گنج شاه ايسماعيلين "آتا" کيمي خطاب ائتديیي سولطان ايکي بايزيد،گؤندرديیي مکتوبوندا اطرافيني بوروموز فارسلاري گؤز اؤنونه آلاراق اونا اؤيود وئريردي: "فارسلار مسله‌سينده احتياطلي اول، اونلار اؤزلريندن اولمايان حؤکمدارلارا ايطاعت ائتمه‌ين بير خالقدير."[8]
بئله‌ليکله، قوزئيده و گونئيده وطنچيليک، دؤولتچيليک کيمي قاورانيلان، يا قاورانيلمالي اولان آذربايجانچيليغين قارشيسيندا دوران وظيفه‌لرين اوست-اوسته دوشن و فرقلي طرفلري وار. قوزئيده آذربايجانچيليغين اساس وظيفه‌لريني آشاغيداکي کيمي سيرالاماق اولار:
- آذربايجان رئسپوبليکاسينين تورپاق بوتونلویونون برپاسي؛
- آذربايجان رئسپوبليکاسي دؤولتينين دئموکراتيکلشمه‌سي؛
- اونيتار آذربايجان رئسپوبليکاسيندا ائتنيک آزليقلارلا اويومون تامين ائديلمه‌سي؛
- بوتؤو آذربايجان (قوزئي، گونئي، بورچالي، دربند) شوعورونون فورمالاشديريلماسي؛
- تورک دونياسينا اينتئقراسييا و سایره
گونئيده آذربايجانچيليق مفکوره‌سينين طلبلريني آشاغيداکي کيمي فورموله ائتمک اولار:
- ايراندا تورک ائتنيک زوناسينين و گونئي آذربايجانين سرحدلرينين بليرلنمه‌سي؛
- ايران دؤولتي داخيلينده آذربايجان اوستانلارينين بيرلشديريلمه‌سي؛
- گونئي آذربايجانين موختاريتي، يا ايستيقلالي ايدئالينين گئرچکلشديريلمه‌سي اوغروندا موباريزه؛
- بوتؤو آذربايجان (قوزئي، گونئي، بورچالي، دربند) شوعورونون فورمالاشديريلماسي؛
- تورک دونياسينا اينتئقراسييا و سایره
تورکچولوک نه دئييلدير؟
1993- جو ايلين اييونوندا قوزئي آذربايجاندا حاکيميته قاييدان کومونيست نومئنکلاتورا(اصطلاحات) اؤزو ايله اسکي سياسي داورانيش طرزيني و کوسموپوليت-آوتوريتار دوشونجه سيستئميني گتيردي. يئني حاکيميت اسکي‌سيني ايدئولوژي جهتدن گؤزدن سالماق اوچون يئني "ميللي ايدئيا" آختاريشينا چيخدي. ميللي حاکيميتين(آذربایجان خالق جبهه‌‌سی حاکيميتينين) ايدئولوژي داياقلاريني سؤکمک اوچون تورکچولویو قارالاماق گرکدي. ايلک مقاله پرئزيدئنت آپاراتينين او واختکي شؤعبه موديري، فلسفه علملري ناميزدي (ايندي پرئزيدئنت آدمينيستراسيياسينين رهبري، آکادئميک) راميز مهدي‌يئودن گلدي. "تورکچولوک تاريخين گؤزو ايله، ياخود ميللي ايدئيا عصرلرين قوووشوغوندا" باشليقلي گئنيش، سيلسيله مقاله‌ده[9] عوثمانليدا و آذربايجاندا تورکچولوک حرکتي‌نين تاريخي تحريف ائديله‌رک او، "معناسيز و پئرسپئکتيوسيز" ايدئولوژي-سياسي جريان ائلان ائديلدي. بو مقاله‌ده آذربايجانچيليغين سونراکي ايللرده ده موختليف مؤليفلرين موختليف فورمالاردا تيراژلاديغي رسمي ايضاحي وئريلدي: "آذربايجانچيليق" خالقيميزين چوخ عذاب-اذيتلردن سونرا ياراتديغي تاريخي ديردير، رئال موستقيللييه نايل اولماق، واحيد، بؤلونمز، اونيتار آذربايجاني قورويوب ساخلاماق واسيطه‌سيدير. بو گون "آذربايجانچيليق" ميللي حياتين آهنگدارلي‌غينين چوخسرليک عنعنه سي، ديياريميزدا ياشايان بوتون ميلتلرين و ائتنيک قروپلارين قارداشليغي، بيرگه فعاليتي و قارشيليقلي تاثيرينين تاريخي، عومومي طالعيي آذربايجانين بوتؤولویونو قوروماق اوغروندا اونلارين بيرگه موباريزه‌سينين تاريخي تجروبه‌سيدير. بو، آذربايجان خالقينين حياتي معنافعي‌نين وحدتي، اونون دئموکراتييا و ترققي اوغروندا موباريزه‌سينين غايه‌سيدير. "آذربايجانچيليق" قارشيليقلي يارديم، امکداشليق و حوقوق برابرليیي پرينسيپلرينين اساسيني تشکيل ائدير، اونلارين پوزولماسينا سبب اولا بيلن بوتون حاللارا قارشي باريشماز مؤوقع توتور."[10]
بو و بوندان سونراکي مقاله و کيتابلارين اساس ماهيتي "يئني ميللي ايدئيا"دان تورکچولويه آلتئرناتيو ياراتماقدير. حالبوکي بو، منطيقه اويغون دئييل، چونکي بو آخيملار بير-بيرينه قارشي دئييل، عکسين، اونلار بير-بيريني تاماملايير. اصلينده آوتوريتار رئژيمين سياسي مقصدي يالنيز موخاليفتده‌کي ميللي-دئموکراتيک قوووه‌لري دئييل، بوتون ميلتي سيياست صحنه‌سيندن ووروب چيخارتماقدير. بونا دا نايل اولوب. بو، بوتون آوتوريتار رئژيملره خاص اولان خوصوصيتدير. آوتوريتار رئژيملر يئريني مؤحکملتديکجه، ميلت (يا ليبئراليزمين ايفاده ائتديیي کيمي "وطنداش جمعيتي") ضعيفله‌يير و ميلتچيليک ايدئولوژي-سياسي جريان کيمي گؤزدن سالينير. چوخ دوشوندوروجودور کي، بو گون هئچ بير رسمي سندده "ميلت" آنلاييشي و اونون تعريفي يوخدور. حتّي آذربايجان رئسپوبليکاسينين کونستيتوسيياسيندا اونلارلا "ميللي" صيفتي وار، بيرجه "ميلت" سؤزونه بئله راست گلمک مومکون دئييل.
1995- جي ايلده ايقتيدار اسکي "آذربايجان ديلي" آنلاييشي‌نين يئر آلديغي يئني آناياسا (کونستيتوسييا) لاييحه‌سي حاضيرلادي. محض بو مسله‌نين يؤنلنديريلن "موذاکيره‌سي" زاماني ميللي آيدينلارين گتيرديکلري علمي-تاريخي دليللر هئچ ساييلدي. اونلارين تکليف ائتديیي واريانتلارين – تورک ديلي، آذربايجان تورک ديلي، آذربايجان (تورک) ديلي- هئچ بيري کئچمه‌دي. اسکي نومئنکلاتور بوروکراتييا و ضياليلارين راحاتسيزليغي اساس گؤتوروله‌رک، ميللي وارليغين يوسيف ایستالين وئرسيياسي برپا ائديلدي. بو "موذاکيره"ده سسلنديريلن و توپلومدا يئر آلان "راحاتسيزليق"لاردان بعضيلرينه قيسا نظر سالاق.
"تورکچولوک آذربايجانين گله‌جه‌یيني تهلوکه‌يه سالير، غئيري-تورکلرده سئپاراتيست احوال-روحيييه يارادير". حالبوکي آذربايجان تورکلرينين ميللي شوورا صاحيب اولماسي آذربايجانين بوتؤولویو و گله‌جه‌یي اوچون ضروريدير. قاراباغ پروبلئمينين يارانماسي و آشاغي-يوخاري 25 ايل قالماسينين سببلريندن بيريسي ده آذربايجان تورکلرينده ميلتلشمه سورجينين باشا چاتماماسيدير. باشقا ائتنيک آزليقلارين (تاليشلار، تاتلار، لزگي‌لر و باشقالاری) اؤلکه‌نين ائتنيک چوخلوغونون اؤز آدينا صاحيب اولمالاريندان ناراحاتچيليقلاري يئرسيزدير، داها دقيقي - عدالتسيزليکدير. آذربايجانداکي ائتنيک واحيدلرين هاميسي‌نين اؤز رسمي آدي وار (تورکلردن باشقا)، اونلاري بير يئرده توتا بيلن آنلاييش دا وار - "آذربايجان خالقي" ،
"آذربايجان اهالي‌سينين اکثريتينين ديلينه تورک ديلي دئمک اونلارين ميللي کيمليیيني گيزله‌دير." باشقا سؤزله، "آذربايجان ديلي تورکيه‌ده ايشله‌ديلن تورکجه‌ده ارييه‌جک" تئزيسينين هئچ بير اساسي يوخدور. عئيني آددا ديله ماليک اولان اونلارلا اينگيليس‌ديللي، ايسپان‌ديللي، آلمان‌ديللي اؤلکه وار و اونلارين هئچ بيرينين "ميللي کيمليیي گيزلنمير."
