ايران توركله‌ري، آزه‌ربايجان`ين وطه‌ن اولماسي، تورك عيرقي، آزه‌ربايجان قوومو، آزه‌ري آدي، ....

مئهران باهارلي

بير سيرا شخصله‌ر داواملي اولاراق منيم ساوونماديغيم و ردد ائتديييم گؤروشله‌ري منه ياپيشديراراق، اؤز عاله‌مله‌رينده مني تخريب ائتمه‌يه قالخيشيرلار. بونون نده‌ني، بو اينسانلارين منيم اونلاري قورخويا سالان اؤز گؤروشله‌ريمي ردد حتتا نقد ائتمه‌كده‌ن عاجيز اولدوقلاري و بونو باشاراماديقلاري، اونون يئرينه منيم ساوونماديغيم يانليش گؤروشله‌ري منه ياپيشديراراق ردد ائده‌بيله‌جه‌ك بير شئي ياراتما ايسته‌مه‌سيدير. بونلارين سون اؤرنه‌يي، ل. م.`نين من و گويا دوشونجه‌له‌ريم حاققيندا يازديغي بير يازيدير. او حه‌ياتيندا يازديغي بو ايلك و تك يازيسيني، يازابيلدييي تك ديل اولان فارسجادا يازميش و گؤبه‌ك باغي ايله باغلي اولدوغو ايران-فارس سايتلارينا گؤنده‌رميشدير. سؤزو ائديله‌ن فارسجا يازي باشدان سونا منيم حاققيمدا يالانلارلا دولو، تخريبات آماجلي و لومپه‌نجه بير يازيدير. بو اوزده‌ن ده يانيتلانماني حاقق ائتمير. سفاهه‌ت و بلاهه‌ت اورونو اولان بو يازيدا منيم ردد ائتديييم چوخ ساييدا دوشونجه منه ايسناد ائديلميشدير. بلليدير كي منيم يازيلاريمي اوخوماميش اولان بو شخص، بو ايدديعالاري ساغدان سولدان اؤزو كيمي باشقا تخريباتچي شخصله‌رين جاهيلانه ساچمالاديقلاريندان درله‌ميشدير. آشاغيدا بونلاردان بير نئچه‌سينه ده‌يينيره‌م:

ايران توركله‌ري: بو شخص ايدديعا ائتميشدير كي من ايران توركو ايدئولوژيسينه اينانيرام. ترسينه من نه تك ايران توركو ايدئولوژيسينه اينانميرام، بلكه ايران توركو قاورامي و كيملييينه- اؤزه‌لليكله ميللي و ائتنيك آنلامدا- كسينليكله قارشييام. ايران قاورامينا مودئرن چاغدا ميلله‌ت- دئوله‌ت آنلامي قازانديريلديغيندان دولايي ايران قاورامي تورك قاورامينين آنتي تئزي، و ايران توركو كيملييي ده ايچ چليشكيسي اولان بير تركيبدير. بو اوزده‌ن ده من يازيلاريمدا هميشه ايران توركو يئرينه ايراندا ياشايان تورك خالقي تركيبيني ايشله‌ده‌ره‌م. بو تركيبي ايشله‌تمه‌كده‌ن آماجيم ايسه، ايران توركو دييه ائتنيك-ميللي بير قاورامين اولماديغي و ياراديلماماسي گره‌كديييني وورقولاماقدير. چونكو ايران، آزه‌ربايجان كيمي، تكجه جوغرافي و تابيعييه‌ت آديدير و ائتنيسيته – ميللييه‌ت آدي اولابيلمه‌ز. بو آچيدان ايراندا ياشايان تورك خالقي واردير، عئينه‌ن توركييه‌ده، آزه‌ربايجاندا و سورييه‌ده ياشايان تورك خالقي كيمي. آنجاق ايران توركو، آزه‌ربايجان توركو، عيراق توركو دييه ائتنيك و ميللي كيمليكله‌ر يوخدور، اولماميشدير و اولماياجاقدير. آنلاشيلان كيلاسيك آزه‌ربايجانچي قيليغينا گيرميش بير سيرا روسزده و اوتانجاق پان ايرانيستله‌ر، منيم آزه‌ربايجان توركو قاوراميني- ائتنيك آد اولاراق- اله‌شديرديييمي گؤرونجه، اؤزله‌رينه خاص اولان ساده‌ليك و بلاهه‌تله آزه‌ربايجان توركونه اينانمايان بيرينين هر حالدا ايران توركونه اينانديغي سونوجونا وارميشلاردير. اويسا يانيلميشلار. آزه‌ربايجان توركو اولماديغي كيمي، تورك خالقينين باشقا بير جوغرافييايا منسوب آيري ائتنيك كيملييي ده يوخدور. وار اولان تورك خالقي و تورك ائتنيك ميللي كيمليييدير. ايسته‌ر بو خالقين پارچالاري ايراندا ياشاسين، ايسته‌ر آزه‌ربايجاندا ياشاسين، ايسته‌ر اورتادوغو يا قافقازين باشقا بير يئرينده. وار اولان ايراندا ياشايان تورك، آزه‌ربايجاندا ياشايان توركدور. آنجاق ميللي بير آنتيته اولاراق ايران توركو، آزه‌ربايجان توركو دئييلدير. سيياسي آچيدان ايسه منجه بعضيله‌رينين منيمسه‌دييي ايران توركو ايستيراتئژيسي آزه‌ربايجان توركو ايستيراتئژيسي، همه‌دان توركو ايستيراتئژيسي، مركه‌زي اوستان توركو ايستيراتئژيسي كيمي يانليش و ضره‌رليدير. چونكو بئله ائتنيك كيمليكله‌ر يوخدور. آيريجا بو آدلانديرمالار ايراندا وار اولان تورك خالقي و كيمليييني بؤله‌ر. بيزيم ائتنيك كيملييييميز تكجه توركدور. عئينه‌ن توركييه‌ده ياشايانلار كيمي. بونون اؤنونه هر هانسي باشقا جوغرافي كلمه، ايسته‌ر ايران، ايسته‌ر آزه ربايجان، ايسته‌ر همه‌دان،.... آرتيريلماماليدير.

