پروفسور نصیب نصیبلی
آذربايجانچيليق ندير؟
قاجار ايرانيندان قوپارديلاندا قوزئي آذربايجان فئودال-خانليق بؤلونموشلویونو ياشاماقدا ايدي، هله ميلتلشمه سورجي باشلاماميشدي، بوتؤو وطن آنلاييشي يوخ ايدي. قارشيسيندا بيتکين‌لشميش ميللي دَيرلر سيستئمي بولماديغيندان رومانوولار روسيياسي‌نين بورادا سياستي، پروسئسي يؤنلنديرمکده زورلوق چکمه‌دي. روس حؤکومتي بوراني باکي، يئليساوئتپول (گنج) قوبئرنييالاري(والی‌لیک‌لری) و زاکاتال دايره‌سينه بؤلدو، "آذربايجان" آنلاييشينا اساسن ائتنوقرافيک آراشديرمالاردا راست گلمک مومکون ايدي. اون دوققوز يوز ايلين 30-40-جي ايللرينده کئچميش خانليقلارين تاريخيني يازماق سيفاريشي آلميش يئرلي مؤليف‌لر، حتّي عباس‌قولو آغا باکيخانوو بئله آرازدان قوزئيده‌کي تورپاقلاري آيري-آيري ايالت آدلاري ايله قئيد ائديرلر. روس يازارلاري‌نين بعضي‌لرينين "آذربايجان"ي يالنيز قاجار ايرانين قوزئي-باتيسينا عاييد ائتمه‌لري ده روس سيياستينين بوراني (قوزئي آذربايجاني) روسييا ايمپئريياسينين داخيلي قوبئرنيياسينا چئويرمک ایستراتئژيسيندن قايناقلانيردي. روس سيياستينين باشقا، داها اؤنملي اؤزلليیي ايسه بورانين اهالي‌سيني ايران و عوثمانليدان ياديرغاتماق و اوزاقلاشديرماق ايدي. بو سيياستين ايلک آدديملاري قراف وورونتسووون قافقاز جانيشين‌ليیي دؤورونده (1844-54) آتيلدي. اونون ميرزا فتح‌علي آخوندزاده‌يه درام اثرلريني يئرلي دانيشيق ديلينده يازماقدا ايصرار ائتمه‌سي فاکتي بللي گئرچکليکدير. سونراکي ايللرده ده موستملکه حاکيميتي بورادا پارتي‌کولياريزمين (ايالتچي‌لي‌یين) آرتماسينا چاليشدي. يئني ياراديلماقدا اولان آيدين کسيمين ايالتچي‌ليک مئيللري دستکلندي. بو کسيمين اورتاق ادبي تورکجه‌دن فرقلي يئرلي ادبي ديل ("آذربايجان ديلي") ياراتماق مئيلي محض بو سيياستين تاثيري ايله ياراندي.
"خالقلار حبس‌خاناسي" روس ايمپئريياسينين چؤکمه‌سيندن (1917-جي ايلين فئورالي) سونرا يارانميش نيسبي ليبئرال شراييط آذربايجانين ميللي قوووه‌لرينه اراضي موختاريتي شوعاريني اورتايا آتماق ايمکاني وئردي. قافقاز موسلمانلاري قورولتاييندا (1917-جي ايلين آپرئلي)، عوموم‌روسييا موسلمانلاري قورولتاييندا (ماي)، غئيري-روس خالقلارين کييئو قورولتاييندا (اييون) ميللي-دئموکراتيک قوووه‌لرين آذربايجانا گئنيش اراضي-ميللي موختاريت طلبينه اويغون قرارلار وئريلدي. همين ايلين اوکتيابريندا موساوات پارتيياسينين ايلک قورولتاييندا قبول ائديلميش يئني پروقرامدا يازيلميشدي: "فيرقه طرفيندن آذربايجان، تورکوستان، قيرغيزيستان، باشقيرديستان کيمي تورک اؤلکه‌لري محللي موختاريت آلماليديرلار."[1] آما روسييانين يئرلي نوماينده‌لري ميللي قوووه‌لره موختاريت يئرينه "خارابازار" وعد ائدير، حتّي "آذربايجان" آديني بئله قبوللانا بيلميرديلر.[2] سياسي پروسئس‌لرين سونراکي گئديشاتي بلليدير: محض عوثمانلي‌نين بيرباشا ايصراري و تضييقلري ايله گونئي قافقازين روسييادان باغيمسيزليغي ائعلان ائديلدي (1918-اين آپرئلي)؛ آنجاق موستقيل زاقافقازييا(جنوبی قافقاز) فئدئراسيياسي اوزون ياشامادي؛ مايين 26-دا گورجوستان فئدئراسييادان چيخديغيني ائعلان ائتدي؛ آذربايجان ميللي شوراسي بو دفعه يئرلي ايلحاقچيلارين موقاويمتيني قيراراق مايين 28-ده آذربايجانين ايستيقلالي حاقيندا مشهور بياننامه‌ني ائعلان ائتدي؛ تاريخده ايلک دفعه اولاراق "آذربايجان" آدلي دؤولت ياراندي، اونون سرحدلري جيزيلدي.[3] سونرالار محمد امين رسولزاده يازاجاقدي: "روسييا ايداره‌سينده‌کي موسلمانلارا "تورک" دئديرتمک ايندي آرتيق قازانيلميش بير داوادير. يالنيز "تورک" کلمه‌سي دئييل، "آذربايجان" آدي دا قازانيلميشدير"[4] 1918-20-جي ايللرين قازانجلاري سيراسينا قوزئي آذربايجانين سرحدلرينين بليرلنمه‌سي و مودافيعه‌سيني ده بونلارا آرتيرماق اولار.
بو آرادا قاجار ايراني "آذربايجان" آديندا دؤولتين يارانماسينا منفي موناسيبتيني گيزلتمه‌دي. تئهران، "آذربايجان" دؤولتيني، ائله‌جه ده آديني اؤزونون وارليغي اوچون تهلوکه بيلديیيندن ايلک اؤنجه اونو تانيماقدان ايمتيناع ائتدي، پاريس صولح کونفرانسيندا حتّي "قديم ايران تورپاغي" اولدوغو اوچون بو تورپاقلارين اونا بيرلشديريلمه‌سيني طلب ائتدي، آنجاق سونرا "قافقاز آذربايجاني" ايله ايکي‌طرفلي موناسيبتلر قوردو.[5] داها سونرالار تاريخين بو فاکتي فارس عيرقچيلرينه آرازدان قوزئيده‌کي تورپاقلارين "آذربايجان اولماديغيني" ثوبوت ائتمک اوچون لازيم اولاجاقدي.[6]
قوزئي آذربايجانين ايکينجي دفعه ايشغاليندان سونرا (1920-جي ايلين 27 آپرئلي) يئني دؤولت قورومونون اوستونده‌کي"آذربايجان" آدي قالدي، آنجاق اسکي فرانسيز تيپلي موستملکه رئژيمي (بيرباشا ايداره‌چيليک) يئني اينگيليس تيپينه (دولايلي ايداره‌چيليک) دَييشدي؛ چاريزم دؤورونده پلانلانان ايشلر سووئت دؤورونده داها آرديجيل و غدار شکيلده داوام ائتدي. هم ده يئرلي کومونيست عونصورلرين فعال ايشتيراکي ايله. سووئت آذربايجاني تورپاقلارينين بير حيصه‌سي (زنگه‌زور، گؤيچه، بورچالي‌نين اورتا زولاغي، قارايازي) قونشولارا وئريلدي، اوسته‌گل بورادا "ساعاتلي بومبا" - ائرمني موختاريتي ياراديلدي.
سووئت رئژيمينين آزاد ايدئولوژي حياتا سون قويماسينا باخماياراق، يئني شراييطده اينکيشاف ائدن مدنيت، ايلک اؤنجه ادبيات يئني نسيلده وطنچيليک دويغولارينين گوجلنمه‌سينه ندن اولدو. گونئيده 21 آذر حرکاتي بو دويغولارين آرتماسينا علاوه ایستيمول وئردي. ميللي شوعورون، عوموميتله، ميلتچي‌ليیين ييپرانماسينا باخماياراق، آذربايجان وطنداشلاريندا وطن دويغوسو (وطن‌پرورليک روحو، پاتريوتيزم) يوکسلدي. ميللي فيکرين داشيييجي‌سي اولان، عئيني زاماندا اونو گليشديرمک ميسيياسينا يوکوملو اولان آذربايجان موهاجيرتي بو يئني گئرچکليیين فرقينده ايدي. موساوات پارتيياسينين 1936-جي ايل تاريخلي يئني "پروقرام اساسلاري"ندا تورکچولوکله آذربايجانچيليق بير-بيريني تاماملايان وحدت حاليندا عکسيني تاپدي: "بؤيوک تورکلويه منسوب بير مملکت اولماسي حسبي ایله [سورتي ایله] آذربايجان، ديگر تورک ائللري ايله کولتورل صورتده باغليدير. بو باغليليغين بوندان اول اولدوغو کيمي بوندان سونرا داهي [دا] قورونماسيني موساواتچيليق جيديتله مودافيعه ائدر... آذربايجان، قديم زامانلاردان بري تاريخين موختليف دؤورلرينده کندينه مخصوص سياسي وارليق گؤستره‌رک موستقيل دؤولت حاليندا ياشاميشدير. آذربايجان خالقي ايسه عصري ميلت اولماق اوزره، زنگين بير کولتور حياتينا ماليک بولونموش و بونون منطيقي نتيجه‌سي اولاراق سياسي بير ايدئال داشيميشدير."[7]
يوخاريدا آدي چکيلن "بومبا" سووئتلرين ضعيفله‌ديیي سون دؤورده پارتلاديلدي و 1987-جي ايلدن سونرا ائرمنيستانين مشوم تجاووزو ("قاراباغ پروبلئمي") باشلادي. ائرمنيستانين تجاووزونو دف ائده بيلمه‌ين آذربايجان، بؤهران دؤورونه گيردي. دؤولتين تورپاق بوتونلویونون پوزولماسي بؤهران کيمي قبول ائديلمه‌سه ده بو، داوام ائتمکده‌دير.