"نه فرقي وار، آذربايجان ديلي اولسون، يوخسا تورک ديلي؟" فرقيني يوخاريدا ايضاح ائتديیيميز سياسي سبب‌لرده آختارماق لازيمدير. بو سببلرين باشيندا دا موسکووا و تئهرانين آذربايجاني تورک دونياسيندان آييريب، اونا "يئتيم" ،"يئسير" پسيخولوگيياسي آشيلاماقدير. "آذربايجان ديلي" لينقوونيمينين 1936-جي ايلدن و 1995-جي ايلدن سونرا 73 ايلليک (56+17) تاريخي وار. بس يوز ايللرله اؤلچولن "تورک ديلي"نين تاريخيني نه ائدک؟ او بيزيم کئچميشيميز دئييلمي؟ميلتين موطلق اکثريتي (گونئي، ايرانين باشقا ايالتلري، آوروپا، آمئريکادا) دانيشديغي ديله "تورک" دئيير. ميللي چوخلوقدان قوزئي آذربايجانداکيلاري قوپارتماق بؤلوجولوکدور.
"آذربايجانلي، آذري، آذري-تورک، آذربايجان تورکو کيمي ائتنونيم
آذربايجاندا ميللي ايدئولوگييانين اساس ديرک‌لريندن ايکيسي – تورکچولوک و آذربايجانچيليق حاقيندا نه قدر يازيليرسا دا – آزدير. يئتر کي، دوغرو-دوزگون يازيلسين. قاتيب-قاريشديريلماسين.
ميللي حرکتين گؤرکملي آراشديريجيسي، عئيني زاماندا ايدئولوقو ميرزبالا محمدزاده بيزيم ميللي فيکير تاريخينده ميلتچيليیي تورکچولوک، دؤولتچي‌ليیي ايسه آذربايجانچيليق اولاراق تانيملايير.[1] 1997-جي ايلين آپرئلينده باکيدا کئچيريلميش "آذربايجانين تورکچولوک و آذربايجانچيليق پروبلئملري" مؤوضوسوندا بين الخالق کونفرانسدا دا مسله محض بو شکيلده قويولموشدور.[2] غرب علمي فيکرينده يايغين اولان ميلت-دؤولت نظريه‌سيندن مسله‌يه باخساق، بونون تاماميله منطيقلي ياناشما اولدوغونو گؤره‌ريک. ميلت قوروجولوغو و مودئرن دؤولت قوروجولوغو آيري-آيري، آوتونوم(مستقل) پروسئس‌لردير. اؤزگون(اوریجینال) پرينسيپ‌لري و ايدئيالاري وار. آنجاق هم قوروجولوق، هم ده سونراکي دؤورلرده اونلار بير-بيري ايله سيخ علاقه ده اولور. بير-بيريني تاماملاماليدير دئيه موطلق بير قايدا يوخدور، بعضاً دؤولتله ميلتين عئيني اؤلکه‌ده ماراقلاري اوست-اوسته دوشمه‌يه بيلير. غربي آوروپادا ميلت-دؤولتلرين يارانماسي، بو سيرادان دئييلن مسله‌لر حاقيندا زنگين ادبيات وار.[3]
بو گون قوزئيده ده، گونئيده ده تورکچولوک و آذربايجانچيليق آنلاييشلارينين قاورانماسيندا چوخ اسکيک‌ليیيميز وار. اصلينده بو پرينسيپ‌لرين علمي-تاريخي شرحينده ائله بير پروبلئم يوخدور. مسله داها چوخ سياسيدير
تورکچولوک نه‌دير؟
ميلت اولماق ايسته‌ين هر بير ائتنوسون تاريخينده "بيز کيميک، هارادان گليب، هارايا گئديريک؟" ،يا دا داها دقيق ايفاده ائتميش اولساق - "بيز کيميک، کئچميشيميز نه‌دير، گله‌جه‌يميز نئجه اولاجاق؟" قاچينيلماز سوالينين قويولماسي ميلتلشمه سورجينين باشلانديغيني گؤسترير. آذربايجاندا اؤزونودرک پروسئسي ده محض بو سوالا جاوابين آختاريشي ايله باشلاييب. ميلتچي‌ليیين بو آدي (تورکچولوک) آلماسي‌نين بيرينجي سببي اودور کي، اونون مئيدانا چيخديغي دؤورده ياد دؤولتلر تورکلویو يوخ سايميش، اونو وارليغيندان و آديندان ايمتيناع يا زورلاميشلار. ايلک تورکچولرين ده اَن بؤيوک خيدمتي "بيز کيميک، آديميز ندير؟" سوالينا جاواب تاپماق اولموشدور. 100 ايلدن آرتيق تاريخي اولان بو حرکت اينکيشاف پروسئسي گئديشينده ميلت‌لشمه‌نين (ميللت اولمانين) باشقا مسله‌لريني ده گوندمه گتيرميشدير. بو گون فيکير و عمل بؤيوک‌لريميزين هاميسي‌ني تورکچو (ميللتچي) سايماق اولار و لازيمدير. بو بؤيوک‌لريميزين سيراسيندا، البت، حسن بَي زردابي، علي بَي حوسئينزاده، احمد آغااوغلو، علي مردان توپچوباشي، محمد امين رسولزاده، فتحعلي خان خويسکي، نصيب بَي يوسيف‌بَي‌لي، حسن بَي آغايئو، اوزئيير حاجيبيلي، جئيهون حاجيبيلي، ميرزبالا محمدزاده، محمد صاديق آران، شئيخ محمد خيياباني، سئييد جعفر پيشه‌وري، علي تبريزلي، محمدتقي زهتابي و ابولفضل ائلچيبَیين اؤزل يئري وار. ايندي حياتدا اولماسالار دا شخصيت‌لري و فيکيرلري ايله اونلار آذربايجاندا تورکچولویو سيمووللاشديريرلار. تورکچولوک يالنيز بو شخصلردن عيبارت دئييل، اونون اون‌مينلرله داشيييجي‌سي اولموش، ايندي ده وار.
آذربايجاندا تورکچولویون تاريخي گئنيش، بير نئچه کيتابا سيغيشماياجاق آراشديرما مؤوضوسودور. بو قيسا قئيدلرده همين جريانين باشلانغيج مرحله سيني بير نئچه ائپيزودلا اؤزتله‌مه‌يه چاليشاق.
...کيميلري آذربايجاندا تورکچولویون ميرزا فتحعلي آخوندزاده (آخونداوو، 1812-78) ايل باشلانديغيني فيکريني ايره‌لي سورور. آخوندزاده‌ني شرطي اولاراق تورکچو سايا بيلريک. اثرلرينين اؤنملي حيصه سي، اؤزلليکله درام اثرلري تورکجه‌دير. آما نظري اثرلرينده، اؤزلليکله "کمال الدوله مکتوبلاري"ندا تورکچولويه ضيد خئيلي ايدئيالاري وار.[4]
...حسن بَي زردابي‌ني (1842-1907) يئني دؤورده ايلک تورکچو سايماق اولار. "اکينچي" قزئتينده (1875-77) ايلک دفعه اولاراق ميللي شوعورون يارانماسينين اؤن شرطلريندن اولان "بيز-اونلار" ديخوتوميياسي/فرقلنديرمه‌سي اورتايا قويولدو. اونون "بيز"ي قافقاز موسلمانلاري، مشريق-زميندير. بو موسلمانلار "اؤز تورک ديليميزده" دانيشير [5] و قافقازين اَن چوخ‌سايلي ميلتيدير. "اونلار" ايسه قافقازداکي خريستيان ميلت‌لريديرلر و گونو-گوندن اينکيشاف ائديرلر. اينکيشافين دا اساس سببي اونلارين علم-تحصيل ساحه سينده فعال اولمالاريدير:"بيزيم قونشولار بيزلردن بيره اللي آرتيق علم تحصيل ائتمه‌يه سعي ائديرلر، يعني زيندگانليق جنگينده اونلارين بيريسي اللي موسلمانا برابردير. اونلارين بيريسي[نين] قازانديغي دؤولتي اللي موسلمان قازانير."[6] ائرمني‌لرين و گورجولرين ياراتديقلاري مکتبلر حاقيندا "اکينچي"نين بير نئچه ساييندا دانيشيلير و اونلار موسلمانلارا اؤرنک گؤستريلير. "اکينچي" دئمک اولار کي، هر ساييندا يئني اوصول (اوصولي-جديد) مکتب‌لرينين ياراديلماسي ضرورتيندن بحث ائدير. بو مکتب‌لرده آنا ديلينين تدريسي ده واجيبدير. چونکي "بئله مکتب‌خانا آچان گرک ياددان چيخارماسين کي، گله‌جکده گرک بيز ده آدام اولاق و هر بير علمي اؤز ديليميزده اوخوداق. اونا بينان ايندي آچيلان مکتب‌خانالاردا اؤز ديليميزي اوخوتماق نه‌کي لازيمدير، بلکه واجيبراقدير."[7] زردابي و دوستلارينا گؤره، مکتب‌لرده درسليک يئرينه ايستيفاده اولونان کلاسيک فارس ادبياتي نومونه‌لريني (فيردوسي‌نين، حافيظين، سعدي‌نين اثرلري و سایره) ده يئني درسليکلرله عوض ائتمک لازيمدير. يئني درسليکلر حاضيرلاماغين چتينليیيني نظره آلان "اکينچي" مؤليف‌لري بو احتيياجين عوثمانليداکي درسليکلر حسابينا اؤدنيلمه‌سيني تکليف ائديرلر. [8]
