مئهران
باهارلي
توركجه
كله‌مه- عره‌بجه كلمه: دده قورقوت كيتابيندا بئله بير جومله واردير: "آغ
آلنيندا بئش کله‌مه دوعا قيلديق". بيزجه بو جومله‌ده گئچه‌ن "كله‌مه"
سؤزو، عره‌بجه "كلمه" سؤزو اولماييپ، توركجه "كله‌مه" دئگيسي
اولابيله‌ر ("كله".مهك فئعلي كؤكو +"-مه" سون اكي). توركجه
"كله‌مه" سؤزونون كؤكه‌ني قونوشماق، سؤيله‌مه‌ك، دئمه‌ك، دانيشماق،
صؤحبه‌ت، سؤيله‌شي آنلاملاري بولونان "كله‌مه‌ك" فئعليدير.
توركولوق-آلتاييستيك سئرگئي ايستاروسين ده اؤز قوجامان "توركول كؤكه‌نله‌مه
وئري تاباني" ياپيتيندا بو گؤروشو منيمسه‌ميشدير. اونا گؤره بوگون توركجه
(توركييه، آزه‌ربايجان، ايران، عراق) و توركمه‌نجه ديلله‌رينده "قورونماق
اوچون اوخونان قورآن`ين قوتسال سؤزله‌ري" آنلاميندا ايشله‌ديله‌ن (كليمه،
كلمه، كله‌مه) اصلينده عره‌بجه كؤكه‌نلي "كلمه" دئييل، بو توركجه كؤكه‌نلي
"كله‌مه" دئگيسيدير و زامانلا آنلام و بيچيم اولاراق بنزه‌ر عره‌بجه
"كلمه" ايله قايناشميش و يا يئر ده‌ييشديرميشدير (١).
عئيني
سوره‌ج-اولاي، تورك كؤكه‌نلي "قاذير"، "اوراغوت"،
"آوول"، "خوجا"، ... كليمه‌له‌رينين بنزه‌ر آنلام و بيچيمله‌ري
اولان سيراسييلا عره‌بجه-فارسجا "قادر"، "عورت"،
"عائله" و "خواجه" كليمه‌له‌ري ايله يئر ده‌ييشمه‌سينده ده
گؤزله‌مله‌نه‌بيله‌ر). بيزجه تورك عله‌وي قيزيلباشلارين (اهل حق) قوتسال كيتابلاري
ساييلان "كلام"لار (عره‌بجه‌سي "كلامات") دا عئيني توركجه
"كله‌مه"له‌ر دئگيسينده‌ن آلينمادير. سوزوموز`ده بو ايكي بنزه‌ر توركجه
و عره‌بجه دئگي آراسيندا آييريم گؤزه‌تيلير و بير بيرينه قاريشماسين دييه، توركجه
اولان "كله‌مه" (دوعا آنلاميندا) و عره‌بجه اولان "كليمه"
اولاراق (سؤز و دئگي آنلاميندا) يازيلير.
كله‌جي:
"كله‌جي" دئگيسي ده، "كله‌مه" كيمي توركجه "كله‌مه‌ك"
فئعلينده‌ن تؤره‌ميشدير. كله‌جي، اسكي توركجه‌ده سؤز، خاره‌زم توركجه‌سينده ايسه
بيلگي (اينفورماسييون) و ساليق (راپورت) آنلاملاريندا ايدي. ديش اؤلكه‌له‌ره گؤنده‌ريله‌ن
ائلچي و كؤمه‌كچيله‌رينه ده ائلچي-كله‌جي ديييليردي. كله‌جي، ديوان لغات الترك`ده سؤزله‌رله آنلاتما، قونوشما آنلاميندا و
اوغوزجا بير دئگي دييه گئچه‌ر. كله‌جي دئگيسينين گئچميش و گونوموزده چئشيتلي