گونئيده ده "آذربايجان" مفهومو و اونون جوغرافيياسي اون ايللرله پهلوي و ايسلام جومهوريتي رئژيملرينين باسقي‌سينا معروض قالدي. 1937-جي ايل يئني اراضي-اينظيباطي بؤلگوسونه گؤره، آذربايجانين خئيلي حيصه سي 3-جو و 4-جو اوستانا (يالت) بؤلوندو، قالان حيصه لري قونشو اوستانلارا قاتيلدي.اوستانلارين آدينداکي تاريخي آدلار گؤتورولدو. زنجان، قزوين، ساوه، سولطان آباد و همدان بو اوستانلاردان کناردا قالدي. داها سونرالار (1941) بيجار 4-جو، آستارا ايسه 3-جو اوستاندان قوپاريلدي. ايسلام جومهوريتينين حاضيرکي اراضي-اينضيباطي بؤلگوسونه گؤره، تورکلرين کومپاکت مسکون اولدوغو ائتنيک زونادا شرقي آذربايجان، غربي آذربايجان، اردبيل، زنجان، همدان، تئهران، مرکزي (اراک)، قوم، البرز (قزوين) اوستانلاري ياراديليب. بو جور بؤلونمه گونئيلي‌لرده وطن دويغوسونون ("بوتؤو آذربايجان") دولغونلاشماسينا مانع اولور. او بيري ياندان، کوردلرين کومپاکت ياشاديقلاري بعضي تورپاقلار غربي آذربايجان اوستاني ترکيبينه قاتيلميشدير. اوسته ليک، سون 20-30 ايلده بو اوستانين اهاليسي سورعتله و دورمادان کوردلشديريلمکده‌دير. بو، گله‌جکده يئني "قاراباغلارين" اورتايا چيخماسي اوچون اويغون اورتام يارادير.
گونئيلي‌لرين آذربايجانچيليق فيکرينه ياناشماسيندان بحث ائدرکن بير موهوم مسله‌يه موناسيبتيميزي بيلديرمه‌يه گرک وار. داها دوغروسو،تورکچو يازارلارين بير بؤلومونون بوتون ايراني وطن سايمالاري سببي اوزرينده دورماق گرکدير. بيزجه، بو ياناشماني آشاغيداکي دليل‌لرله ايضاح ائتمک اولار. 1) ايراندا آذربايجان/تورک مسله‌لرينه حصر ائديلميش کيتاب و مقاله‌لرين يازارلاري، "تجزيه-طلبليک"ده (بؤلوجولوکده، سئپاراتيزمده) ايتتيهام اولونماماق اوچون بو "قورويوجو کمر"دن ايستيفاده ائتمک مجبوريتينده‌ديرلر؛ 2) تاريخي آذربايجاندان کناردا مسکونلاشميش تورکلرين (شيراز اطرافينداکي قاشقاي تورکلري کيمي) وارليغي؛ سون 50-60 ايلده ميليونلارلا تورکون آذربايجاندان ايرانين باشقا يئرلرينه کؤچمه‌سي، آذربايجانداکي تورکلرين ايراندا ياشايان تورکلرين ياريدان آزينا چئوريلمه‌سي؛ "آذربايجان آيريلسا، قالان سويداشلاريميزين طالعيي نئجه اولاجاق؟" انديشه‌سي؛ 3) سون مين ايلده ايران دؤولتينين ياشاماسيندا تورکلرين، خوصوصن حاکيم تورک خاندانلارينين موهوم رولو؛ گله‌جک ايراندا فارس ديلي ايله ياناشي تورکجه‌يه ده رسمي دؤولت ديلي ایستاتوسونون وئريلمه‌سي ايسته‌یي؛ "ايراني بيز ياشاتديق، بيز اونا حاکيم اولدوق، ايندي نييه اونو فارسلارا وئرک؟" ايديعاسي.
بيرينجي دليل، يا سبب منطيقه اويغوندور، اونون اوزرينده دورماغا دَيمز. ايکينجي دليله گلديکده، دونيادا ميللي دؤولت سرحدلريندن کناردا ميليونلارلا سويداشي، يا اسکي وطنداشي اولان اؤلکه‌لر وار. بو دؤولتلرين وارليغي، سرحدلري کناريندا قالان سويداشلارين ایستاتوسونون يوکسلمه‌سينده ان حساس فاکتور رولونو اويناماغا قاديردير. ائتنوسون ميللي دؤولت ايچينده‌کي و خاريجينده‌کي حيصه لري آراسيندا سيخ ايش‌بيرليیي‌نين ياراديلماسي ايسه يالنيز تئخنيکي پروبلئمدير. آذربايجاندان کناردا ياشايان تورکچو اينسانلارين بير قيسمينده "آذربايجانچيليق" دويغوسونون اولماماسي، يا ضعيفليیي، بيزجه، غئيري-عادي حاديثه کيمي قارشيلانماماليدير.
اوچونجو دليل. گله‌جک ايرانين آوسترييا-ماجاريستان ايمپئراتورلوغو، يا چئخوسلوواکييا کيمي بير "دوعال دؤولت"ه چئوريلمه‌سي چاغديشي بير ايستک اولا بيلر. چونکي 1) ايران اسکي ايمپئرييا خاراکتئريني ساخلاماقدادير، ایييرمي و ایييرمي بير يوزيللر اوچون ايمپئرييالارين يئنيدن قورولماسي دئييل، داغيلماسي خاراکتئريکدير؛ 2) ايران اهاليسي يالنيز فارسلاردان و تورکلردن عيبارت دئييل، گله‌جک ايراندا باشقا خالقلارين دا حاقلارينين تاميني، بو سيرادان اونلارين ميللي ديللرينه رسمي ایستاتوسون وئريلمه‌سي طلب ائديلير؛3) تورک خاندانلاري ايرانا حاکيم اولموشلار (بوگونکو ايران/فارس دؤولتينين باشيندا دوران آيت الله خامنه‌اي کيمي)، آنجاق تورکلر حاکيم ائتنوس/ميللت اولماميشلار؛ 4) تورکلر يالنيز آذربايجاندا چوخلوقداديرلار (تئهران ايستيثنا اولا بيلر)، آذربايجان سرحدلرينين خاريجينده ياشايان تورکلر آزليقداديرلار، يئرلي اهالي ايله رقابت آپاراجاق گوجه صاحيب دئييللر؛ 5) گونئي آذربايجانين گله‌جه‌یيني پايلاشا بيله‌جه‌یي اَن اويغون اؤلکه قوزئي آذربايجاندير و سایره "ايرانا حاکيم اولاجاغيق" خولياسي ايله ياشايانلارا بير تاريخي فاکتي خاطيرلاتماق فايدالي اولا بيلر.گنج شاه ايسماعيلين "آتا" کيمي خطاب ائتديیي سولطان ايکي بايزيد،گؤندرديیي مکتوبوندا اطرافيني بوروموز فارسلاري گؤز اؤنونه آلاراق اونا اؤيود وئريردي: "فارسلار مسله‌سينده احتياطلي اول، اونلار اؤزلريندن اولمايان حؤکمدارلارا ايطاعت ائتمه‌ين بير خالقدير."[8]
بئله‌ليکله، قوزئيده و گونئيده وطنچيليک، دؤولتچيليک کيمي قاورانيلان، يا قاورانيلمالي اولان آذربايجانچيليغين قارشيسيندا دوران وظيفه‌لرين اوست-اوسته دوشن و فرقلي طرفلري وار. قوزئيده آذربايجانچيليغين اساس وظيفه‌لريني آشاغيداکي کيمي سيرالاماق اولار:
- آذربايجان رئسپوبليکاسينين تورپاق بوتونلویونون برپاسي؛
- آذربايجان رئسپوبليکاسي دؤولتينين دئموکراتيکلشمه‌سي؛
- اونيتار آذربايجان رئسپوبليکاسيندا ائتنيک آزليقلارلا اويومون تامين ائديلمه‌سي؛
- بوتؤو آذربايجان (قوزئي، گونئي، بورچالي، دربند) شوعورونون فورمالاشديريلماسي؛
- تورک دونياسينا اينتئقراسييا و سایره
گونئيده آذربايجانچيليق مفکوره‌سينين طلبلريني آشاغيداکي کيمي فورموله ائتمک اولار:
- ايراندا تورک ائتنيک زوناسينين و گونئي آذربايجانين سرحدلرينين بليرلنمه‌سي؛
- ايران دؤولتي داخيلينده آذربايجان اوستانلارينين بيرلشديريلمه‌سي؛
- گونئي آذربايجانين موختاريتي، يا ايستيقلالي ايدئالينين گئرچکلشديريلمه‌سي اوغروندا موباريزه؛
- بوتؤو آذربايجان (قوزئي، گونئي، بورچالي، دربند) شوعورونون فورمالاشديريلماسي؛
- تورک دونياسينا اينتئقراسييا و سایره
تورکچولوک نه دئييلدير؟