...اونسي‌زاده قارداشلارينين "کشکول" درگي‌سينده (1881) کيمليک آختاريشلاري ايستيقامتينده درج ائديلميش يازيلار آراسيندا محمد شاه‌تاختلي‌نين (محمد آغا شاه‌تاختينسکي، 1846-1931) بير مقاله‌سي ديقتي چکير. "بير آز دا اؤزوموزدن کي، آذربايجان تورکلريیيک دانيشاق" چاغيريشي ائدن مؤليف، ائتنوسون ياخين کئچميشي و حاضيرکي وضعيتي حاقيندا ماراقلي فيکير سؤيله‌يير: "بيز آذربايجان تورکلري روس ايستيلاسيندان اول اينديکي روس زاقافقازيياسي‌نين(جنوبی قافقازین) موستقيل و يئگانه صاحيبي ايديک. ايران، بيز ايديک. اينديکي وختده اهالي حسابينجا قافقاز قؤوم‌لرينين هاميسيندان چوخلوسو يئنه بيزيک. و هم‌ده اولسون ثروت و موکنتجه [قودرتجه] قونشولاريميزين هئچ بيريندن اسکيک دئييليک. بونونلا بئله هر نئجه اولوبسا-اولوب، بيز ايندي علم و معاريفجه قافقاز ميلتلرينين دالدا قالاني اولموشوخ." مؤليف حساب ائدير کي، "بعضي غرضکار بدخواه‌لارين ايديعالارينين عکسينه" بو گئريده قالميشليق بيزيم ميلتين دايمي خوصوصيتي دئييل. محمد شاه‌تاختلي قونشولارلا يارانميش فرقي آرادان قالديرماغين يئگانه يولونون علم و معاريفه ديقت يئتيرمکدن عيبارت اولدوغونو بيلديرير.[9] مؤليف عئيني مقاله‌ده عوثمانلي تورکجه‌سي ايله آذربايجان تورکجه‌سي (بعضن ده "آذربايجان ديلي" ايشله‌دير) آراسيندا موقاييسه آپارير و اونلاري عئيني ديلين موختليف لهجه‌لري حساب ائدير:"بيزيم ديل ايله عوثمانلي ديلي بير ديلدير. آرالاريندا اولان تفاووت آنجاق لهجه، يا عاوام ايصطيلاحينجا هنگ تفاووتدور." شاه‌تاختلي موقاييسه اوچون آلمان و فرانسيز ديللري داخيلينده موختليف لهجه فرقلريني اؤرنک گؤسترير. عوثمانليداکي تورکجه‌نين فرقلي اؤزلليیي اولاراق او، بو ديلده عرب و فارس سؤزلرينين چوخلوغونو، ائله‌جه ده بو ياد ديللرين قراماتيکاسينين تورکجه‌يه تاثير ائتديیيندن ناراحات اولدوغونو بيلديرير.
...علي بَي حسين‌زاده‌نين (1864-1940) "تورکلر کيمدير و کيم‌لردن عيبارتدير؟" باشليقلي 8 بؤلوملو سيلسيله مقاله‌سيني تورکچولویون کلاسيک نومونه‌سي سايا بيلريک. مؤليف تورکلرين کئچميشي حاقيندا تصوورلرين يانليش اولدوغونو، بو يانليشليغين يابانچي يازيلاردان قايناقلانديغيني بيلديرير. او، تورکجه مطبوعاتدا بئله "تورک و تاتارلارين مداري-ايفتيخاري بولونان چينگيزلره و تئيمورلارا داير ناروا سؤزلره راست گلينن" فيکيرلرين فرقينه وارماغا چاغيرير. علي بَيه گؤره، تاريخي کئچميشله باغلي مسله‌لرله ايندي دئييل، "بير نئچه عصر اولدن" مشغول اولماق لازيم ايدي و اونو گله‌جه‌یه ساخلاماق دوغرو دئييلدير. او دا حقيقتدير کي، ميللي تاريخ مسله‌سي "بير، يا ايکي فردين ايشي دئييلدير" ،بو پروبلئمين حلي اوچون "دارالفنون‌لار، مجليس‌لر، جمعيت‌لر مؤوجود اولمالي." مؤليف، آوروپا تورکولوگيياسي‌نين خئيلي ايره‌لي گئتديیيني، بير سيرا آکادئميک مسله‌لرين حلينه مووفق اولدوغونو يازير و بعضي تورکولوق و شرق‌شوناسين آديني چکير. داها سونرا عوثمانلي تورکلريندن شمس‌الدين سامي، نجيب عاصيم کيمي آراشديريجيلارين تشبوث‌لريني اؤرنک اولاراق گؤسترير. يئرلي تورکولوقلارين يئتيشمه‌ديیي بير يانا، خاريجي مؤليفلرين اثرلريني اوخويانلارين بئله اولماديغينا ديقت چکن علي بَي، ايچدن تأسوفلنديیيني بيلديرير.[10] علي بَي حسين‌زاده مقالهسينين سونراکي حيصه لرينده آذربايجان تورکلرينه "تاتار" دئمه‌یين يانليش اولدوغونو بيلديرير، تاتارلارين منشاييني ايضاح ائدير. اونلارين،موغوللارين بير حيصه سي اولدوغونو،آما غربه کوتلوي شکيلده کؤچ ائتمه‌ديکلريني بيلديرير. داها سونرا اسکي تورکلرين "صحنئيي-تاريخيييه‌يه ميلادي-عيسی‌دان 2000 ايل اول چيخديغيني" ،"بايکال جيواريندا اورخون و يئني‌سئي نهرلري سواحيلينده و آلتاي اتک‌لرينده ياشاميش" اولدوقلاريني قئيد ائده‌رک، آنتروپولوژي باخيمدان تورکلرين چئشيدلي تاثيرلره معروض قالديغيني اطرافلي ايضاح ائدير. مقاله‌نين نؤوبتي حيصه سينده حسين‌زاده اورال-آلتاي (توران) ديل قروپونون اؤزلليک‌لرينه کئچير، اونون سامي و هيند-آوروپا ديل قروپوندان فرقيني گؤسترير. او، ايسلامي قبول ائتديک‌لرينه و عرب‌لرله يوز ايللرله ياناشي ياشاديقلارينا باخماياراق، تورکلرين عربلشمه‌مه‌سي‌نين بيرينجي سببي اولاراق تورک ديلينين فرقلي اؤزلليیيني گؤسترير. اثرين سونراکي بؤلمه‌لرينده اسکي تورکلرين اينانيشلاريني، اونلارين اسکي مدنيتيني اَله آلان علي بَي حسين‌زاده، اورتا يوز ايللرده تورکلرين بؤيوک بير جوغرافييادا يازديغي مؤحتشم تاريخدن بحث ائدير. اونون بو اثري دؤورون تورکولوگييا علمي‌نين سون اوغورلارينا اساسلانير و جيدي سياسي اؤنمي واردير. ميللي مفکوره‌نين فورمالاشماسي باخيميندان علي بي حسين‌زاده‌نين "حيات"دا چاپ ائتديرديیي "بيزه هانگي علم‌لر لازيمدير؟" مقالهسينين ده بؤيوک اؤنمي اولموشدور.[11] محض بو مقاله‌سينده حسین‌زاده مشهور اوچلو دوستورونو – "تورک قانلي، ايسلام ايمانلي، فيرنگ قييافه‌لي اولاليم!" - فورموله ائتدي. فؤوق العاده اوغورلو ايفاده اولونموش بو دوستورو ميلتچي کسيم ميلتچي‌ليیين اساس شوعاري اولاراق قبول ائتدي، داها سونرالار ايسه بو ايدئولوژي-سياسي ايستيقامت‌لر – تورکچولوک، ايسلامچي‌ليق، چاغداشچيليق -موستقيل دؤولتين بايراغينداکي رنگلرده سيمووللاشدي (1918).