ايران، توركله‌رين ازه‌لي- ابه‌دي مولكودور: بو شخص بئله بير ايدديعادا بولونموشدور كي گويا من ايران`ي تورك خالقينين ازه‌لي و ابه‌دي يوردو بيليره‌م. اويسا من كسينليكله بو گؤروشون يانليش اولدوغونا اينانيرام. بوگون ايران دييه آدلانان توپراقلارين هاميسي و يا بير بؤلومونه مين ايلده‌ن آرتيق تورك خالقي حاكيم اولموشسا دا، بو اؤلكه تورك خالقينين ازه‌لي و ابه‌دي يوردو دئييلدير، اولماميشدير و اولماياجاقدير. تورك خالقينا دا اؤزه‌لليكله گله‌جه‌كده عاييد دئييلدير. ايران`ين تورك خالقينين مولكو اولدوغونو سؤيله‌مه‌ك چين`ين اويقورلارين و روسييانين تاتارلارين مولكو اولدوغونو سؤيله‌مه‌ك قده‌ر يانليش و ساچمادير. بوگون تكجه ايران سينيرلاري ايچينده ياشايان تورك خالقينين يئرله‌شدييي توپراقلار، يعني ايران`ين قوزئي باتيسيندا ائتنيك آزه‌ربايجان، ايران`ين اورتا و گونئيينده و ايران`ين قوزئي دوغوسونداكي تورك توپراقلاري تورك خالقيني ايلگيله‌نديره‌ر و اونون مولكودور. بونون ديشيندا ايراندا يئرله‌شه‌ن اؤته‌كي ائتنيك بؤلگه‌له‌ر، كوردوستان، فارسيستان، عره‌بيستان، لوريستان، گيلان، توركمه‌نيستان، لاريستان، لكيستان، مازه‌نده‌ران، بلوچيستان، ... نه تورك خالقينين مولكودور، نه ده اونو ايلگيله‌نديره‌ر. بو ائتنيك بؤلگه‌له‌رين صاحيبي واردير و او دا اورادا ياشايان ميلله‌تله‌رين اؤزله‌ريدير، نه تورك خالقي.