بيچيمله‌ري اولموشدور: كله‌چو (اسكي توركجه)، كله‌چي (اورتا توركجه، بالقارجا)،
كله‌چه (اورتا توركجه)، كله‌جي (توركجه-توركييه)، كله‌چ سؤز (قيرقيزجا)، گله‌چي
(قوميقجا)، كالا (چوواشجا). اورتا توركجه‌ده "كله‌جي" (حيكايه، حديث،
سؤز، افسانه، قيصصه، آغيزدان آغيزا دولاشان سؤز، لاف، كلام، دوزگون و بوتؤو سؤز)؛
"كله‌جي ائتمه‌ك"، "كله‌جي ائيله‌مه‌ك"، "كله‌جي قيلماق"
(قونوشماق، دانيشماق، موصاحيبه‌ت و صؤحبه‌ت ائتمه‌ك)؛ و "كله‌جيلي"
(بول و گؤزه‌ل قونوشان، بليغ، خوش صؤحبه‌ت شخص) آنلاملاريني داشيميشدير:
"گرچي
سؤزو تاويل ائده‌ر، قامه‌تينين قييامه‌تي- لئيكك قيلير دوداقلارين گله‌جيميزي
موخته‌صه‌ر". سيواسلي قاضي برهان الدين
"كله‌جي
بيله‌ن كيشينين اوزونو آغ ائده بير سؤز- سؤزو پيشيريپ دييه‌نين ايشيني ساغ ائده
بير سؤز". يونوس ايمره
دده
قورقوت كيتابيندا "كله‌جي"-"گله‌چي" دئگيسي، سؤز و دئييش
آنلاميندا ايشله‌ديلميشدير: "بگيل گؤردو خاتين كيشينين عاغلي، كله‌جيسي
ايييدير".
بوگون
آنادولونون بير سيرا لهجه‌له‌رينده كله‌جي كليمه‌سي سؤزله‌شمه، آنلاشما آنلاميندا
ايشله‌كدير. كله‌چي، قاراچاي لهجه‌سينده چوپ چاتان و آرابولوجو (واسيطه، مويانجي)
آنلاملاريندادير. بيزيم توركجه لهجه‌له‌رينده ايسه عئيني كؤكه‌نده‌ن اولان
"كله‌شميش" دئگيسي، سؤزله‌نميش، آداقلي و ياويقلي دئمه‌كدير. چاغداش
توركجه اونوم (طيبب) ديلينده بو كؤكه‌نده‌ن "كله‌جي گوجلويو" (Dyslexia) دريمي (تئرميني)
تؤره‌ديلميشدير.
توركولوق
توغرول آتاباي`ا گؤره فارسجا "كلنجار" كليمه‌سي ده توركجه "كله‌جي"
ايله ايلگيلي اولماليدير. اونا گؤره: "فارسجا كلنجار سؤزو ده بورادان آلينميش
اولسا گره‌ك. كلنجار رفتن سؤزلو دوئللويا گيريشمه‌ك، دئييشمه‌ك آنلاميندادير.
بؤيوك اولاسيليقلا اؤزگون بيچيمي كله‌نجه‌ر اولسا گره‌ك. داها سونرا فارسجادا بير
بيرييله اوغراشماق، بير بيرينه گيرمه‌ك، باش قوشماق آنلاميني دا قازانميشدير.
(دئهخودا-دهخدا يانليش اولاراق يئنگه‌ج آنلامينداكي كلنجار سؤزونه باغلاميش).
برهان قاطع`ده كئچه‌ن "كله‌نج" (اؤيمه، اؤزونو اؤيمه) سؤزجويو ده كله‌مه‌ك
ائيله‌مينده‌ن آلينميش اولابيله‌ر. (سئو.ين.ج، قيوا.ن.ج، اؤي.ون.ج، كيمي
كله.ن.ج)".