...احمد آغاوغلو (آغايئو، 1869-1939) آذربايجاندا تورکچولویون مؤحتشم نوماينده‌لريندندير. احمد بَي رئداکتورو اولدوغو "ايرشاد" قزئتينده (1906-7) ميلتچيليک (تورکچولوک) مؤوضوسوندا موذاکيره‌لر آچير. فرهاد آغايئو (اغازاد) ميلتچي‌لييه حصر اولونموش مقاله‌سينده "ميلتين ايستيقباليني تامين ائتمک اوچون بيرلشمک" گرکليیي و بونون اوچون ميلتچي‌ليیين يئگانه اويغون جريان اولدوغو فيکريني ايره‌لي سورور. ائله بوراداجا او يازير: "بير پاره دارولفنون‌لاردا تعليم تاپميش جاوانلار ميلتين بؤيله آغلار حالتيني گؤروبده اونون موهيم احتيياجلارينا اصلا ائعتينا ائتمه‌يوب، اؤزلريني آيري فيرقه‌لر، آيري پارتييالارا مولحق ائدييورلار."[12] فرهاد آغايئوين مقاله‌سينده‌کي فيکيرلر هارون سولطانوو آدلي بير "اينتئلليگئنتين" اعتيراضينا سبب اولدو. هارون سولطانووا گؤره، "ناسيوناليزم او وقت لازيم ايدي کي، بير ديلده، بير يئرده، بير عادتده اولانلاري ييغسين بير يئره... ناسيوناليزم بيزه هئچ لازيم دئييل، بيز ناسيوناليزمدن کئچميشيک." ميلتچيليیي ("ناسيوناليزم"ي) تنقيد ائدن مؤليف، آلتئرناتيو اولاراق سوسياليزم و ايسلامين گرکليیي فيکريني مودافيعه ائدير.[13]رئداکسييا بو موذاکيره‌نين واجيب اولدوغونو بيلديرير و اوخوجولاري موذاکيره‌يه قوشولماغا دعوت ائدير. فرهاد آغايئو اؤزو موذاکيره‌نين داوامي اولاراق بو مؤوضودا بير نئچه مقاله يازير. مقاله‌لرين بيرينده فرهاد آغايئو گؤستريردي: "... ها خياله دوشورم، ها ايمديکي موسلمانلارين نه‌اينکي ناسيوناليزمدن کئچيب اؤتمه‌ديیيني، حتّي ناسيوناليزمه گلوب چاتماديغيني دا موشاهيده ائده بيلمييوروم... يئنه باشا دوشه بيلمييورم کي، رفيقيميز [هارون سولطانوو] بو دونيادان خبر وئرييور، يوخسا آخيرتدن؟"[14] احمد بي آغايئو بير قدر سونرا اؤزو بو دارتيشمالارا قوشولوب، "ميلت و ميلتچيليک" باشليقلي دؤرد حيصه‌دن عيبارت مقاله يازدي. بو مقاله باکي مطبوعاتيني سوسياليزم ("آدميت") فيکرينه آلوده اولماقدا ايتيهام ائدن "ترجومان" قزئتينين بير مقاله‌سينه جاواب اولاراق يازيلميشدي. احمد بَي بو ايديعانين دوغرو اولماديغيني بيلديرير و ميلتچيليک حاقيندا اؤزونون باخيشلاريني ايضاح ائدير. او بيلديرير کي، "هر فردين عؤمرونده اولدوغو کيبي بير ميلتين عؤمرونده ده دؤوره‌لري وار. بو دؤوره‌لري کئچمک مجبوري بير عملدير." داها سونرا مؤليف آوروپا اؤلکه‌لريندن اؤيرنمه‌یين واجيب اولدوغونو دئيير، آوروپا تاريخينده ميلتچي‌ليیين اويناديغي موثبت قوروجولوق رولوندان بحث ائدير و گؤسترير کي: "... جومله ميلتلرين ان پارلاق مرحله‌لري همان "ميلتچيليک" دئييلن دؤوره‌لريدير! الان عوموم دونياني حئيرتده قويان، عوموم دونيايا حؤکم‌فرما اولان، او موشعشع [پارلاق]، او موقطع‌دير، اؤز علوم، صنايع‌سي ايله اوج-اعلی‌يا [يوکسک‌لره] چاتميش فرانساني، اينگيلتره‌ني، آلمانيياني، ايتاليياني بو عظمت، بو حشمته چيخاران همان ميلتچيليک، همان ناسيوناليزم دؤوره‌سي اولدو!"[15] احمد بَي باشقا مسله‌لرله ياناشي هر ميلتچي‌ليیين موثبت اولماديغي فيکرينده ده ايصرار ائدير.روسييادا پروشکئويچين ميلتچيليیي ايله تورگئنئوين ميلتچيليیي آراسيندا بؤيوک فرق اولدوغونو ايضاح ائدير. ائله بوراداجا او، اؤز ميلتينين عئيب‌لريني، باشقا ميلتلرين موثبت کئيفيتلريني گيزلتمه‌یي خيانت سايير: "حقيقي ميلتچي ميلتيني تنقيد ائتمکدن، ميلتينين عويوباتيني [عئيب‌لريني]، قوصوراتيني گؤرکزمکدن، ميلتينين آزارلاريني، دردلريني آريييب دا آچيق-آچيغا دئمکدن نه‌اينکي چکينمييورلر، بلکه بير آن بؤيله قافيل اولمييورلر. و همچنين حقيقي ميلتچيلر غئير ميلتلرين آراسيندا اولان گؤزل صيفتلري، گؤزل عادتلري، گؤزل بنالري [قوروملاري؟] اؤز ميلتي اوچون ايمتيثال ائدوب [اؤرنک بيليب]، ميلتيني بو گونه شئي‌لري اخذ ائتمه‌یه تحريک و تشويق ائتمکدن چکينمييورلر."[16]
...رسولزاده‌نين "آچيق سؤز" قزئتي (1915) اومتچي‌ليیين دئييل، ميلتچي‌ليیين (تورکچولویون) ميللي ائليتين شوعوروندا دومينانت-آپاريجي آخيما چئوريلديیي‌نين گؤستريجيسيدير. ميللي مطبوعاتدا ايلک دفعه قزئتين باشيندا "گونده‌ليک تورک قزئته‌سيدير" يازيلدي.
...عؤمر فايق نئمانزاده 1917-جي ايلده "من کيمم؟!" آدلي مقاله‌سينده يازيردي: "من ايديعا ائتمک دئييل، اوجا سسله باغيريرام کي، بيز اؤزوموزو تانيميريز، بيز اؤز ميلتيميزين بوش آديني بئله بيلميیيريز... ه، ائي تورک! ايستر داريخ، ايسترسه قاريخ، ياخاندان ال چکه‌جک دئييلم. سن هر شئيي اؤيرنمک ايسته‌ديیين حالدا نييه بيرجه زادي - يعني اؤزونو بيلمک ايسته‌ميرسن، نييه اؤز وارليغيندان، اؤز ووجودوندان، اؤز سوي و نسليندن خبرين يوخدور؟ نييه سنه "کيمسن؟" دئديکلري واخت حقيقي جاوابيندا عاجيز قاليرسان؟ نييه ساده‌جه دئيه بيلميرسن کي، من تورکم."[17]
آذربايجان دئموکراتيک رئسپوبليکاسي دؤورو (1918-20) ايلک دفعه اولاراق ميلتله دؤولتين بير-بيريني تاماملاديغي، دؤولتين تورکچولويه صاحيب چيخديغي بير دؤوردور. ميلتين و ميللي ديلين آدي رسمي‌لشدي؛ 1918-جي ايلين 27 اييونوندا ناظيرلر کابينئتي "دؤولتي ليسانين تورکجه اولماسي" حاقيندا قرار وئردي؛ ميللي تحصيل سيستئمينين قورولماسي ايشلري باشلاندي؛ پارلامان صدرينين موعاويني حسن بَي آغايئو اونا عونوانلانميش ديلکچه‌نين (ريزه‌نين) اوستونده يازميشدي: "عريضه تورکجه ليساندا اولماديغيندان انجامسيز قالير" ؛محمد باهارلي ايلک دفعه اولاراق ائتنوگئنئز مسله‌لريني آراشديردي.[18]
رسولزادنين "بولشئويک تورکچولویو دؤورو" آدلانديرديغي 1920-36-جي ايللرده تورکچولویون ايره‌ليده قالديرديغي بعضي پروبلئملر حلل ائديلدي، يا حلي ايستيقامتينده موهوم ايشلر گؤرولدو: ائتنيک کيمليیين (تورک ميلتي، تورک ديلي، تورک ادبياتي، تورک مدنيتي، تورک تئاتري و سایره.) تثبيتي، تحصيل سيستئمينين ميللي‌لشمه‌سي و اينکيشافي، ميللي ديلده تميزليک، ميللي ادبياتين و مدنيتين اينکيشافي و سایره. آنجاق بو پروسئس 1930-جو ايللرين اورتالاريندان داياندي، داها دوغروسو، بير سيرا ساحه‌لرده ترس يؤن آلدي. سووئت ديکتاتورو ایستالي‌نين امري ايله ميلتين، ديلين، ادبياتين، کولتورون و سایره آدي دَييشديريلدي؛ "تورک" آدينا تابو قويولدو؛ تاريخچي‌ليکده "آذربايجانلي" کونسئپتي قبول ائديلدي و وطنداشين تاريخ شوعورو قاريشديريلدي...