آزه‌ربايجان`ين وطه‌ن اولماسي: بو شخص ايدديعا ائتميشدير كي من آزه‌ربايجان`ين وطه‌ن اولماسيني شوبهه آلتينا آلماغا چاليشيرام. آزه‌ربايجان`ين هارا اولدوغونو بيله بيلمه‌يه‌ن بو سفيه شخصين ايدديعاسينين ترسينه، من نه تك آزه‌ربايجان`ين تورك خالقينين ايران`ين قوزئي باتيسيندا ياشايان بؤلومونون، بلكه ايران`ين باشقا بؤلگه‌له‌رينه داغيلميش تورك خالقينين دا وطه‌ني اولدوغونو، بو بيلينجين ياراديلماسي گره‌كدييينه اينانيرام. بو شخصين اؤزودور كي باشقا اوتانجاق پان ايرانيست- كيلاسيك آزه‌ربايجانچي طوطولار كيمي آديني تكرارلاديغي آزه‌ربايجان`ين هارا اولدوغونو بيلمير، اونون ايران دئوله‌تينين كولونييال سيياسه‌تله‌ري دوغرولتوسوندا اون اوچ اوستان آراسيندا بؤلوشدورولدويونده‌ن خبه‌ري يوخدور و كوردوستان، مركه‌زي، همه‌دان، .... كيمي اوستانلارا ايلحاق ائديله‌ن آزه‌ربايجان توپراقلارينين وطه‌ن اولدوغونو دانير. تورك خالقي ايله مسكون و ائتنيك آزه‌ربايجان`ين پارچالاري اولان توپراقلارين فارس و كوردله‌ره وئريلمه‌سيني ساوونان بئله سفيه شخصله‌رين، تورك خالقي و آزه‌ربايجانا ائتديكله‌ري دوشمه‌نليك و وئرديكله‌ري ضره‌ر، ايران دئوله‌تي، روسييا، كورد ياييلماچيلاري و ائرمه‌نيستانين وئردييي ضره‌رده‌ن قات قات داها آرتيقدير. چونكو بونلار ايكينجي قوروپون ماشالاريديرلار. بئله روسزده و ايران پرست كيلاسيك آزه‌ربايجانچيلار اوچون آزه‌ربايجان، ايران دئوله‌تينين كولونييال ايداري تقسيماتيندا هله ده آزه‌ربايجان آدي داشييان بير ايكي اوستاندان باشقا بير شئي دئييلدير.

تورك نژادي- تورك عيرقي: بو شخص منيم تورك نژادي-تورك عيرقيندان باشقا هئچ بير كيملييي قبول ائتمه ديييمي ايدديعا ائتميشدير. بو ايدديعا جفه نگ و يالاندير. اساسه ن بونا گؤره كي من تورك عيرقي دييه بير عيرقين وارليغينا اينانميرام. وار اولان تورك ميللي –ائتنيك كيملييدير، تورك عيرقي و تورك نژادي دئييلدير. تورك خالقي، بؤلگه ميزين بوتون خالقلاري كيمي اؤزونون اوزون تاريخي بويونجا يئرلي و كؤچمه ن قوروپلارين قاريشيميندان اولوشموش، قارما بير خالقدير. آيريجا تكجه بير كيمليييه اينانان بو شخص و اونون كيمي كيلاسيك آزه ربايجانچيلارديرلار كي آزه ربايجان كيمليييني آچار فرانسه كيمي هم ائتنيك، هم ميللي، هم يوردداشليق، هم جوغرافي، .... كيمليك اولاراق يئرلي يئرسيز ايشله ديرله ر و اوندان باشقاق كيمليكله رين وار اولماسي گرچه يي، اؤزه لليكله تورك ميللي –ائتنيك كيملييي، اولاري وحشه ت و قورخويا سالير. اويسا من بو شخصين تمه لسيز ايدديعاسينين ترسينه، نه تك فرقلي كيمليكله ره اينانيرام، بلكه تيتيزليكله و اؤزه نله بو فرقلي كيمليكله رين، اولدوقلاري كيمي، قورونماسيني ساوونورام. او جومله ده ن تورك ائتنيك –ميللي كيمليي، آزه ربايجان جوغرافي كيملييي، ....

