یوبانیردی سانکی گونش اوسحر / دان یئرین توتموشدو قارا دومان چن
آراز بویو سوسان لال اولان قوشلار/ یاشاییردی گلن آنلاری ارکن
آیریلیقدان آیری دوشه بیلمه ین لاله لرین باغری دولو قان ایدی
نرگیزین گؤزوندن سوزن داملادا قایالار اوچوران بیر طوفان ایدی
کیم دئیردی سئللر سارادان سونرا خان چوبانین دوزاق قوروب یولونا
آرازین گؤرونمز بوروخلاریندا صمدین حیاتی چاتاجاق سونا
اوگون گؤزو یولدا قالان سهندین دادینا چاتمادی ساوالان بابا
یوخسول اوشاغلارین اومود چراغی کند اوخوللاریندا یانمادی داها
اوغورلاندی چنلی بئلین قیر آتی مصری قلیج چیخماز اولدو قئنیندان
سارایلاردا ظالیم خانلار گولرکن بیر جنگی گلمه دی آشیق جنوندان
بیر شافتالی آیری دوشدو مینیندن خیردا قارا بالیق ایتیردی یولون
قار داناسی یالقیز قالیب اریدی سوسوزلوق قوروتدو تلخونون کولون
اؤلوملو سورگونلو ایللردن سونرا او بیر چراغ ایدی یولا نور ساچان
دیلی باغلی اسیر اولان ائللرین قورتولوش یولونون اؤنونو آچان
سئوگی دولو آرزی دولو بیر گونش آرازدا باتسادا او گون بیر آندا
صمد عمی ناغیللارا قوشولدو آدی اؤلمز اولدو آذربایجاندا
اسماعیل جمیلی
No comments:
Post a Comment