سووئت رئژيمينين سونلاريندا، اؤزلليکله پئرئسترويکا’دان باشلاياراق تورکچولوک يئنيدن جانلاندي، اسکي ايرثين منيمسه‌نيلمه‌سي اوچون موعين ايشلر گؤرولدو؛ يئني ايدئيالار و فيکير آداملاري مئيدانا چيخدي. اَن يئني دؤور تورکچولویون ليدئري ابولفضل ائلچي‌بَي درين معنالي دوستور ايره‌لي سوردو: "آذربايجان خالقي تورکلویونو درک ائتديکدن سونرا ميللي پروبلئملريني حلل ائتمه‌يه باشلاياجاق." ابولفضل ائلچيبَیين پرئزيدئنتليیي دؤورونده (1992-93) دئکولونيزاسييا سياستي چرچيوه‌سينده ايجتيماعي حياتين ميللي‌لشمه‌سي يؤنونده موهوم آدديملار آتيلدي؛ قوووه‌ده اولان آناياسايا اويغون اولاراق آذربايجان ديلينين دؤولت اورقانلاريندا ايشله‌ديلمه‌سي تامين ائديلدي؛ 1992-جي ايلين دئکابرين 22-ده ميللي مجليس "دؤولت ديلي حاقيندا قانون" قبول ائده‌رک، دؤولت ديلينين "تورک ديلي" اولماسي مسله‌سينده تاريخي عدالتين يئريني تاپماسيني تامين ائتدي؛ تحصيل سيتئمينين ميللي‌لشمه‌سينه باشلاندي؛ ميللي مکتب‌لرين ایستاتوسو و پوپوليارليغي آرتدي؛ کيريل عوضينده قبول ائديلميش لاتين قرافيکاسي ايله يئني درس کيتابلاري چاپ ائديلدي؛ تورک يئر آدلارينين برپاسي ايشي سورعتلندي؛ ميللي مجليس روسلاشديريلميش سوي‌آد سونلوق‌لارينين ("اوو" ،"يئو" کيمي) دَييشديريلمه‌سي‌نين آسانلاشديريلماسي قايدالاري حاقيندا قرار وئردي. آنجاق بو سورج اوزون چکمه‌دي، بير ايلدن سونرا ميللي حاکيميت دئوريلدي.
گونئيده ايسه تورکچولویون يئني مرحله‌سي ايسلام اينقيلابيندان (1979) سونرا باشلانميشدي. آنا ديلينده اونلارلا قزئت-درگي چيخدي، ميللي حياتين پروبلئملري اوزرينه يوزلرله مقاله يازيلدي. وارليق درگيسي يازارلاري باشدا دکتر جاواد هئيت اولماقلا يئرلي تورکچولویو علمي اساسلارا اوتورتدو، ميللي تاريخيميز عوموم‌تورک تاريخينين بير بؤلومو اولاراق اله آليندي، فارس عيرقچي‌ليیينه قارشي ايدئولوژي-مدني موباريزه جبهه سي آچيلدي. اون مينلرله اينسانين ایستاديونلاردا و باشقا ييغیناق يئرلرينده "هاراي، هاراي، من تورکم!" هايقيرتيلاري سپيلن توخوملارين وئريملي تورپاغا دوشمه‌سي‌نين گؤستريجيسيدير... [19]
بير سؤزله، تورکچولوک مئيدانا چيخديغيندان بو يانا يالنيز اوچ دفعه(!)، اؤزو ده ائپيزوديک اولاراق دؤولت سيياستينين اساسيني اولوشدوردو: آذربایجان دؤولت رئسپوبلیکاسی (1918-20)، ائلچي‌بَي حاکيميتي (1992-93) و 21 آذر (1945-46) دؤورلرينده. قالان واخت – روسييا ايمپئريياسي (تخمینن.1805 - 1917)، سووئت ايتتيفاقي (1920-1991)،کوسموپوليت-آوتوريتار علی‌يئولر ايقتيداري (1993-دن سونرا)، پهلوي‌لر (1925-79) و ايسلام جومهوريتي (1979-دان سونرا) زاماني تورکچولوک دؤولت حاکيميتينين باسقي‌لاري، بعضاً رئپرئسسييالاري آلتيندا اؤزونه يول تاپمالي اولدو. دراماتيک تاريخيميز آذربايجاندا تورکچولویون (ميللتچي‌ليیين) نظري جهتدن بيتکين‌ليک قازانماسينا دا ايمکان وئرمه‌دي. نظري جهتدن فورمالاشماسي بير يانا، بير نئچه نسيل اولکي تورکچولرين ياراتديغي ايرثه، اونلارين ميراثچي‌لاريندان ياديرغاديلدي، اَن اؤنملي‌سي ايسه اونلارين قارشييا قويدوغو پروبلئملرين اکثريتي بو گون ده قالماقدادير. گونوموز قوزئيده و گونئيده تورکچولویون، مثلا، ميللي مدنيت (کولتور) ساحه‌سينده اَن آکتوال وظيفه‌لري بونلار ساييلا بيلر:
تورک ميلتي، تورک ديلي، تورک ادبياتي، تورک کولتورو و سایره آنلاييشلارين برپا ائديلمه‌سي؛
دوغرو-دوزگون، اينانديريجي تاريخ شوعورونون فورمالاشديريلماسي؛
قوزئيده تحصيل سيستئمينين ميللي‌لشمه‌سي و چاغداشلاشماسي؛ گونئيده ميللي تحصيل سيستئمينين قورولماسي؛
ميللي ديلده تميزليک و ديلين اينکيشافي؛
اسکي ايدئولوژي-سياسي ايرثين (زردابي، احمد آغااوغلو، علي حسین‌زاده، علي مردان توپچوباشي، رسولزاده، ميرزا بالا محمدزاده و باشقالاری) منيمسه‌نيلمه‌سي؛
ميللي بيرليک فيکرينين (يئرليچيليک و طايفاچيليغين آلتئرناتيوي) فورمالاشديريلماسي؛
آدلارين و سويادلارين ميللي‌لشمه‌سي؛
آذربايجان جوغرافيياسي خاريجينده‌کي سويداشلارلا علاقه لرين گوجلنديريلمه‌سي؛
تورک دونياسينين بيرليیي شوعورو و سایره.
[1] ميرزا-بالا مئحمئت-زادئ، ميللي آذئربايجان حارئکئتي. ميللي آذ. "موساوات" حالک فيرکاسي تاريحي، بئرلين: فيرکا ديواني، 1938، ص. 21.
[2] آذربايجانين تورکچولوک و آذربايجانچيليق پروبلئملري، باکي: آي-اولدوز، 1998، 160 ص.
[3] مثلن، باخين: H. Kohn, Prelude to Nation-States. The French and German Experience, 1789-1815, NJ: Princeton, 1967; C. Tilly (ed.), The Formation of National States in Western Europe, NJ: Princeton, 1975; Peter Alter, Nationalism, London etc.: Edward Arnold, 1985 (özəlliklə,4-cü bölüm); Anthony Smith, The Ethnic Origins of Nations, Oxford, 1986; John Stoessinger, The Anatomy of the Nation-State and the Nature of Power, in Richard Little and Michael Smith (ed.), Perspectives on World Politics, London and NY: Routledge, 1992, pp. 23-35; Orhan Türkdoğan, Türk Ulus-Devlet Kimliği, İstanbul: İQ, 2005.
[4] گئنيش بيلگي اوچون، مثلن، باخين: http://www.gunaz.tv/aze/14/articleCat/1/articleID/2345-AZERBAYCANDA-TURK-VARLIGI-Siyasi-ideoloji-terefi-1.html/inner/1
[5] اکينچي. 1875-1877. تام متني. ترانسليتئراسيا و ترتيب ائدني توران حسنزاده، باکي: آوراسيا پرئس، 2005، ص. 26.
[6] اکينچي، ص. 83.
[7] يئنه اورادا، ص. 274.
[8] يئنه اورادا، ص. 161-162.
[9] کشکول، 13 مارت 1891، سايي 118.
[10] علي بَي حسین‌زاده، سئچيلميش اثرلري،ترانسليتئراسييا و ترتيبي اوفئلييا بايراملي‌نيندير، باکي: چاشي‌اوغلو،2007، س. 312-313.
[11] حيات، 8 اييون 1905، ن 2
[12] فرهاد آغايوف، هانسي عقيده‌ده اولماليييز، ايرشاد، 14 آوقوست 1906، ن 191، س. 3.
[13] هارون، ناسيوناليزم، ايرشاد، 8 سئنتيابر 1906، ن 211، س. 2-3.
[14] فرهاد آغايوف، هانسي مومکوندور؟ ايرشاد، 11 سئنتيابر 1906، ن 213، س. 2. علاوه اولاراق باخين: فرهاد آغايوف، ناسيوناليزم و باکو قزئته‌لري، ايرشاد، 27 سئنتيابر 1906، ن 227، ص. 2.
[15] احمد بَی آغايئف، ميلت و ميلتچيليک، ترقي، 22 يانوار 1909، ن 16، ص. 2.
[16] يئنه اورادا، 26 يانوار 1909، ن 19، ص. 2.
[17] آذربايجان پوبليسيستيکاسي‌نين آنتولوگيياسي. ترتيب ائدن جلال بَيديلي (ممدلوو)، باکي: شرق-غرب، 2007، ص. 443، 447.