1993- جو ايلين اييونوندا قوزئي آذربايجاندا حاکيميته قاييدان کومونيست نومئنکلاتورا(اصطلاحات) اؤزو ايله اسکي سياسي داورانيش طرزيني و کوسموپوليت-آوتوريتار دوشونجه سيستئميني گتيردي. يئني حاکيميت اسکي‌سيني ايدئولوژي جهتدن گؤزدن سالماق اوچون يئني "ميللي ايدئيا" آختاريشينا چيخدي. ميللي حاکيميتين(آذربایجان خالق جبهه‌‌سی حاکيميتينين) ايدئولوژي داياقلاريني سؤکمک اوچون تورکچولویو قارالاماق گرکدي. ايلک مقاله پرئزيدئنت آپاراتينين او واختکي شؤعبه موديري، فلسفه علملري ناميزدي (ايندي پرئزيدئنت آدمينيستراسيياسينين رهبري، آکادئميک) راميز مهدي‌يئودن گلدي. "تورکچولوک تاريخين گؤزو ايله، ياخود ميللي ايدئيا عصرلرين قوووشوغوندا" باشليقلي گئنيش، سيلسيله مقاله‌ده[9] عوثمانليدا و آذربايجاندا تورکچولوک حرکتي‌نين تاريخي تحريف ائديله‌رک او، "معناسيز و پئرسپئکتيوسيز" ايدئولوژي-سياسي جريان ائلان ائديلدي. بو مقاله‌ده آذربايجانچيليغين سونراکي ايللرده ده موختليف مؤليفلرين موختليف فورمالاردا تيراژلاديغي رسمي ايضاحي وئريلدي: "آذربايجانچيليق" خالقيميزين چوخ عذاب-اذيتلردن سونرا ياراتديغي تاريخي ديردير، رئال موستقيللييه نايل اولماق، واحيد، بؤلونمز، اونيتار آذربايجاني قورويوب ساخلاماق واسيطه‌سيدير. بو گون "آذربايجانچيليق" ميللي حياتين آهنگدارلي‌غينين چوخسرليک عنعنه سي، ديياريميزدا ياشايان بوتون ميلتلرين و ائتنيک قروپلارين قارداشليغي، بيرگه فعاليتي و قارشيليقلي تاثيرينين تاريخي، عومومي طالعيي آذربايجانين بوتؤولویونو قوروماق اوغروندا اونلارين بيرگه موباريزه‌سينين تاريخي تجروبه‌سيدير. بو، آذربايجان خالقينين حياتي معنافعي‌نين وحدتي، اونون دئموکراتييا و ترققي اوغروندا موباريزه‌سينين غايه‌سيدير. "آذربايجانچيليق" قارشيليقلي يارديم، امکداشليق و حوقوق برابرليیي پرينسيپلرينين اساسيني تشکيل ائدير، اونلارين پوزولماسينا سبب اولا بيلن بوتون حاللارا قارشي باريشماز مؤوقع توتور."[10]
بو و بوندان سونراکي مقاله و کيتابلارين اساس ماهيتي "يئني ميللي ايدئيا"دان تورکچولويه آلتئرناتيو ياراتماقدير. حالبوکي بو، منطيقه اويغون دئييل، چونکي بو آخيملار بير-بيرينه قارشي دئييل، عکسين، اونلار بير-بيريني تاماملايير. اصلينده آوتوريتار رئژيمين سياسي مقصدي يالنيز موخاليفتده‌کي ميللي-دئموکراتيک قوووه‌لري دئييل، بوتون ميلتي سيياست صحنه‌سيندن ووروب چيخارتماقدير. بونا دا نايل اولوب. بو، بوتون آوتوريتار رئژيملره خاص اولان خوصوصيتدير. آوتوريتار رئژيملر يئريني مؤحکملتديکجه، ميلت (يا ليبئراليزمين ايفاده ائتديیي کيمي "وطنداش جمعيتي") ضعيفله‌يير و ميلتچيليک ايدئولوژي-سياسي جريان کيمي گؤزدن سالينير. چوخ دوشوندوروجودور کي، بو گون هئچ بير رسمي سندده "ميلت" آنلاييشي و اونون تعريفي يوخدور. حتّي آذربايجان رئسپوبليکاسينين کونستيتوسيياسيندا اونلارلا "ميللي" صيفتي وار، بيرجه "ميلت" سؤزونه بئله راست گلمک مومکون دئييل.
1995- جي ايلده ايقتيدار اسکي "آذربايجان ديلي" آنلاييشي‌نين يئر آلديغي يئني آناياسا (کونستيتوسييا) لاييحه‌سي حاضيرلادي. محض بو مسله‌نين يؤنلنديريلن "موذاکيره‌سي" زاماني ميللي آيدينلارين گتيرديکلري علمي-تاريخي دليللر هئچ ساييلدي. اونلارين تکليف ائتديیي واريانتلارين – تورک ديلي، آذربايجان تورک ديلي، آذربايجان (تورک) ديلي- هئچ بيري کئچمه‌دي. اسکي نومئنکلاتور بوروکراتييا و ضياليلارين راحاتسيزليغي اساس گؤتوروله‌رک، ميللي وارليغين يوسيف ایستالين وئرسيياسي برپا ائديلدي. بو "موذاکيره"ده سسلنديريلن و توپلومدا يئر آلان "راحاتسيزليق"لاردان بعضيلرينه قيسا نظر سالاق.
"تورکچولوک آذربايجانين گله‌جه‌یيني تهلوکه‌يه سالير، غئيري-تورکلرده سئپاراتيست احوال-روحيييه يارادير". حالبوکي آذربايجان تورکلرينين ميللي شوورا صاحيب اولماسي آذربايجانين بوتؤولویو و گله‌جه‌یي اوچون ضروريدير. قاراباغ پروبلئمينين يارانماسي و آشاغي-يوخاري 25 ايل قالماسينين سببلريندن بيريسي ده آذربايجان تورکلرينده ميلتلشمه سورجينين باشا چاتماماسيدير. باشقا ائتنيک آزليقلارين (تاليشلار، تاتلار، لزگي‌لر و باشقالاری) اؤلکه‌نين ائتنيک چوخلوغونون اؤز آدينا صاحيب اولمالاريندان ناراحاتچيليقلاري يئرسيزدير، داها دقيقي - عدالتسيزليکدير. آذربايجانداکي ائتنيک واحيدلرين هاميسي‌نين اؤز رسمي آدي وار (تورکلردن باشقا)، اونلاري بير يئرده توتا بيلن آنلاييش دا وار - "آذربايجان خالقي" ،
"آذربايجان اهالي‌سينين اکثريتينين ديلينه تورک ديلي دئمک اونلارين ميللي کيمليیيني گيزله‌دير." باشقا سؤزله، "آذربايجان ديلي تورکيه‌ده ايشله‌ديلن تورکجه‌ده ارييه‌جک" تئزيسينين هئچ بير اساسي يوخدور. عئيني آددا ديله ماليک اولان اونلارلا اينگيليس‌ديللي، ايسپان‌ديللي، آلمان‌ديللي اؤلکه وار و اونلارين هئچ بيرينين "ميللي کيمليیي گيزلنمير."
"نه فرقي وار، آذربايجان ديلي اولسون، يوخسا تورک ديلي؟" فرقيني يوخاريدا ايضاح ائتديیيميز سياسي سبب‌لرده آختارماق لازيمدير. بو سببلرين باشيندا دا موسکووا و تئهرانين آذربايجاني تورک دونياسيندان آييريب، اونا "يئتيم" ،"يئسير" پسيخولوگيياسي آشيلاماقدير. "آذربايجان ديلي" لينقوونيمينين 1936-جي ايلدن و 1995-جي ايلدن سونرا 73 ايلليک (56+17) تاريخي وار. بس يوز ايللرله اؤلچولن "تورک ديلي"نين تاريخيني نه ائدک؟ او بيزيم کئچميشيميز دئييلمي؟ميلتين موطلق اکثريتي (گونئي، ايرانين باشقا ايالتلري، آوروپا، آمئريکادا) دانيشديغي ديله "تورک" دئيير. ميللي چوخلوقدان قوزئي آذربايجانداکيلاري قوپارتماق بؤلوجولوکدور.
"آذربايجانلي، آذري، آذري-تورک، آذربايجان تورکو کيمي ائتنونيم‌لرين عئيني واختدا، پارالئل ايشله‌ديلمه‌سينده نه پروبلئم وار؟" منطيقي يانليشدير. چونکي ميللي بيرليیي شرطلنديرن دَيرلردن بيري محض عئيني ائتنيک واحيدين عوضولرينين عئيني آد داشيماسيدير. بو بوتؤولوک، عئيني‌ليک اونلاري بيرلشديرير و ميللي بيرليک حيسي يارادير. بو، ميللي شوورون بيتکين‌لشمه‌سي اوچون اؤن شرطدير.
"بيز هئچ بير پان-حرکاتي قبول ائتميريک، چونکي مورتجع حرکتلردير" ، باشقا سؤزله، "آذربايجانداکي ميلته تورک دئمک اسکي پان-تورکيزمدير" فيکرينه باخاق. تاريخده موختليف بيرلشديريجي ("پان") حرکتلر اولوب: پان-گئرمانيزم، پان-ایسلاويزم، پان-ايسلاميزم، پان- آمئريکانيزم، پان-آفريکانيزم، پان-عربيزم و سایره. بو حرکتلر جوغرافي، ائتنيک، ديني و سایره. عاميل‌لره اساسلانيب. اويغون اولاراق هئچ بير آلمان، ایسلاويان، موسلمان، آمئريکالي، آفريقالي، عرب بو حرکاتلاري مورتجع سايمير. هرچند کي، مسلن، روس شووينيست‌لري ماراقلارينا اويغون اولماديغي اوچون پان-گئرمانيزمي، پان-ايسلاميزمي، پان-آمئريکانيزمي و سایره. "مورتجع" حرکتلر ائعلان ائتميشلر. گله‌ک بيزيم اوچون اؤنملي مؤوضو اولان پان-ايرانيزمه. باشلانغيجدا بو آخيمدا ايرانداکي خالقلاري ايمپئرياليست تاثيريندن قورتارماق اوچون بيرلشمه‌يه دعوت ائدن چاغيريشلار دا واردي. آز سونرا او، فارس شووينيزمي – فارس ديلي، کولتورو و تاريخيني ايدئاللاشديريب، فارس اولمايانلاري يوخ سايماق – خاراکتئري آلدي و مورتجعلشدي.[11] مظلوم تورک خالقلارينين بيرليیيني احتيوا ائدن چاغيريشلارين روس دؤولتينين ماراقلاري باخيميندان منفي قييمتلنديريلمه‌سي مومکوندور. 100 ايل اول اينگيليس ايمپئرياليزمي عوثمانليني ضعيفلتمک، اونو پارچالاماق اوچون تورک بيرليیي فيکيرلريني گؤزدن سالماغا چاليشدي. تورک دوشمنلري تورک خالقلارينين بيرليک چاغيريشلارينا (مثلن، قاسپرالي ايسماييل بَي‌ين "ديلده، فيکيرده، ايشده بيرليک!" شوعاري کيمي) پان-تورکيزم آدي قويوب، مورتجع جريان سايميشلار. اونلارين مسله‌يه محض بو جور ياناشماسي آنلاشيلاندير. بس "اؤزوموزونکو" سايديقلاريميزين عئيني ياناشماسيني نورمال حساب ائتمک اولارمي؟ بو يانليش ياناشما آذربايجانين بيرليیي، بوتؤولشمه‌سي (پان-آذربايجانيزم) ايدئياسينا دا يانليش ياناشماغا آپاريب چيخارير.