موغولجادا:
كله‌مه‌ك فئعلي موغولجادا دا واردير و قونوشماق، سؤيله‌مه‌ك، آنلاتماق
آنلاملاريندادير. موغولجادا كله‌چي، يورومجو و موفه‌سسير دئمه‌كدير. بؤيوك
اولاسيليقلا بو كليمه توركجه‌ده‌ن موغولجايا گئچميشدير. بو كؤكون موغولجادا تؤره‌وله‌رينده‌ن:
كلله –كلله‌ن-خل-خله‌ن (ديل)؛ كله-خله (سؤيله‌مه‌ك، كليمه‌له‌رله ايفاده ائتمه‌ك،
قونوشماق، دئمه‌ك، آنلاتماق، حيكايه ائتمه‌ك)؛ كله‌چي-خلچ (يورومجو، تفسيرجي)؛ كله‌گچي-خله‌قچ
(قونوشماچي)؛ كله‌گده-خله‌گده (قونوشولماق، سؤز قونوسو ائديلمه‌ك، صؤحبه‌تين
قونوسو اولماق)؛ كله‌گده‌گچي-خله‌گده‌گچ (قونوشولان شئي)؛ گله‌گه‌ي-خلگيي (ديلسيز،
ككه‌له‌يه‌ن، ديلي توتوق، ككه‌مه)؛ كله‌مورچي-خلمه‌رچ (يورومچو، ترجومان)؛ كله‌مورچيله‌مه‌ك-خلمرچله
(يوروملاماق، يورومجو كيمي داورانماق)؛ كله‌ته‌ي-خلته‌ي-كله‌تو (ديللي، ديلي
اولان، قونوشابيله‌ن، بير و يا بير نئچه ديلده اوزمان اولان، بلاغه‌تلي قونوشان،
گؤزه‌ل قونوشان، آخيجي قونوشان)؛ كلو (ديللاق، كيليتوريس)؛...
تيلجيك: توركييه‌ده
آري توركجه‌چيليك آخيمينا باغلي اولان نوروللاه آتاج، بير دؤنه‌م عره‌بجه
"كلمه" دئگيسينين قارشيليغي اولاراق توركجه "كله‌جي" دئگيسني
قوللانميشدير. (نده‌ن بؤيله يازييوروم. اولكو، آراليق ١٩٤٧). آنجاق آتاچ`ين
اؤزونون ده به‌يه‌نمه‌دييي بو كليمه توتونماميشدير. كله‌جي كليمه‌سينين
توتونماماسيندا، سونوندا بولونان –جي اكينين توركجه‌ده فاعيل آدي اوره‌تمه‌سي،
آيريجا بو كليمه‌نين كلله‌جي`يه بنزه‌مه‌سينين اوينامي اولموشدور. بونون اوزه‌رينه
آتاچ داها سونرالار كله‌جي يئرينه، "تيلجيك" و "تيلجه" كليمه‌له‌ريني
اوره‌تميشدير. چاغداش توركجه‌ده "ديلجيك" كليمه‌سي كيچيك ديل، بيزير،
ترازي ايبره‌سي و بادامجيق آنلاملاري داشيماقدادير. بوندان دولايي دا توركجه‌ده
اسكي "تيل" بيچيمي، چوخدان "ديل" اولماسينا قارشين، آتاچ
چاغداش بيچيم اولان "ديلجيك" يئرينه اسكي "تيلجيك" بيچيميني
ايشله‌تميشدير. آتاچ`ين اؤنه‌ردييي "تيلجيك" كليمه‌سي، تورك ديل
قورومونون توركجه سؤزلويونه آلينميش، آنجاق آتاچ`ين اؤزو ديشيندا چوخ آز كيشي طره‌فينده‌ن
به‌يه‌نيليپ قوللانيلميش، اؤلومونده‌ن سونرا ايسه توركجه سؤزلوكده‌ن
چيخاريلميشدير.