[18] باخين: http://www.gunaz.tv/aze/14/articleCat/1/articleID/2345-AZERBAYCANDA-TURK-VARLIGI-Siyasi-ideoloji-terefi-1.html/inner/1
[19] مثلن، باخين: http://www.gunaz.tv/aze/14/articleCat/1/articleID/2326-DR-ZEHTABININ-CURUTMESI.html/inner/1; http://www.gunaz.tv/aze/14/articleCat/1/articleID/2315-VARLIQ-MEKTEBI.html/inner/1; http://www.gunaz.tv/aze/14/articleCat/1/articleID/2313-HESEN-RASIDININ-SORUSDURMASI.html/inner/1;http://www.gunaz.tv/aze/14/articleCat/1/articleID/2292-TEBRIZLI-ELININ-HARAYI.html/inner/1
تورکچولویوموزله آذربايجانچيليغيميز (2 )/ پروفسور نصیب نصیبلی
تورکچولویوموزله آذربايجانچيليغيميز (2 )/ پروفسور نصیب نصیبلی
آذربايجانچيليق ندير؟
قاجار ايرانيندان قوپارديلاندا قوزئي آذربايجان فئودال-خانليق بؤلونموشلویونو ياشاماقدا ايدي، هله ميلتلشمه سورجي باشلاماميشدي، بوتؤو وطن آنلاييشي يوخ ايدي. قارشيسيندا بيتکين‌لشميش ميللي دَيرلر سيستئمي بولماديغيندان رومانوولار روسيياسي‌نين بورادا سياستي، پروسئسي يؤنلنديرمکده زورلوق چکمه‌دي. روس حؤکومتي بوراني باکي، يئليساوئتپول (گنج) قوبئرنييالاري(والی‌لیک‌لری) و زاکاتال دايره‌سينه بؤلدو، "آذربايجان" آنلاييشينا اساسن ائتنوقرافيک آراشديرمالاردا راست گلمک مومکون ايدي. اون دوققوز يوز ايلين 30-40-جي ايللرينده کئچميش خانليقلارين تاريخيني يازماق سيفاريشي آلميش يئرلي مؤليف‌لر، حتّي عباس‌قولو آغا باکيخانوو بئله آرازدان قوزئيده‌کي تورپاقلاري آيري-آيري ايالت آدلاري ايله قئيد ائديرلر. روس يازارلاري‌نين بعضي‌لرينين "آذربايجان"ي يالنيز قاجار ايرانين قوزئي-باتيسينا عاييد ائتمه‌لري ده روس سيياستينين بوراني (قوزئي آذربايجاني) روسييا ايمپئريياسينين داخيلي قوبئرنيياسينا چئويرمک ایستراتئژيسيندن قايناقلانيردي. روس سيياستينين باشقا، داها اؤنملي اؤزلليیي ايسه بورانين اهالي‌سيني ايران و عوثمانليدان ياديرغاتماق و اوزاقلاشديرماق ايدي. بو سيياستين ايلک آدديملاري قراف وورونتسووون قافقاز جانيشين‌ليیي دؤورونده (1844-54) آتيلدي. اونون ميرزا فتحعلي آخوندزاده‌يه درام اثرلريني يئرلي دانيشيق ديلينده يازماقدا ايصرار ائتمه‌سي فاکتي بللي گئرچکليکدير. سونراکي ايللرده ده موستملکه حاکيميتي بورادا پارتي‌کولياريزمين (ايالتچي‌لي‌یين) آرتماسينا چاليشدي. يئني ياراديلماقدا اولان آيدين کسيمين ايالتچي‌ليک مئيللري دستکلندي. بو کسيمين اورتاق ادبي تورکجه‌دن فرقلي يئرلي ادبي ديل ("آذربايجان ديلي") ياراتماق مئيلي محض بو سيياستين تاثيري ايله ياراندي.
"خالقلار حبس‌خاناسي" روس ايمپئريياسينين چؤکمه‌سيندن (1917-جي ايلين فئورالي) سونرا يارانميش نيسبي ليبئرال شراييط آذربايجانين ميللي قوووه‌لرينه اراضي موختاريتي شوعاريني اورتايا آتماق ايمکاني وئردي. قافقاز موسلمانلاري قورولتاييندا (1917-جي ايلين آپرئلي)، عوموم‌روسييا موسلمانلاري قورولتاييندا (ماي)، غئيري-روس خالقلارين کييئو قورولتاييندا (اييون) ميللي-دئموکراتيک قوووه‌لرين آذربايجانا گئنيش اراضي-ميللي موختاريت طلبينه اويغون قرارلار وئريلدي. همين ايلين اوکتيابريندا موساوات پارتيياسينين ايلک قورولتاييندا قبول ائديلميش يئني پروقرامدا يازيلميشدي: "فيرقه طرفيندن آذربايجان، تورکوستان، قيرغيزيستان، باشقيرديستان کيمي تورک اؤلکه‌لري محللي موختاريت آلماليديرلار."[1] آما روسييانين يئرلي نوماينده‌لري ميللي قوووه‌لره موختاريت يئرينه "خارابازار" وعد ائدير، حتّي "آذربايجان" آديني بئله قبوللانا بيلميرديلر.[2] سياسي پروسئس‌لرين سونراکي گئديشاتي بلليدير: محض عوثمانلي‌نين بيرباشا ايصراري و تضييقلري ايله گونئي قافقازين روسييادان باغيمسيزليغي ائعلان ائديلدي (1918-اين آپرئلي)؛ آنجاق موستقيل زاقافقازييا(جنوبی قافقاز) فئدئراسيياسي اوزون ياشامادي؛ مايين 26-دا گورجوستان فئدئراسييادان چيخديغيني ائعلان ائتدي؛ آذربايجان ميللي شوراسي بو دفعه يئرلي ايلحاقچيلارين موقاويمتيني قيراراق مايين 28-ده آذربايجانين ايستيقلالي حاقيندا مشهور بياننامه‌ني ائعلان ائتدي؛ تاريخده ايلک دفعه اولاراق "آذربايجان" آدلي دؤولت ياراندي، اونون سرحدلري جيزيلدي.[3] سونرالار محمد امين رسولزاده يازاجاقدي: "روسييا ايداره‌سينده‌کي موسلمانلارا "تورک" دئديرتمک ايندي آرتيق قازانيلميش بير داوادير. يالنيز "تورک" کلمه‌سي دئييل، "آذربايجان" آدي دا قازانيلميشدير"[4] 1918-20-جي ايللرين قازانجلاري سيراسينا قوزئي آذربايجانين سرحدلرينين بليرلنمه‌سي و مودافيعه‌سيني ده بونلارا آرتيرماق اولار.
بو آرادا قاجار ايراني "آذربايجان" آديندا دؤولتين يارانماسينا منفي موناسيبتيني گيزلتمه‌دي. تئهران، "آذربايجان" دؤولتيني، ائله‌جه ده آديني اؤزونون وارليغي اوچون تهلوکه بيلديیيندن ايلک اؤنجه اونو تانيماقدان ايمتيناع ائتدي، پاريس صولح کونفرانسيندا حتّي "قديم ايران تورپاغي" اولدوغو اوچون بو تورپاقلارين اونا بيرلشديريلمه‌سيني طلب ائتدي، آنجاق سونرا "قافقاز آذربايجاني" ايله ايکي‌طرفلي موناسيبتلر قوردو.[5] داها سونرالار تاريخين بو فاکتي فارس عيرقچيلرينه آرازدان قوزئيده‌کي تورپاقلارين "آذربايجان اولماديغيني" ثوبوت ائتمک اوچون لازيم اولاجاقدي.[6]
قوزئي آذربايجانين ايکينجي دفعه ايشغاليندان سونرا (1920-جي ايلين 27 آپرئلي) يئني دؤولت قورومونون اوستونده‌کي"آذربايجان" آدي قالدي، آنجاق اسکي فرانسيز تيپلي موستملکه رئژيمي (بيرباشا ايداره‌چيليک) يئني اينگيليس تيپينه (دولايلي ايداره‌چيليک) دَييشدي؛ چاريزم دؤورونده پلانلانان ايشلر سووئت دؤورونده داها آرديجيل و غدار شکيلده داوام ائتدي. هم ده يئرلي کومونيست عونصورلرين فعال ايشتيراکي ايله. سووئت آذربايجاني تورپاقلارينين بير حيصه‌سي (زنگه‌زور، گؤيچه، بورچالي‌نين اورتا زولاغي، قارايازي) قونشولارا وئريلدي، اوسته‌گل بورادا "ساعاتلي بومبا" - ائرمني موختاريتي ياراديلدي.
سووئت رئژيمينين آزاد ايدئولوژي حياتا سون قويماسينا باخماياراق، يئني شراييطده اينکيشاف ائدن مدنيت، ايلک اؤنجه ادبيات يئني نسيلده وطنچيليک دويغولارينين گوجلنمه‌سينه ندن اولدو. گونئيده 21 آذر حرکاتي بو دويغولارين آرتماسينا علاوه ایستيمول وئردي. ميللي شوعورون، عوموميتله، ميلتچي‌ليیين ييپرانماسينا باخماياراق، آذربايجان وطنداشلاريندا وطن دويغوسو (وطن‌پرورليک روحو، پاتريوتيزم) يوکسلدي. ميللي فيکرين داشيييجي‌سي اولان، عئيني زاماندا اونو گليشديرمک ميسيياسينا يوکوملو اولان آذربايجان موهاجيرتي بو يئني گئرچکليیين فرقينده ايدي. موساوات پارتيياسينين 1936-جي ايل تاريخلي يئني "پروقرام اساسلاري"ندا تورکچولوکله آذربايجانچيليق بير-بيريني تاماملايان وحدت حاليندا عکسيني تاپدي: "بؤيوک تورکلويه منسوب بير مملکت اولماسي حسبي ایله [سورتي ایله] آذربايجان، ديگر تورک ائللري ايله کولتورل صورتده باغليدير. بو باغليليغين بوندان اول اولدوغو کيمي بوندان سونرا داهي [دا] قورونماسيني موساواتچيليق جيديتله مودافيعه ائدر... آذربايجان، قديم زامانلاردان بري تاريخين موختليف دؤورلرينده کندينه مخصوص سياسي وارليق گؤستره‌رک موستقيل دؤولت حاليندا ياشاميشدير. آذربايجان خالقي ايسه عصري ميلت اولماق اوزره، زنگين بير کولتور حياتينا ماليک بولونموش و بونون منطيقي نتيجه‌سي اولاراق سياسي بير ايدئال داشيميشدير."[7]
يوخاريدا آدي چکيلن "بومبا" سووئتلرين ضعيفله‌ديیي سون دؤورده پارتلاديلدي و 1987-جي ايلدن سونرا ائرمنيستانين مشوم تجاووزو ("قاراباغ پروبلئمي") باشلادي. ائرمنيستانين تجاووزونو دف ائده بيلمه‌ين آذربايجان، بؤهران دؤورونه گيردي. دؤولتين تورپاق بوتونلویونون پوزولماسي بؤهران کيمي قبول ائديلمه‌سه ده بو، داوام ائتمکده‌دير.