قوزئي آذربايجانداکي ليبئرال دايره‌لرين (100 ايل اول اونلارا "اوبرازووونسکي" دئييرديلر) ناراحاتچيليغيني دا قيساجا اله آلاق. آچيق ايفاده اولونماسا دا، اونلار تورکچولویو (ميللتچي‌ليیي) شووينيزم سايماغا مئيلليديرلر. حالبوکي ميلتچيليک، شووينيزم، عيرقچيليک آيري-آيري آنلاييشلاردير. ايسته‌نيلن ايضاحلي لوغتده، يا اويغون اينتئرنئت سايتيندا اونلارين ايضاحي وار (سووئت لوغتلرينه باخيلماسين، چونکي علمي دئييل). ميلتچيليک حاقيندا غرب علمينده مينلرله، بلکه ميليونلارلا يازي وار. سادجه، "هوموس سووئتوکوس"لوقدان سييريليب چيخماق و بيلينجلنمک گرکدير. آذربايجانداکي تورکچو خاديملرين يوخاريدا وئرديیيميز سيياهيسينداکي هئچ کسه شووينيست، يا دا عيرقچي دئمه‌يه هئچ کسين حاقي يوخدور. حتّي تورکلره قارشي دؤولت عيرقچيلي‌یيني ان کسکين تنقيد ائتميش تبريزلي علي بئله تورکلري "بيرينجي صينيف" ميلت سايماميش، کولل حاليندا فارسلارا خوصومت دويغوسو اولدوغونو هئچ واخت سؤيلمه‌ميشدير.
"ميلتچيليک دئموکراتييايا ياددير" ذهنيتي ده يانليشدير. ميلتچيليک-دئموکراتييا موناسيبتلري باره‌ده غرب علمينده فايدالي، درده‌ده‌ين ادبيات چوخدور.[12] بيز ده بير زامانلار بو باره‌ده يازديق،[13] اونلاري تکرار ائتمه‌يه لوزوم گؤرموروک. يالنيز روبئرت جووپئر’دن کيچيک بير آلينتي وئرمک ايسترديک: "دئموکراتييا گوجلو ميللي کيمليک طلب ائدير، آنجاق ليبئراليزم اونون يارانماسيني چتينلشديره بيلر."[14]
سون: وطنيميز آذربايجان، ميلتيميز تورک، ديليميز تورکجه‌دير.
ایستالينيزمين ميلتيميزه موناسيبتده تاريخي جينايتي يالنيز "تورک" سؤزونه تابو قويماقدان عيبارت اولماميشدير. "تورک ميلتي" مئخانيکي اولاراق "آذربايجان ميلتي"نه چئوريلمه‌دي، ساده‌جه آد دَیيشمه عملياتي باش وئرمه‌دي. هم ده ميلتين هله فورمالاشماميش تاريخ شوعورو برباد ائديلدي. تحميل ائديلميش بو "آذربايجان ميلتي" ايران و قافقاز طايفالاريندان عيبارت "آتروپاتئن خالقي" و "آلبان خالقي"نا ايشغالچيلارين قاتديغي تورکلردن يارانميش مَلَز، دؤنمه ساييلمالي ايدي (ساييلماليدير). يعني بوگونکو اؤلکه اهالي‌سينين موطلق اکثريتي دده‌لرينين "تورکلشميش ائتنيک آزليقلاردان اولدوغونو" دوشونمه‌لي، آشاغيليق کومپلئکسينده چيرپيناراق اؤزونو ايتيرمه‌لي ايدي. 1995-جي ايلين مشوم قراري بو چيخمازي داها دا غليظلشديردي. ميلتلشمه سورجي قارشيسيندا يئنيدن سدد چکيلدي. دونيا تاريخينده آنالوقو آز تاپيلان حال بو گون ده ياشانماقدادير. بير سيرا اؤلکه‌لر حاقيندا آراشديرمالار آپارميش، آذربايجانا دا ماراقلي مقاله‌لر حصر ائتميش آمئريکالي عاليم س. ائندئرس ويمبوش حئيرتيني گيزله‌ده بيلمير: "بيلديیيم قدرينجه، هئچ بير يابانچي قوووه باشقا بير خالقا، حتّي ناواهولارا [آبمریکاداکی قيرميزي دَريلي توپلوملاردان بيري] بئله، بو قدر اوغورلا ياد کيمليک سيرييا بيلمه‌ميشدير."[15]
عئيني اولاي ايرانداکي عيرقچي رئژيمين گونئيده‌کي سويداشلاريميزا "آذري"ليیي سيريماسي ايله باش وئرميشدير. باشقا بير آمئريکالي عاليم گراهام فوللئر ده گونئيلي‌لر حاقيندا حئيرتيني بئله ايفاده ائدير: "حقيقتن، ايران آذريلري بلکه ده يئر اوزونده ائتنيک کيمليیي حاقيندا دقيق تصوورو اولمايان يئگانه تورکلردير."[16] تسللي وئريجي حال – گونئيده‌کي گنجلرين هم اؤزلرينين، هم ده قوزئيليلرين عوضيندن "هاراي، هاراي، من تورکم!" ،"تبريز، باکي، آنکارا، بيز هارا، فارسلار هارا!"هايقيرتيلاريدير. بو، بيزيم اينانجيميزا گؤره، يئني ميلتچي گنجلي‌یين بيلينج‌آلتي هاراييدير: ميللي کيمليک پروبلئملريني حلل ائتمه‌ميش، ميلتلشمه سورجيني تاماملاماميش ائتنيک بيرلي‌یين موستقيل دؤولت (گونئيده)، يا دئموکراتيک دؤولت (قوزئيده) شانسي يوخدور.
[1] Mirza-Bala Mehmet-zade, Milli Azerbaycan Hareketi, s. 85-86.
[2] Bu qüvvələrin məşum Mart qırğınlarından sonra yaratdıqları orqan “Bakı Quberniyası Xalq Komissarları Soveti” adlanırdı.
[3] Geniş bilgi üçün baxmaq olar: Nəsib Nəsibli, Azərbaycan Demokratik Respublikasının xarici siyasəti, Bakı:Qanun, 2011, s. 32-50.
[4] Mehmet Emin Resulzade, İstiklal mefkuresi ve genclik, İstanbul, 1341, s.6.
[5] Baxın: Nəsib Nəsibli, Azərbaycan Demokratik Respublikasının xarici siyasəti, s. 203-215.
[6] Baxın: Şövkət Tağıyeva, Müasir İran burjua tarixşünaslığında Azərbaycan xalqının etnik birliyinin inkar edilməsi haqqında, Ə. Sumbatzadə (red.), Azərbaycan tarix və mədəniyyətinin burjua saxtalaşdırıcılarına qarşı, Bakı: Elm, s. 114-124. ttp://www.gunaz.tv/aze/14/articleCat/1/articleID/2313-HESEN-RASIDININ-SORUSDURMASI.html/inner/1;
[7] Mirza-Bala Mehmet-zade, Milli Azerbaycan Hareketi, s. 287-288.
[8] Yahya Arjamani, İran, New Jersey, 1972, s.92.
[9] Ramiz Mehdiyev, Türkçülük tarixin gözü ilə, yaxud milli ideya əsrlərin qovşağında, Xalq qəzeti, 14, 15, 17, 18 sentyabr 1993.
[10] Xalq qəzeti, 18 sentyabr 1993.
[11] Məsələn, baxın:Richard W. Cottam, Nationalism in Iran, Pittsburgh, 1964; http://www.gunaz.tv/aze/14/articleCat/1/articleID/2236-PANIRANIZMIN-YARANMASI-VE-TURKLUK-1.html/articlePg/2/inner/1
[12] Məsələn, baxın: Ghia Nodia, Nationalism and Democracy, Journal of Democracy, October 1992, vol.3, no 4, pp. 3-22. Bu dərginin eyni sayında Francis Fukuyama (s. 23-28) və Sholomo Avineri’nin (28-31) bu məqaləyə elmi şərhləri verilib.
[13] Nəsib Nəsibzadə, Bölünmüş Azərbaycan, bütöv Azərbaycan, Bakı: Ay-Ulduz, 1997, s. 39-50 (Millətçilik və demokratiya: Əks qütblər, yoxsa... bölümü).
[14] Robert Cooper, The Post-Cold War World: İntegration and Disintegration, Journal of Democracy, January 1999, vol 10, no 1, p. 11.
[15] S. Enders Wimbush, The Politics of İdentity Change in Soviet Central Asia, Central Asian Survey, vol. 3, no 3, 1985, p.71.
[16] Graham Fuller, Turkey Faces East, Santa Monica: RAND, 1992, p. 54.