سؤزجوك: "كله‌مه" و "تيلجيك" دئگيله‌رينين توتونماماسي ايله، عره‌بجه "كلمه"يه اويقون توركجه قارشيليق آرامايا داوام ائديلميشدير. ١٩٥٨ ده مليح جئوده‌ت آنداي، "تيلجيك" كليمه‌سي ياپيسيني يانسيلاياراق، "سؤزجوك" كليمه‌سيني اوره‌تميشدير. (او ١٩٦٠ دا بونو اؤز يازيلاريندا دا بليرتميشدير. آنجاق بير سيرا شخصله‌ر، "سؤزجوك" كليمه‌سيني، "تيلجيك" كليمه‌سينين سؤزلوكده‌ن چيخاريلماسيندان سونرا، سؤزلوك قولو باشخاني اولان مهمه‌ت علي آغاكاي`ين اوره‌تديييني ايله‌ري سورموشدورله‌ر). "سؤزجوك" كليمه‌سي زامانلا توركييه‌ده توتونموش و اؤزومسه‌نميشدير. حتتا سون ايلله‌رده آزربايجان و ايراندا توركجه يازي ديلينه ده گيرميشدير. بونا قارشين يارانديغي گونده‌ن بري، بو كليمه‌ني سورونلو بولوپ اونا قارشي چيخانلار دا وار اولموشدور. سؤزوجوك`ه قارشي چيخانلار، توركجه‌ده بئله بير كليمه‌نين گئچميشي اولماديغيني و آنلامسال اولاراق يانليش اولدوغونو ايله‌ري سورورله‌ر. اونلارا گؤره هئچ بير شكيلده "سؤزجوك"ده‌ن كليمه آنلاميني چيخارتماق مومكون دئييلدير. "سؤزجوك"، سؤزون كيچييي و يا كيچيك سؤز دئمه‌كدير. اويسا كليمه سؤزون كيچييي و يا كيچيك سؤز دئييلدير. بيزجه ده سؤزجوك تؤره‌تيسي آنلامسال اولاراق سورونلودور. -جيك اكي، كيچيكليك، آشاغيليق، فورمال اولماما آنلاملاريني داشييير. سؤزجوك كليمه‌سينين توركجه‌ده توتونما گرچه‌ييني گؤز اؤنونه آلاراق، اونو ديلده‌ن ديشلاماق گره كسيز و حتتا اولاناقسيزدير. آنجاق بو كليمه‌نين وار اولان آنلامسال سورونو چؤزولمه‌‌ليدير. بيزجه آشاغيداكي يوروم-چؤزوم و ايشلهتمه بيچيمي، بو يئني تؤره‌تينين آنلامسال سورونونو اورتادان قالديرابيله‌ر. بو يوروم -ايشلهتمه، كليمه آنلامي داشييان "دئگي" تؤره‌تيسي و اونون ايكي "سؤز" و "سؤزجوك"ه آيريلماسي تمه‌لينده‌دير.
دئگي: دئگي عره‌بجه "كلمه"نين توركجه
قارشيليغيدير (دئ.مهك فئعلينين كؤكو+ -گي سون اكي. وئر.مهك- وئر.گي كيمي).
دئگي`نين گنه‌ل و اؤزه‌ل اولماق اوزه‌ره ايكي آنلامي واردير. گنه‌ل آنلامي، سؤيله‌نه‌ن
هر هانسي بير سؤز و سؤزجوكدور. بو آنلامدا دئگي، فارسجا "گفته و سخن"
قارشيليغيدير. دئگي`نين اؤزه‌ل آنلامي ايسه عره‌بجه كلمه و فارسجا واژه`دير. اؤزه‌ل
آنلامدا دئگي، ايكي بؤلومه، "سؤز" و "سؤزجوك"ه آيريلير:
-سؤز:
گؤركول (اده‌بي) و
يازيلي ديلده منيمسه‌نميش دئگي، "كلمه" و "واژه"
قارشيليغيدير.
-سؤزجوك: گؤركول (اده‌بي) و
يازيلي ديل دوزئيينده ايشله‌ديلمه‌يه‌ن؛ قوللانيمي آغيزلار و سؤزه‌ل ديلله سينيرلي
اولان؛ يا دا ديلده‌كي ياد كؤكه‌نلي كليمه‌له‌ر آنلاميندادير. بير
"سؤزجوك"، يالنيز گؤركول (اده‌بي) ديله قازانديريلديقدان سونرا،
"سؤز" دوزئيينه (سه‌وييه‌سينه) يوكسه‌له‌بيله‌ر.
دئگي: كلمه، سخن، گفته
ديلجيمه‌ن:
خوش صحبت
سؤز: كلمات وارد شده به زبان ادبي و نوشتاري، كلمات با
منشاء تركي
سؤزجوك: كلمات زبان خارج از زبان ادبي و نوشتاري، كلمات با
منشاء غيرتركي
كله‌جي:
شخص بليغ
كله‌جيلي:
سخن بليغ
كله‌مه‌ك:
سخن بليغ گفتن، دعا كردن
كله‌مه:
دعا
كله: دعا
Sozumuz,
a window opening to the life/culture of the turkish nation of iran/south
azerbaijan:
http://sozumuz.blogspot.com/
http://sozumuz-turk-dovletler.blogspot.com/
http://sozumuz.blogspot.com/
http://sozumuz-turk-dovletler.blogspot.com/
No comments:
Post a Comment