گونئيده ده "آذربايجان" مفهومو و اونون جوغرافيياسي اون ايللرله پهلوي و ايسلام جومهوريتي رئژيملرينين باسقي‌سينا معروض قالدي. 1937-جي ايل يئني اراضي-اينظيباطي بؤلگوسونه گؤره، آذربايجانين خئيلي حيصه سي 3-جو و 4-جو اوستانا (يالت) بؤلوندو، قالان حيصه لري قونشو اوستانلارا قاتيلدي.اوستانلارين آدينداکي تاريخي آدلار گؤتورولدو. زنجان، قزوين، ساوه، سولطان آباد و همدان بو اوستانلاردان کناردا قالدي. داها سونرالار (1941) بيجار 4-جو، آستارا ايسه 3-جو اوستاندان قوپاريلدي. ايسلام جومهوريتينين حاضيرکي اراضي-اينضيباطي بؤلگوسونه گؤره، تورکلرين کومپاکت مسکون اولدوغو ائتنيک زونادا شرقي آذربايجان، غربي آذربايجان، اردبيل، زنجان، همدان، تئهران، مرکزي (اراک)، قوم، البرز (قزوين) اوستانلاري ياراديليب. بو جور بؤلونمه گونئيلي‌لرده وطن دويغوسونون ("بوتؤو آذربايجان") دولغونلاشماسينا مانع اولور. او بيري ياندان، کوردلرين کومپاکت ياشاديقلاري بعضي تورپاقلار غربي آذربايجان اوستاني ترکيبينه قاتيلميشدير. اوسته ليک، سون 20-30 ايلده بو اوستانين اهاليسي سورعتله و دورمادان کوردلشديريلمکده‌دير. بو، گله‌جکده يئني "قاراباغلارين" اورتايا چيخماسي اوچون اويغون اورتام يارادير.
گونئيلي‌لرين آذربايجانچيليق فيکرينه ياناشماسيندان بحث ائدرکن بير موهوم مسله‌يه موناسيبتيميزي بيلديرمه‌يه گرک وار. داها دوغروسو،تورکچو يازارلارين بير بؤلومونون بوتون ايراني وطن سايمالاري سببي اوزرينده دورماق گرکدير. بيزجه، بو ياناشماني آشاغيداکي دليل‌لرله ايضاح ائتمک اولار. 1) ايراندا آذربايجان/تورک مسله‌لرينه حصر ائديلميش کيتاب و مقاله‌لرين يازارلاري، "تجزيه-طلبليک"ده (بؤلوجولوکده، سئپاراتيزمده) ايتتيهام اولونماماق اوچون بو "قورويوجو کمر"دن ايستيفاده ائتمک مجبوريتينده‌ديرلر؛ 2) تاريخي آذربايجاندان کناردا مسکونلاشميش تورکلرين (شيراز اطرافينداکي قاشقاي تورکلري کيمي) وارليغي؛ سون 50-60 ايلده ميليونلارلا تورکون آذربايجاندان ايرانين باشقا يئرلرينه کؤچمه‌سي، آذربايجانداکي تورکلرين ايراندا ياشايان تورکلرين ياريدان آزينا چئوريلمه‌سي؛ "آذربايجان آيريلسا، قالان سويداشلاريميزين طالعيي نئجه اولاجاق؟" انديشه‌سي؛ 3) سون مين ايلده ايران دؤولتينين ياشاماسيندا تورکلرين، خوصوصن حاکيم تورک خاندانلارينين موهوم رولو؛ گله‌جک ايراندا فارس ديلي ايله ياناشي تورکجه‌يه ده رسمي دؤولت ديلي ایستاتوسونون وئريلمه‌سي ايسته‌یي؛ "ايراني بيز ياشاتديق، بيز اونا حاکيم اولدوق، ايندي نييه اونو فارسلارا وئرک؟" ايديعاسي.
بيرينجي دليل، يا سبب منطيقه اويغوندور، اونون اوزرينده دورماغا دَيمز. ايکينجي دليله گلديکده، دونيادا ميللي دؤولت سرحدلريندن کناردا ميليونلارلا سويداشي، يا اسکي وطنداشي اولان اؤلکه‌لر وار. بو دؤولتلرين وارليغي، سرحدلري کناريندا قالان سويداشلارين ایستاتوسونون يوکسلمه‌سينده ان حساس فاکتور رولونو اويناماغا قاديردير. ائتنوسون ميللي دؤولت ايچينده‌کي و خاريجينده‌کي حيصه لري آراسيندا سيخ ايش‌بيرليیي‌نين ياراديلماسي ايسه يالنيز تئخنيکي پروبلئمدير. آذربايجاندان کناردا ياشايان تورکچو اينسانلارين بير قيسمينده "آذربايجانچيليق" دويغوسونون اولماماسي، يا ضعيفليیي، بيزجه، غئيري-عادي حاديثه کيمي قارشيلانماماليدير.
اوچونجو دليل. گله‌جک ايرانين آوسترييا-ماجاريستان ايمپئراتورلوغو، يا چئخوسلوواکييا کيمي بير "دوعال دؤولت"ه چئوريلمه‌سي چاغديشي بير ايستک اولا بيلر. چونکي 1) ايران اسکي ايمپئرييا خاراکتئريني ساخلاماقدادير، ایييرمي و ایييرمي بير يوزيللر اوچون ايمپئرييالارين يئنيدن قورولماسي دئييل، داغيلماسي خاراکتئريکدير؛ 2) ايران اهاليسي يالنيز فارسلاردان و تورکلردن عيبارت دئييل، گله‌جک ايراندا باشقا خالقلارين دا حاقلارينين تاميني، بو سيرادان اونلارين ميللي ديللرينه رسمي ایستاتوسون وئريلمه‌سي طلب ائديلير؛3) تورک خاندانلاري ايرانا حاکيم اولموشلار (بوگونکو ايران/فارس دؤولتينين باشيندا دوران آيت الله خامنه‌اي کيمي)، آنجاق تورکلر حاکيم ائتنوس/ميللت اولماميشلار؛ 4) تورکلر يالنيز آذربايجاندا چوخلوقداديرلار (تئهران ايستيثنا اولا بيلر)، آذربايجان سرحدلرينين خاريجينده ياشايان تورکلر آزليقداديرلار، يئرلي اهالي ايله رقابت آپاراجاق گوجه صاحيب دئييللر؛ 5) گونئي آذربايجانين گله‌جه‌یيني پايلاشا بيله‌جه‌یي اَن اويغون اؤلکه قوزئي آذربايجاندير و سایره "ايرانا حاکيم اولاجاغيق" خولياسي ايله ياشايانلارا بير تاريخي فاکتي خاطيرلاتماق فايدالي اولا بيلر.گنج شاه ايسماعيلين "آتا" کيمي خطاب ائتديیي سولطان ايکي بايزيد،گؤندرديیي مکتوبوندا اطرافيني بوروموز فارسلاري گؤز اؤنونه آلاراق اونا اؤيود وئريردي: "فارسلار مسله‌سينده احتياطلي اول، اونلار اؤزلريندن اولمايان حؤکمدارلارا ايطاعت ائتمه‌ين بير خالقدير."[8]
بئله‌ليکله، قوزئيده و گونئيده وطنچيليک، دؤولتچيليک کيمي قاورانيلان، يا قاورانيلمالي اولان آذربايجانچيليغين قارشيسيندا دوران وظيفه‌لرين اوست-اوسته دوشن و فرقلي طرفلري وار. قوزئيده آذربايجانچيليغين اساس وظيفه‌لريني آشاغيداکي کيمي سيرالاماق اولار:
- آذربايجان رئسپوبليکاسينين تورپاق بوتونلویونون برپاسي؛
- آذربايجان رئسپوبليکاسي دؤولتينين دئموکراتيکلشمه‌سي؛
- اونيتار آذربايجان رئسپوبليکاسيندا ائتنيک آزليقلارلا اويومون تامين ائديلمه‌سي؛
- بوتؤو آذربايجان (قوزئي، گونئي، بورچالي، دربند) شوعورونون فورمالاشديريلماسي؛
- تورک دونياسينا اينتئقراسييا و سایره
گونئيده آذربايجانچيليق مفکوره‌سينين طلبلريني آشاغيداکي کيمي فورموله ائتمک اولار:
- ايراندا تورک ائتنيک زوناسينين و گونئي آذربايجانين سرحدلرينين بليرلنمه‌سي؛
- ايران دؤولتي داخيلينده آذربايجان اوستانلارينين بيرلشديريلمه‌سي؛
- گونئي آذربايجانين موختاريتي، يا ايستيقلالي ايدئالينين گئرچکلشديريلمه‌سي اوغروندا موباريزه؛