بو یازی گوناذ تی‌وی سایتی طرفیندن کؤچورولموشدور
م.ر
آذربايجانچيليق ندير؟
قاجار ايرانيندان قوپارديلاندا قوزئي آذربايجان فئودال-خانليق بؤلونموشلویونو ياشاماقدا ايدي، هله ميلتلشمه سورجي باشلاماميشدي، بوتؤو وطن آنلاييشي يوخ ايدي. قارشيسيندا بيتکين‌لشميش ميللي دَيرلر سيستئمي بولماديغيندان رومانوولار روسيياسي‌نين بورادا سياستي، پروسئسي يؤنلنديرمکده زورلوق چکمه‌دي. روس حؤکومتي بوراني باکي، يئليساوئتپول (گنج) قوبئرنييالاري(والی‌لیک‌لری) و زاکاتال دايره‌سينه بؤلدو، "آذربايجان" آنلاييشينا اساسن ائتنوقرافيک آراشديرمالاردا راست گلمک مومکون ايدي. اون دوققوز يوز ايلين 30-40-جي ايللرينده کئچميش خانليقلارين تاريخيني يازماق سيفاريشي آلميش يئرلي مؤليف‌لر، حتّي عباس‌قولو آغا باکيخانوو بئله آرازدان قوزئيده‌کي تورپاقلاري آيري-آيري ايالت آدلاري ايله قئيد ائديرلر. روس يازارلاري‌نين بعضي‌لرينين "آذربايجان"ي يالنيز قاجار ايرانين قوزئي-باتيسينا عاييد ائتمه‌لري ده روس سيياستينين بوراني (قوزئي آذربايجاني) روسييا ايمپئريياسينين داخيلي قوبئرنيياسينا چئويرمک ایستراتئژيسيندن قايناقلانيردي. روس سيياستينين باشقا، داها اؤنملي اؤزلليیي ايسه بورانين اهالي‌سيني ايران و عوثمانليدان ياديرغاتماق و اوزاقلاشديرماق ايدي. بو سيياستين ايلک آدديملاري قراف وورونتسووون قافقاز جانيشين‌ليیي دؤورونده (1844-54) آتيلدي. اونون ميرزا فتح‌علي آخوندزاده‌يه درام اثرلريني يئرلي دانيشيق ديلينده يازماقدا ايصرار ائتمه‌سي فاکتي بللي گئرچکليکدير. سونراکي ايللرده ده موستملکه حاکيميتي بورادا پارتي‌کولياريزمين (ايالتچي‌لي‌یين) آرتماسينا چاليشدي. يئني ياراديلماقدا اولان آيدين کسيمين ايالتچي‌ليک مئيللري دستکلندي. بو کسيمين اورتاق ادبي تورکجه‌دن فرقلي يئرلي ادبي ديل ("آذربايجان ديلي") ياراتماق مئيلي محض بو سيياستين تاثيري ايله ياراندي.
"خالقلار حبس‌خاناسي" روس ايمپئريياسينين چؤکمه‌سيندن (1917-جي ايلين فئورالي) سونرا يارانميش نيسبي ليبئرال شراييط آذربايجانين ميللي قوووه‌لرينه اراضي موختاريتي شوعاريني اورتايا آتماق ايمکاني وئردي. قافقاز موسلمانلاري قورولتاييندا (1917-جي ايلين آپرئلي)، عوموم‌روسييا موسلمانلاري قورولتاييندا (ماي)، غئيري-روس خالقلارين کييئو قورولتاييندا (اييون) ميللي-دئموکراتيک قوووه‌لرين آذربايجانا گئنيش اراضي-ميللي موختاريت طلبينه اويغون قرارلار وئريلدي. همين ايلين اوکتيابريندا موساوات پارتيياسينين ايلک قورولتاييندا قبول ائديلميش يئني پروقرامدا يازيلميشدي: "فيرقه طرفيندن آذربايجان، تورکوستان، قيرغيزيستان، باشقيرديستان کيمي تورک اؤلکه‌لري محللي موختاريت آلماليديرلار."[1] آما روسييانين يئرلي نوماينده‌لري ميللي قوووه‌لره موختاريت يئرينه "خارابازار" وعد ائدير، حتّي "آذربايجان" آديني بئله قبوللانا بيلميرديلر.[2] سياسي پروسئس‌لرين سونراکي گئديشاتي بلليدير: محض عوثمانلي‌نين بيرباشا ايصراري و تضييقلري ايله گونئي قافقازين روسييادان باغيمسيزليغي ائعلان ائديلدي (1918-اين آپرئلي)؛ آنجاق موستقيل زاقافقازييا(جنوبی قافقاز) فئدئراسيياسي اوزون ياشامادي؛ مايين 26-دا گورجوستان فئدئراسييادان چيخديغيني ائعلان ائتدي؛ آذربايجان ميللي شوراسي بو دفعه يئرلي ايلحاقچيلارين موقاويمتيني قيراراق مايين 28-ده آذربايجانين ايستيقلالي حاقيندا مشهور بياننامه‌ني ائعلان ائتدي؛ تاريخده ايلک دفعه اولاراق "آذربايجان" آدلي دؤولت ياراندي، اونون سرحدلري جيزيلدي.[3] سونرالار محمد امين رسولزاده يازاجاقدي: "روسييا ايداره‌سينده‌کي موسلمانلارا "تورک" دئديرتمک ايندي آرتيق قازانيلميش بير داوادير. يالنيز "تورک" کلمه‌سي دئييل، "آذربايجان" آدي دا قازانيلميشدير"[4] 1918-20-جي ايللرين قازانجلاري سيراسينا قوزئي آذربايجانين سرحدلرينين بليرلنمه‌سي و مودافيعه‌سيني ده بونلارا آرتيرماق اولار.
بو آرادا قاجار ايراني "آذربايجان" آديندا دؤولتين يارانماسينا منفي موناسيبتيني گيزلتمه‌دي. تئهران، "آذربايجان" دؤولتيني، ائله‌جه ده آديني اؤزونون وارليغي اوچون تهلوکه بيلديیيندن ايلک اؤنجه اونو تانيماقدان ايمتيناع ائتدي، پاريس صولح کونفرانسيندا حتّي "قديم ايران تورپاغي" اولدوغو اوچون بو تورپاقلارين اونا بيرلشديريلمه‌سيني طلب ائتدي، آنجاق سونرا "قافقاز آذربايجاني" ايله ايکي‌طرفلي موناسيبتلر قوردو.[5] داها سونرالار تاريخين بو فاکتي فارس عيرقچيلرينه آرازدان قوزئيده‌کي تورپاقلارين "آذربايجان اولماديغيني" ثوبوت ائتمک اوچون لازيم اولاجاقدي.[6]
قوزئي آذربايجانين ايکينجي دفعه ايشغاليندان سونرا (1920-جي ايلين 27 آپرئلي) يئني دؤولت قورومونون اوستونده‌کي"آذربايجان" آدي قالدي، آنجاق اسکي فرانسيز تيپلي موستملکه رئژيمي (بيرباشا ايداره‌چيليک) يئني اينگيليس تيپينه (دولايلي ايداره‌چيليک) دَييشدي؛ چاريزم دؤورونده پلانلانان ايشلر سووئت دؤورونده داها آرديجيل و غدار شکيلده داوام ائتدي. هم ده يئرلي کومونيست عونصورلرين فعال ايشتيراکي ايله. سووئت آذربايجاني تورپاقلارينين بير حيصه‌سي (زنگه‌زور، گؤيچه، بورچالي‌نين اورتا زولاغي، قارايازي) قونشولارا وئريلدي، اوسته‌گل بورادا "ساعاتلي بومبا" - ائرمني موختاريتي ياراديلدي.
سووئت رئژيمينين آزاد ايدئولوژي حياتا سون قويماسينا باخماياراق، يئني شراييطده اينکيشاف ائدن مدنيت، ايلک اؤنجه ادبيات يئني نسيلده وطنچيليک دويغولارينين گوجلنمه‌سينه ندن اولدو. گونئيده 21 آذر حرکاتي بو دويغولارين آرتماسينا علاوه ایستيمول وئردي. ميللي شوعورون، عوموميتله، ميلتچي‌ليیين ييپرانماسينا باخماياراق، آذربايجان وطنداشلاريندا وطن دويغوسو (وطن‌پرورليک روحو، پاتريوتيزم) يوکسلدي. ميللي فيکرين داشيييجي‌سي اولان، عئيني زاماندا اونو گليشديرمک ميسيياسينا يوکوملو اولان آذربايجان موهاجيرتي بو يئني گئرچکليیين فرقينده ايدي. موساوات پارتيياسينين 1936-جي ايل تاريخلي يئني "پروقرام اساسلاري"ندا تورکچولوکله آذربايجانچيليق بير-بيريني تاماملايان وحدت حاليندا عکسيني تاپدي: "بؤيوک تورکلويه منسوب بير مملکت اولماسي حسبي ایله [سورتي ایله] آذربايجان، ديگر تورک ائللري ايله کولتورل صورتده باغليدير. بو باغليليغين بوندان اول اولدوغو کيمي بوندان سونرا داهي [دا] قورونماسيني موساواتچيليق جيديتله مودافيعه ائدر... آذربايجان، قديم زامانلاردان بري تاريخين موختليف دؤورلرينده کندينه مخصوص سياسي وارليق گؤستره‌رک موستقيل دؤولت حاليندا ياشاميشدير. آذربايجان خالقي ايسه عصري ميلت اولماق اوزره، زنگين بير کولتور حياتينا ماليک بولونموش و بونون منطيقي نتيجه‌سي اولاراق سياسي بير ايدئال داشيميشدير."[7]
يوخاريدا آدي چکيلن "بومبا" سووئتلرين ضعيفله‌ديیي سون دؤورده پارتلاديلدي و 1987-جي ايلدن سونرا ائرمنيستانين مشوم تجاووزو ("قاراباغ پروبلئمي") باشلادي. ائرمنيستانين تجاووزونو دف ائده بيلمه‌ين آذربايجان، بؤهران دؤورونه گيردي. دؤولتين تورپاق بوتونلویونون پوزولماسي بؤهران کيمي قبول ائديلمه‌سه ده بو، داوام ائتمکده‌دير.