آزه‌ربايجان قوومو: داها دا آجيناجاقلي دوروم، اؤزو عيرقچي اولوپ آنجاق بوندان خبه‌رسيز اولان بئله نادان بير شخصين مني نژادي كيملييه اينانماقلا، آيريجا كورد و فارس دوشمه‌نلييي سالماقلا سوچلاماسيدير. اويسا بو شخص اؤزو عيرقجيدير. چونكو اؤز يازيسيندا تورك نژاديندان –تورك عيرقيندان دانيشير. اؤته ياندان، كيلاسيك آزه‌ربايجانچيلار تورك خالقينين ائتنيك ميللي كيمليييني توركده‌ن ائتنيك آنلامدا اولان آزه‌ربايجانلييا ده‌ييشديرمه‌كله عيرقچيليق ائديرله‌ر. آزه‌ربايجان، قوومي- ائتنيك- ميللي آد و كيمليك دئييلدير. جوغرافي منسوبييه‌ت و تابيعييه‌ت آديدير. كيلاسيك آزه‌ربايجانچيلارين تورك خالقينين تاريخي ائتنيك آديني، جوغرافي آد اولان آزه‌ربايجانلييا ده‌ييشديرمه‌سي، بو آچيدان تورك خالقينا قارشي ياپيلان آچيق عيرقچيليقدير. چونكو ائتنيك و ميللي قوروپلارين اؤزله‌ريني آدلانديرديقلاري تاريخي ميللي ائتنيك آدي، اؤزه‌لليكله ايران دئوله‌تينين قوندارديغي آزه‌ري و روسييانين قوندارديغي آزه‌ربايجانلي كيمي تمه‌لسيز آدلارلا ده‌ييشديرمه‌ك عيرقچيليقدير. بو شخص و اونون كيميله‌ري آيريجا، آزه‌ربايجاندا ياشايان كورد و فارس خالقلارينا قارشي دا عيرقچيليق ائديرله‌ر. چونكو اونلاردان آزه‌ربايجانلي اولما اورتاق جوغرافي و وطه‌ن كيمليييني آليپ، بو آدي تورك خالقينا وئره‌ره‌ك اونا اؤزه‌ل ائديرله‌ر.

آزه‌ري آدي: بو شخص بئله بير ايدديعادا بولونموشدور كي من آزه‌ري كلمه‌سينه قارشي چيخماقلا آزه‌ربايجانا قارشي چيخماق ايسته‌ييره‌م. بو ايدديعا تك باشينا بيله، بو شخصين نه دنلي درين بير جهاله‌ت ايچينده اولدوغونو قانيتلاماغا يئته‌ر و آرتار. چونكو بو شخصين بوش ايدديعاسينين ترسينه، اويدورما و قوندارما آزه‌ري ائتنيك آدينا قارشي چيخماق، سؤزون اصل آنلاميندا تورك خالقينين ميلله‌تله‌شمه و آزه‌ربايجان`ين وطه‌نله‌شمه‌سينين گره‌يي و آچاريدير. ترسينه بير گون پان ايرانيستله‌رين قوندارماسي اولان آزه‌ري آديني، باشقا بير گون روسييا ياپيمي اولان آزه‌ربايجانلي جوغرافي آديني تورك خالقي آدي يئرينه ايشله‌تمه‌ك، بو قوندارما آدلارلا تورك خالقينين ميلله‌تله‌شمه و آزه‌ربايجان`ين وطه‌نله‌شمه‌سي آراسيندا باغ قورماق، تورك خالقينا و آزه‌ربايجان وطه‌نينه دوشمانچيليق و خه‌يانه‌تدير. بو اوزده‌ن ده گونوموزده آزه‌ري قوندارما ائتنيك آديني ساوونان و ايشله‌ده‌ن، گئچه‌ن نسله منسوب نئچه اوتانجاق پان ايرانيست- كيلاسيك آزه‌ربايجانچي فوسيلده‌ن باشقا كيمسه قالماميشدير. آنجاق بونلار دا آزره‌ي آدي كيمي تاريخ اولماغا محكومدورلار.

Sozumuz, a window opening to the life/culture of the turkish nation of iran/south azerbaijan:
http://sozumuz.blogspot.com/
http://sozumuz-turk-dovletler.blogspot.com/

http://elobaoymaqlarimiz.blogspot.com/

http://demoqrafi.blogspot.com/
http://tomarlar.blogspot.com/

http://xatun.blogspot.com/