- بوتؤو آذربايجان (قوزئي، گونئي، بورچالي، دربند) شوعورونون فورمالاشديريلماسي؛
- تورک دونياسينا اينتئقراسييا و سایره
تورکچولوک نه دئييلدير؟
1993- جو ايلين اييونوندا قوزئي آذربايجاندا حاکيميته قاييدان کومونيست نومئنکلاتورا(اصطلاحات) اؤزو ايله اسکي سياسي داورانيش طرزيني و کوسموپوليت-آوتوريتار دوشونجه سيستئميني گتيردي. يئني حاکيميت اسکي‌سيني ايدئولوژي جهتدن گؤزدن سالماق اوچون يئني "ميللي ايدئيا" آختاريشينا چيخدي. ميللي حاکيميتين(آذربایجان خالق جبهه‌‌سی حاکيميتينين) ايدئولوژي داياقلاريني سؤکمک اوچون تورکچولویو قارالاماق گرکدي. ايلک مقاله پرئزيدئنت آپاراتينين او واختکي شؤعبه موديري، فلسفه علملري ناميزدي (ايندي پرئزيدئنت آدمينيستراسيياسينين رهبري، آکادئميک) راميز مهدي‌يئودن گلدي. "تورکچولوک تاريخين گؤزو ايله، ياخود ميللي ايدئيا عصرلرين قوووشوغوندا" باشليقلي گئنيش، سيلسيله مقاله‌ده[9] عوثمانليدا و آذربايجاندا تورکچولوک حرکتي‌نين تاريخي تحريف ائديله‌رک او، "معناسيز و پئرسپئکتيوسيز" ايدئولوژي-سياسي جريان ائلان ائديلدي. بو مقاله‌ده آذربايجانچيليغين سونراکي ايللرده ده موختليف مؤليفلرين موختليف فورمالاردا تيراژلاديغي رسمي ايضاحي وئريلدي: "آذربايجانچيليق" خالقيميزين چوخ عذاب-اذيتلردن سونرا ياراتديغي تاريخي ديردير، رئال موستقيللييه نايل اولماق، واحيد، بؤلونمز، اونيتار آذربايجاني قورويوب ساخلاماق واسيطه‌سيدير. بو گون "آذربايجانچيليق" ميللي حياتين آهنگدارلي‌غينين چوخسرليک عنعنه سي، ديياريميزدا ياشايان بوتون ميلتلرين و ائتنيک قروپلارين قارداشليغي، بيرگه فعاليتي و قارشيليقلي تاثيرينين تاريخي، عومومي طالعيي آذربايجانين بوتؤولویونو قوروماق اوغروندا اونلارين بيرگه موباريزه‌سينين تاريخي تجروبه‌سيدير. بو، آذربايجان خالقينين حياتي معنافعي‌نين وحدتي، اونون دئموکراتييا و ترققي اوغروندا موباريزه‌سينين غايه‌سيدير. "آذربايجانچيليق" قارشيليقلي يارديم، امکداشليق و حوقوق برابرليیي پرينسيپلرينين اساسيني تشکيل ائدير، اونلارين پوزولماسينا سبب اولا بيلن بوتون حاللارا قارشي باريشماز مؤوقع توتور."[10]
بو و بوندان سونراکي مقاله و کيتابلارين اساس ماهيتي "يئني ميللي ايدئيا"دان تورکچولويه آلتئرناتيو ياراتماقدير. حالبوکي بو، منطيقه اويغون دئييل، چونکي بو آخيملار بير-بيرينه قارشي دئييل، عکسين، اونلار بير-بيريني تاماملايير. اصلينده آوتوريتار رئژيمين سياسي مقصدي يالنيز موخاليفتده‌کي ميللي-دئموکراتيک قوووه‌لري دئييل، بوتون ميلتي سيياست صحنه‌سيندن ووروب چيخارتماقدير. بونا دا نايل اولوب. بو، بوتون آوتوريتار رئژيملره خاص اولان خوصوصيتدير. آوتوريتار رئژيملر يئريني مؤحکملتديکجه، ميلت (يا ليبئراليزمين ايفاده ائتديیي کيمي "وطنداش جمعيتي") ضعيفله‌يير و ميلتچيليک ايدئولوژي-سياسي جريان کيمي گؤزدن سالينير. چوخ دوشوندوروجودور کي، بو گون هئچ بير رسمي سندده "ميلت" آنلاييشي و اونون تعريفي يوخدور. حتّي آذربايجان رئسپوبليکاسينين کونستيتوسيياسيندا اونلارلا "ميللي" صيفتي وار، بيرجه "ميلت" سؤزونه بئله راست گلمک مومکون دئييل.
1995- جي ايلده ايقتيدار اسکي "آذربايجان ديلي" آنلاييشي‌نين يئر آلديغي يئني آناياسا (کونستيتوسييا) لاييحه‌سي حاضيرلادي. محض بو مسله‌نين يؤنلنديريلن "موذاکيره‌سي" زاماني ميللي آيدينلارين گتيرديکلري علمي-تاريخي دليللر هئچ ساييلدي. اونلارين تکليف ائتديیي واريانتلارين – تورک ديلي، آذربايجان تورک ديلي، آذربايجان (تورک) ديلي- هئچ بيري کئچمه‌دي. اسکي نومئنکلاتور بوروکراتييا و ضياليلارين راحاتسيزليغي اساس گؤتوروله‌رک، ميللي وارليغين يوسيف ایستالين وئرسيياسي برپا ائديلدي. بو "موذاکيره"ده سسلنديريلن و توپلومدا يئر آلان "راحاتسيزليق"لاردان بعضيلرينه قيسا نظر سالاق.
"تورکچولوک آذربايجانين گله‌جه‌یيني تهلوکه‌يه سالير، غئيري-تورکلرده سئپاراتيست احوال-روحيييه يارادير". حالبوکي آذربايجان تورکلرينين ميللي شوورا صاحيب اولماسي آذربايجانين بوتؤولویو و گله‌جه‌یي اوچون ضروريدير. قاراباغ پروبلئمينين يارانماسي و آشاغي-يوخاري 25 ايل قالماسينين سببلريندن بيريسي ده آذربايجان تورکلرينده ميلتلشمه سورجينين باشا چاتماماسيدير. باشقا ائتنيک آزليقلارين (تاليشلار، تاتلار، لزگي‌لر و باشقالاری) اؤلکه‌نين ائتنيک چوخلوغونون اؤز آدينا صاحيب اولمالاريندان ناراحاتچيليقلاري يئرسيزدير، داها دقيقي - عدالتسيزليکدير. آذربايجانداکي ائتنيک واحيدلرين هاميسي‌نين اؤز رسمي آدي وار (تورکلردن باشقا)، اونلاري بير يئرده توتا بيلن آنلاييش دا وار - "آذربايجان خالقي" ،
"آذربايجان اهالي‌سينين اکثريتينين ديلينه تورک ديلي دئمک اونلارين ميللي کيمليیيني گيزله‌دير." باشقا سؤزله، "آذربايجان ديلي تورکيه‌ده ايشله‌ديلن تورکجه‌ده ارييه‌جک" تئزيسينين هئچ بير اساسي يوخدور. عئيني آددا ديله ماليک اولان اونلارلا اينگيليس‌ديللي، ايسپان‌ديللي، آلمان‌ديللي اؤلکه وار و اونلارين هئچ بيرينين "ميللي کيمليیي گيزلنمير."
"نه فرقي وار، آذربايجان ديلي اولسون، يوخسا تورک ديلي؟" فرقيني يوخاريدا ايضاح ائتديیيميز سياسي سبب‌لرده آختارماق لازيمدير. بو سببلرين باشيندا دا موسکووا و تئهرانين آذربايجاني تورک دونياسيندان آييريب، اونا "يئتيم" ،"يئسير" پسيخولوگيياسي آشيلاماقدير. "آذربايجان ديلي" لينقوونيمينين 1936-جي ايلدن و 1995-جي ايلدن سونرا 73 ايلليک (56+17) تاريخي وار. بس يوز ايللرله اؤلچولن "تورک ديلي"نين تاريخيني نه ائدک؟ او بيزيم کئچميشيميز دئييلمي؟ميلتين موطلق اکثريتي (گونئي، ايرانين باشقا ايالتلري، آوروپا، آمئريکادا) دانيشديغي ديله "تورک" دئيير. ميللي چوخلوقدان قوزئي آذربايجانداکيلاري قوپارتماق بؤلوجولوکدور.
"آذربايجانلي، آذري، آذري-تورک، آذربايجان تورکو کيمي ائتنونيم
No comments:
Post a Comment