گونئيده ده "آذربايجان" مفهومو و اونون جوغرافيياسي اون ايللرله پهلوي و ايسلام جومهوريتي رئژيملرينين باسقي‌سينا معروض قالدي. 1937-جي ايل يئني اراضي-اينظيباطي بؤلگوسونه گؤره، آذربايجانين خئيلي حيصه سي 3-جو و 4-جو اوستانا (يالت) بؤلوندو، قالان حيصه لري قونشو اوستانلارا قاتيلدي.اوستانلارين آدينداکي تاريخي آدلار گؤتورولدو. زنجان، قزوين، ساوه، سولطان آباد و همدان بو اوستانلاردان کناردا قالدي. داها سونرالار (1941) بيجار 4-جو، آستارا ايسه 3-جو اوستاندان قوپاريلدي. ايسلام جومهوريتينين حاضيرکي اراضي-اينضيباطي بؤلگوسونه گؤره، تورکلرين کومپاکت مسکون اولدوغو ائتنيک زونادا شرقي آذربايجان، غربي آذربايجان، اردبيل، زنجان، همدان، تئهران، مرکزي (اراک)، قوم، البرز (قزوين) اوستانلاري ياراديليب. بو جور بؤلونمه گونئيلي‌لرده وطن دويغوسونون ("بوتؤو آذربايجان") دولغونلاشماسينا مانع اولور. او بيري ياندان، کوردلرين کومپاکت ياشاديقلاري بعضي تورپاقلار غربي آذربايجان اوستاني ترکيبينه قاتيلميشدير. اوسته ليک، سون 20-30 ايلده بو اوستانين اهاليسي سورعتله و دورمادان کوردلشديريلمکده‌دير. بو، گله‌جکده يئني "قاراباغلارين" اورتايا چيخماسي اوچون اويغون اورتام يارادير.
گونئيلي‌لرين آذربايجانچيليق فيکرينه ياناشماسيندان بحث ائدرکن بير موهوم مسله‌يه موناسيبتيميزي بيلديرمه‌يه گرک وار. داها دوغروسو،تورکچو يازارلارين بير بؤلومونون بوتون ايراني وطن سايمالاري سببي اوزرينده دورماق گرکدير. بيزجه، بو ياناشماني آشاغيداکي دليل‌لرله ايضاح ائتمک اولار. 1) ايراندا آذربايجان/تورک مسله‌لرينه حصر ائديلميش کيتاب و مقاله‌لرين يازارلاري، "تجزيه-طلبليک"ده (بؤلوجولوکده، سئپاراتيزمده) ايتتيهام اولونماماق اوچون بو "قورويوجو کمر"دن ايستيفاده ائتمک مجبوريتينده‌ديرلر؛ 2) تاريخي آذربايجاندان کناردا مسکونلاشميش تورکلرين (شيراز اطرافينداکي قاشقاي تورکلري کيمي) وارليغي؛ سون 50-60 ايلده ميليونلارلا تورکون آذربايجاندان ايرانين باشقا يئرلرينه کؤچمه‌سي، آذربايجانداکي تورکلرين ايراندا ياشايان تورکلرين ياريدان آزينا چئوريلمه‌سي؛ "آذربايجان آيريلسا، قالان سويداشلاريميزين طالعيي نئجه اولاجاق؟" انديشه‌سي؛ 3) سون مين ايلده ايران دؤولتينين ياشاماسيندا تورکلرين، خوصوصن حاکيم تورک خاندانلارينين موهوم رولو؛ گله‌جک ايراندا فارس ديلي ايله ياناشي تورکجه‌يه ده رسمي دؤولت ديلي ایستاتوسونون وئريلمه‌سي ايسته‌یي؛ "ايراني بيز ياشاتديق، بيز اونا حاکيم اولدوق، ايندي نييه اونو فارسلارا وئرک؟" ايديعاسي.
بيرينجي دليل، يا سبب منطيقه اويغوندور، اونون اوزرينده دورماغا دَيمز. ايکينجي دليله گلديکده، دونيادا ميللي دؤولت سرحدلريندن کناردا ميليونلارلا سويداشي، يا اسکي وطنداشي اولان اؤلکه‌لر وار. بو دؤولتلرين وارليغي، سرحدلري کناريندا قالان سويداشلارين ایستاتوسونون يوکسلمه‌سينده ان حساس فاکتور رولونو اويناماغا قاديردير. ائتنوسون ميللي دؤولت ايچينده‌کي و خاريجينده‌کي حيصه لري آراسيندا سيخ ايش‌بيرليیي‌نين ياراديلماسي ايسه يالنيز تئخنيکي پروبلئمدير. آذربايجاندان کناردا ياشايان تورکچو اينسانلارين بير قيسمينده "آذربايجانچيليق" دويغوسونون اولماماسي، يا ضعيفليیي، بيزجه، غئيري-عادي حاديثه کيمي قارشيلانماماليدير.
اوچونجو دليل. گله‌جک ايرانين آوسترييا-ماجاريستان ايمپئراتورلوغو، يا چئخوسلوواکييا کيمي بير "دوعال دؤولت"ه چئوريلمه‌سي چاغديشي بير ايستک اولا بيلر. چونکي 1) ايران اسکي ايمپئرييا خاراکتئريني ساخلاماقدادير، ایييرمي و ایييرمي بير يوزيللر اوچون ايمپئرييالارين يئنيدن قورولماسي دئييل، داغيلماسي خاراکتئريکدير؛ 2) ايران اهاليسي يالنيز فارسلاردان و تورکلردن عيبارت دئييل، گله‌جک ايراندا باشقا خالقلارين دا حاقلارينين تاميني، بو سيرادان اونلارين ميللي ديللرينه رسمي ایستاتوسون وئريلمه‌سي طلب ائديلير؛3) تورک خاندانلاري ايرانا حاکيم اولموشلار (بوگونکو ايران/فارس دؤولتينين باشيندا دوران آيت الله خامنه‌اي کيمي)، آنجاق تورکلر حاکيم ائتنوس/ميللت اولماميشلار؛ 4) تورکلر يالنيز آذربايجاندا چوخلوقداديرلار (تئهران ايستيثنا اولا بيلر)، آذربايجان سرحدلرينين خاريجينده ياشايان تورکلر آزليقداديرلار، يئرلي اهالي ايله رقابت آپاراجاق گوجه صاحيب دئييللر؛ 5) گونئي آذربايجانين گله‌جه‌یيني پايلاشا بيله‌جه‌یي اَن اويغون اؤلکه قوزئي آذربايجاندير و سایره "ايرانا حاکيم اولاجاغيق" خولياسي ايله ياشايانلارا بير تاريخي فاکتي خاطيرلاتماق فايدالي اولا بيلر.گنج شاه ايسماعيلين "آتا" کيمي خطاب ائتديیي سولطان ايکي بايزيد،گؤندرديیي مکتوبوندا اطرافيني بوروموز فارسلاري گؤز اؤنونه آلاراق اونا اؤيود وئريردي: "فارسلار مسله‌سينده احتياطلي اول، اونلار اؤزلريندن اولمايان حؤکمدارلارا ايطاعت ائتمه‌ين بير خالقدير."[8]
بئله‌ليکله، قوزئيده و گونئيده وطنچيليک، دؤولتچيليک کيمي قاورانيلان، يا قاورانيلمالي اولان آذربايجانچيليغين قارشيسيندا دوران وظيفه‌لرين اوست-اوسته دوشن و فرقلي طرفلري وار. قوزئيده آذربايجانچيليغين اساس وظيفه‌لريني آشاغيداکي کيمي سيرالاماق اولار:
- آذربايجان رئسپوبليکاسينين تورپاق بوتونلویونون برپاسي؛
- آذربايجان رئسپوبليکاسي دؤولتينين دئموکراتيکلشمه‌سي؛
- اونيتار آذربايجان رئسپوبليکاسيندا ائتنيک آزليقلارلا اويومون تامين ائديلمه‌سي؛
- بوتؤو آذربايجان (قوزئي، گونئي، بورچالي، دربند) شوعورونون فورمالاشديريلماسي؛
- تورک دونياسينا اينتئقراسييا و سایره
گونئيده آذربايجانچيليق مفکوره‌سينين طلبلريني آشاغيداکي کيمي فورموله ائتمک اولار:
- ايراندا تورک ائتنيک زوناسينين و گونئي آذربايجانين سرحدلرينين بليرلنمه‌سي؛
- ايران دؤولتي داخيلينده آذربايجان اوستانلارينين بيرلشديريلمه‌سي؛
- گونئي آذربايجانين موختاريتي، يا ايستيقلالي ايدئالينين گئرچکلشديريلمه‌سي اوغروندا موباريزه؛
- بوتؤو آذربايجان (قوزئي، گونئي، بورچالي، دربند) شوعورونون فورمالاشديريلماسي؛
- تورک دونياسينا اينتئقراسييا و سایره
تورکچولوک نه دئييلدير؟
1993- جو ايلين اييونوندا قوزئي آذربايجاندا حاکيميته قاييدان کومونيست نومئنکلاتورا(اصطلاحات) اؤزو ايله اسکي سياسي داورانيش طرزيني و کوسموپوليت-آوتوريتار دوشونجه سيستئميني گتيردي. يئني حاکيميت اسکي‌سيني ايدئولوژي جهتدن گؤزدن سالماق اوچون يئني "ميللي ايدئيا" آختاريشينا چيخدي. ميللي حاکيميتين(آذربایجان خالق جبهه‌‌سی حاکيميتينين) ايدئولوژي داياقلاريني سؤکمک اوچون تورکچولویو قارالاماق گرکدي. ايلک مقاله پرئزيدئنت آپاراتينين او واختکي شؤعبه موديري، فلسفه علملري ناميزدي (ايندي پرئزيدئنت آدمينيستراسيياسينين رهبري، آکادئميک) راميز مهدي‌يئودن گلدي. "تورکچولوک تاريخين گؤزو ايله، ياخود ميللي ايدئيا عصرلرين قوووشوغوندا" باشليقلي گئنيش، سيلسيله مقاله‌ده[9] عوثمانليدا و آذربايجاندا تورکچولوک حرکتي‌نين تاريخي تحريف ائديله‌رک او، "معناسيز و پئرسپئکتيوسيز" ايدئولوژي-سياسي جريان ائلان ائديلدي. بو مقاله‌ده آذربايجانچيليغين سونراکي ايللرده ده موختليف مؤليفلرين موختليف فورمالاردا تيراژلاديغي رسمي ايضاحي وئريلدي: "آذربايجانچيليق" خالقيميزين چوخ عذاب-اذيتلردن سونرا ياراتديغي تاريخي ديردير، رئال موستقيللييه نايل اولماق، واحيد، بؤلونمز، اونيتار آذربايجاني قورويوب ساخلاماق واسيطه‌سيدير. بو گون "آذربايجانچيليق" ميللي حياتين آهنگدارلي‌غينين چوخسرليک عنعنه سي، ديياريميزدا ياشايان بوتون ميلتلرين و ائتنيک قروپلارين قارداشليغي، بيرگه فعاليتي و قارشيليقلي تاثيرينين تاريخي، عومومي طالعيي آذربايجانين بوتؤولویونو قوروماق اوغروندا اونلارين بيرگه موباريزه‌سينين تاريخي تجروبه‌سيدير. بو، آذربايجان خالقينين حياتي معنافعي‌نين وحدتي، اونون دئموکراتييا و ترققي اوغروندا موباريزه‌سينين غايه‌سيدير. "آذربايجانچيليق" قارشيليقلي يارديم، امکداشليق و حوقوق برابرليیي پرينسيپلرينين اساسيني تشکيل ائدير، اونلارين پوزولماسينا سبب اولا بيلن بوتون حاللارا قارشي باريشماز مؤوقع توتور."[10]
بو و بوندان سونراکي مقاله و کيتابلارين اساس ماهيتي "يئني ميللي ايدئيا"دان تورکچولويه آلتئرناتيو ياراتماقدير. حالبوکي بو، منطيقه اويغون دئييل، چونکي بو آخيملار بير-بيرينه قارشي دئييل، عکسين، اونلار بير-بيريني تاماملايير. اصلينده آوتوريتار رئژيمين سياسي مقصدي يالنيز موخاليفتده‌کي ميللي-دئموکراتيک قوووه‌لري دئييل، بوتون ميلتي سيياست صحنه‌سيندن ووروب چيخارتماقدير. بونا دا نايل اولوب. بو، بوتون آوتوريتار رئژيملره خاص اولان خوصوصيتدير. آوتوريتار رئژيملر يئريني مؤحکملتديکجه، ميلت (يا ليبئراليزمين ايفاده ائتديیي کيمي "وطنداش جمعيتي") ضعيفله‌يير و ميلتچيليک ايدئولوژي-سياسي جريان کيمي گؤزدن سالينير. چوخ دوشوندوروجودور کي، بو گون هئچ بير رسمي سندده "ميلت" آنلاييشي و اونون تعريفي يوخدور. حتّي آذربايجان رئسپوبليکاسينين کونستيتوسيياسيندا اونلارلا "ميللي" صيفتي وار، بيرجه "ميلت" سؤزونه بئله راست گلمک مومکون دئييل.
1995- جي ايلده ايقتيدار اسکي "آذربايجان ديلي" آنلاييشي‌نين يئر آلديغي يئني آناياسا (کونستيتوسييا) لاييحه‌سي حاضيرلادي. محض بو مسله‌نين يؤنلنديريلن "موذاکيره‌سي" زاماني ميللي آيدينلارين گتيرديکلري علمي-تاريخي دليللر هئچ ساييلدي. اونلارين تکليف ائتديیي واريانتلارين – تورک ديلي، آذربايجان تورک ديلي، آذربايجان (تورک) ديلي- هئچ بيري کئچمه‌دي. اسکي نومئنکلاتور بوروکراتييا و ضياليلارين راحاتسيزليغي اساس گؤتوروله‌رک، ميللي وارليغين يوسيف ایستالين وئرسيياسي برپا ائديلدي. بو "موذاکيره"ده سسلنديريلن و توپلومدا يئر آلان "راحاتسيزليق"لاردان بعضيلرينه قيسا نظر سالاق.
"تورکچولوک آذربايجانين گله‌جه‌یيني تهلوکه‌يه سالير، غئيري-تورکلرده سئپاراتيست احوال-روحيييه يارادير". حالبوکي آذربايجان تورکلرينين ميللي شوورا صاحيب اولماسي آذربايجانين بوتؤولویو و گله‌جه‌یي اوچون ضروريدير. قاراباغ پروبلئمينين يارانماسي و آشاغي-يوخاري 25 ايل قالماسينين سببلريندن بيريسي ده آذربايجان تورکلرينده ميلتلشمه سورجينين باشا چاتماماسيدير. باشقا ائتنيک آزليقلارين (تاليشلار، تاتلار، لزگي‌لر و باشقالاری) اؤلکه‌نين ائتنيک چوخلوغونون اؤز آدينا صاحيب اولمالاريندان ناراحاتچيليقلاري يئرسيزدير، داها دقيقي - عدالتسيزليکدير. آذربايجانداکي ائتنيک واحيدلرين هاميسي‌نين اؤز رسمي آدي وار (تورکلردن باشقا)، اونلاري بير يئرده توتا بيلن آنلاييش دا وار - "آذربايجان خالقي" ،
"آذربايجان اهالي‌سينين اکثريتينين ديلينه تورک ديلي دئمک اونلارين ميللي کيمليیيني گيزله‌دير." باشقا سؤزله، "آذربايجان ديلي تورکيه‌ده ايشله‌ديلن تورکجه‌ده ارييه‌جک" تئزيسينين هئچ بير اساسي يوخدور. عئيني آددا ديله ماليک اولان اونلارلا اينگيليس‌ديللي، ايسپان‌ديللي، آلمان‌ديللي اؤلکه وار و اونلارين هئچ بيرينين "ميللي کيمليیي گيزلنمير."
"نه فرقي وار، آذربايجان ديلي اولسون، يوخسا تورک ديلي؟" فرقيني يوخاريدا ايضاح ائتديیيميز سياسي سبب‌لرده آختارماق لازيمدير. بو سببلرين باشيندا دا موسکووا و تئهرانين آذربايجاني تورک دونياسيندان آييريب، اونا "يئتيم" ،"يئسير" پسيخولوگيياسي آشيلاماقدير. "آذربايجان ديلي" لينقوونيمينين 1936-جي ايلدن و 1995-جي ايلدن سونرا 73 ايلليک (56+17) تاريخي وار. بس يوز ايللرله اؤلچولن "تورک ديلي"نين تاريخيني نه ائدک؟ او بيزيم کئچميشيميز دئييلمي؟ميلتين موطلق اکثريتي (گونئي، ايرانين باشقا ايالتلري، آوروپا، آمئريکادا) دانيشديغي ديله "تورک" دئيير. ميللي چوخلوقدان قوزئي آذربايجانداکيلاري قوپارتماق بؤلوجولوکدور.
"آذربايجانلي، آذري، آذري-تورک، آذربايجان تورکو کيمي ائتنونيم‌لرين عئيني واختدا، پارالئل ايشله‌ديلمه‌سينده نه پروبلئم وار؟" منطيقي يانليشدير. چونکي ميللي بيرليیي شرطلنديرن دَيرلردن بيري محض عئيني ائتنيک واحيدين عوضولرينين عئيني آد داشيماسيدير. بو بوتؤولوک، عئيني‌ليک اونلاري بيرلشديرير و ميللي بيرليک حيسي يارادير. بو، ميللي شوورون بيتکين‌لشمه‌سي اوچون اؤن شرطدير.
"بيز هئچ بير پان-حرکاتي قبول ائتميريک، چونکي مورتجع حرکتلردير" ، باشقا سؤزله، "آذربايجانداکي ميلته تورک دئمک اسکي پان-تورکيزمدير" فيکرينه باخاق. تاريخده موختليف بيرلشديريجي ("پان") حرکتلر اولوب: پان-گئرمانيزم، پان-ایسلاويزم، پان-ايسلاميزم، پان- آمئريکانيزم، پان-آفريکانيزم، پان-عربيزم و سایره. بو حرکتلر جوغرافي، ائتنيک، ديني و سایره. عاميل‌لره اساسلانيب. اويغون اولاراق هئچ بير آلمان، ایسلاويان، موسلمان، آمئريکالي، آفريقالي، عرب بو حرکاتلاري مورتجع سايمير. هرچند کي، مسلن، روس شووينيست‌لري ماراقلارينا اويغون اولماديغي اوچون پان-گئرمانيزمي، پان-ايسلاميزمي، پان-آمئريکانيزمي و سایره. "مورتجع" حرکتلر ائعلان ائتميشلر. گله‌ک بيزيم اوچون اؤنملي مؤوضو اولان پان-ايرانيزمه. باشلانغيجدا بو آخيمدا ايرانداکي خالقلاري ايمپئرياليست تاثيريندن قورتارماق اوچون بيرلشمه‌يه دعوت ائدن چاغيريشلار دا واردي. آز سونرا او، فارس شووينيزمي – فارس ديلي، کولتورو و تاريخيني ايدئاللاشديريب، فارس اولمايانلاري يوخ سايماق – خاراکتئري آلدي و مورتجعلشدي.[11] مظلوم تورک خالقلارينين بيرليیيني احتيوا ائدن چاغيريشلارين روس دؤولتينين ماراقلاري باخيميندان منفي قييمتلنديريلمه‌سي مومکوندور. 100 ايل اول اينگيليس ايمپئرياليزمي عوثمانليني ضعيفلتمک، اونو پارچالاماق اوچون تورک بيرليیي فيکيرلريني گؤزدن سالماغا چاليشدي. تورک دوشمنلري تورک خالقلارينين بيرليک چاغيريشلارينا (مثلن، قاسپرالي ايسماييل بَي‌ين "ديلده، فيکيرده، ايشده بيرليک!" شوعاري کيمي) پان-تورکيزم آدي قويوب، مورتجع جريان سايميشلار. اونلارين مسله‌يه محض بو جور ياناشماسي آنلاشيلاندير. بس "اؤزوموزونکو" سايديقلاريميزين عئيني ياناشماسيني نورمال حساب ائتمک اولارمي؟ بو يانليش ياناشما آذربايجانين بيرليیي، بوتؤولشمه‌سي (پان-آذربايجانيزم) ايدئياسينا دا يانليش ياناشماغا آپاريب چيخارير.
قوزئي آذربايجانداکي ليبئرال دايره‌لرين (100 ايل اول اونلارا "اوبرازووونسکي" دئييرديلر) ناراحاتچيليغيني دا قيساجا اله آلاق. آچيق ايفاده اولونماسا دا، اونلار تورکچولویو (ميللتچي‌ليیي) شووينيزم سايماغا مئيلليديرلر. حالبوکي ميلتچيليک، شووينيزم، عيرقچيليک آيري-آيري آنلاييشلاردير. ايسته‌نيلن ايضاحلي لوغتده، يا اويغون اينتئرنئت سايتيندا اونلارين ايضاحي وار (سووئت لوغتلرينه باخيلماسين، چونکي علمي دئييل). ميلتچيليک حاقيندا غرب علمينده مينلرله، بلکه ميليونلارلا يازي وار. سادجه، "هوموس سووئتوکوس"لوقدان سييريليب چيخماق و بيلينجلنمک گرکدير. آذربايجانداکي تورکچو خاديملرين يوخاريدا وئرديیيميز سيياهيسينداکي هئچ کسه شووينيست، يا دا عيرقچي دئمه‌يه هئچ کسين حاقي يوخدور. حتّي تورکلره قارشي دؤولت عيرقچيلي‌یيني ان کسکين تنقيد ائتميش تبريزلي علي بئله تورکلري "بيرينجي صينيف" ميلت سايماميش، کولل حاليندا فارسلارا خوصومت دويغوسو اولدوغونو هئچ واخت سؤيلمه‌ميشدير.
"ميلتچيليک دئموکراتييايا ياددير" ذهنيتي ده يانليشدير. ميلتچيليک-دئموکراتييا موناسيبتلري باره‌ده غرب علمينده فايدالي، درده‌ده‌ين ادبيات چوخدور.[12] بيز ده بير زامانلار بو باره‌ده يازديق،[13] اونلاري تکرار ائتمه‌يه لوزوم گؤرموروک. يالنيز روبئرت جووپئر’دن کيچيک بير آلينتي وئرمک ايسترديک: "دئموکراتييا گوجلو ميللي کيمليک طلب ائدير، آنجاق ليبئراليزم اونون يارانماسيني چتينلشديره بيلر."[14]
سون: وطنيميز آذربايجان، ميلتيميز تورک، ديليميز تورکجه‌دير.
ایستالينيزمين ميلتيميزه موناسيبتده تاريخي جينايتي يالنيز "تورک" سؤزونه تابو قويماقدان عيبارت اولماميشدير. "تورک ميلتي" مئخانيکي اولاراق "آذربايجان ميلتي"نه چئوريلمه‌دي، ساده‌جه آد دَیيشمه عملياتي باش وئرمه‌دي. هم ده ميلتين هله فورمالاشماميش تاريخ شوعورو برباد ائديلدي. تحميل ائديلميش بو "آذربايجان ميلتي" ايران و قافقاز طايفالاريندان عيبارت "آتروپاتئن خالقي" و "آلبان خالقي"نا ايشغالچيلارين قاتديغي تورکلردن يارانميش مَلَز، دؤنمه ساييلمالي ايدي (ساييلماليدير). يعني بوگونکو اؤلکه اهالي‌سينين موطلق اکثريتي دده‌لرينين "تورکلشميش ائتنيک آزليقلاردان اولدوغونو" دوشونمه‌لي، آشاغيليق کومپلئکسينده چيرپيناراق اؤزونو ايتيرمه‌لي ايدي. 1995-جي ايلين مشوم قراري بو چيخمازي داها دا غليظلشديردي. ميلتلشمه سورجي قارشيسيندا يئنيدن سدد چکيلدي. دونيا تاريخينده آنالوقو آز تاپيلان حال بو گون ده ياشانماقدادير. بير سيرا اؤلکه‌لر حاقيندا آراشديرمالار آپارميش، آذربايجانا دا ماراقلي مقاله‌لر حصر ائتميش آمئريکالي عاليم س. ائندئرس ويمبوش حئيرتيني گيزله‌ده بيلمير: "بيلديیيم قدرينجه، هئچ بير يابانچي قوووه باشقا بير خالقا، حتّي ناواهولارا [آبمریکاداکی قيرميزي دَريلي توپلوملاردان بيري] بئله، بو قدر اوغورلا ياد کيمليک سيرييا بيلمه‌ميشدير."[15]
عئيني اولاي ايرانداکي عيرقچي رئژيمين گونئيده‌کي سويداشلاريميزا "آذري"ليیي سيريماسي ايله باش وئرميشدير. باشقا بير آمئريکالي عاليم گراهام فوللئر ده گونئيلي‌لر حاقيندا حئيرتيني بئله ايفاده ائدير: "حقيقتن، ايران آذريلري بلکه ده يئر اوزونده ائتنيک کيمليیي حاقيندا دقيق تصوورو اولمايان يئگانه تورکلردير."[16] تسللي وئريجي حال – گونئيده‌کي گنجلرين هم اؤزلرينين، هم ده قوزئيليلرين عوضيندن "هاراي، هاراي، من تورکم!" ،"تبريز، باکي، آنکارا، بيز هارا، فارسلار هارا!"هايقيرتيلاريدير. بو، بيزيم اينانجيميزا گؤره، يئني ميلتچي گنجلي‌یين بيلينج‌آلتي هاراييدير: ميللي کيمليک پروبلئملريني حلل ائتمه‌ميش، ميلتلشمه سورجيني تاماملاماميش ائتنيک بيرلي‌یين موستقيل دؤولت (گونئيده)، يا دئموکراتيک دؤولت (قوزئيده) شانسي يوخدور.
[1] Mirza-Bala Mehmet-zade, Milli Azerbaycan Hareketi, s. 85-86.
[2] Bu qüvvələrin məşum Mart qırğınlarından sonra yaratdıqları orqan “Bakı Quberniyası Xalq Komissarları Soveti” adlanırdı.
[3] Geniş bilgi üçün baxmaq olar: Nəsib Nəsibli, Azərbaycan Demokratik Respublikasının xarici siyasəti, Bakı:Qanun, 2011, s. 32-50.
[4] Mehmet Emin Resulzade, İstiklal mefkuresi ve genclik, İstanbul, 1341, s.6.
[5] Baxın: Nəsib Nəsibli, Azərbaycan Demokratik Respublikasının xarici siyasəti, s. 203-215.
[6] Baxın: Şövkət Tağıyeva, Müasir İran burjua tarixşünaslığında Azərbaycan xalqının etnik birliyinin inkar edilməsi haqqında, Ə. Sumbatzadə (red.), Azərbaycan tarix və mədəniyyətinin burjua saxtalaşdırıcılarına qarşı, Bakı: Elm, s. 114-124. ttp://www.gunaz.tv/aze/14/articleCat/1/articleID/2313-HESEN-RASIDININ-SORUSDURMASI.html/inner/1;
[7] Mirza-Bala Mehmet-zade, Milli Azerbaycan Hareketi, s. 287-288.
[8] Yahya Arjamani, İran, New Jersey, 1972, s.92.
[9] Ramiz Mehdiyev, Türkçülük tarixin gözü ilə, yaxud milli ideya əsrlərin qovşağında, Xalq qəzeti, 14, 15, 17, 18 sentyabr 1993.
[10] Xalq qəzeti, 18 sentyabr 1993.
[11] Məsələn, baxın:Richard W. Cottam, Nationalism in Iran, Pittsburgh, 1964; http://www.gunaz.tv/aze/14/articleCat/1/articleID/2236-PANIRANIZMIN-YARANMASI-VE-TURKLUK-1.html/articlePg/2/inner/1
[12] Məsələn, baxın: Ghia Nodia, Nationalism and Democracy, Journal of Democracy, October 1992, vol.3, no 4, pp. 3-22. Bu dərginin eyni sayında Francis Fukuyama (s. 23-28) və Sholomo Avineri’nin (28-31) bu məqaləyə elmi şərhləri verilib.
[13] Nəsib Nəsibzadə, Bölünmüş Azərbaycan, bütöv Azərbaycan, Bakı: Ay-Ulduz, 1997, s. 39-50 (Millətçilik və demokratiya: Əks qütblər, yoxsa... bölümü).
[14] Robert Cooper, The Post-Cold War World: İntegration and Disintegration, Journal of Democracy, January 1999, vol 10, no 1, p. 11.
[15] S. Enders Wimbush, The Politics of İdentity Change in Soviet Central Asia, Central Asian Survey, vol. 3, no 3, 1985, p.71.
[16] Graham Fuller, Turkey Faces East, Santa Monica: RAND, 1992, p. 54.
بو یازی گوناذ تی‌وی سایتی طرفیندن کؤچورولموشدور
م.ر
No comments:
Post a Comment