Méhran Baharlı
Bir sıra şexsler davamlı olaraq menim
savunmadığım ve redd étdiyim görüşleri mene yapışdıraraq, öz âlemlerinde meni
texrib étmeye qalxışırlar. Bunun nedeni, bu insanların menim onları qorxuya
salan öz görüşlerimi redd hetta neqd étmekden âciz olduqları ve bunu
başaramadıqları, onun yérine menim savunmadığım yanlış görüşleri mene
yapışdıraraq redd édebilecek bir şéy yaratma istemesidir.
Bunların son örneyi L. M.`nin guya men
ve düşüncelerim haqqında yazdığı bir yazıdır. O heyatında yazdığı bu ilk ve tek
yazısını, yazabildiyi tek dil olan Farscada yazmış ve göbek bağı ile
bağlı olduğu İran-Fars saytlarına göndermişdir.
Sözü édilen Farsca yazı başdan sona
menim haqqımda yalanlarla dolu, texribat amaclı ve lümpence bir yazıdır. Bu
üzden de yanıtlanmanı haqq étmir. Sefahet ve belahet ürünü olan bu yazıda menim
redd étdiyim çox sayıda düşünce mene isnad édilmişdir. Bellidir ki menim
yazılarımı oxumamış olan bu şexs, bu iddiaları sağdan soldan özü kimi başqa
texribatçı ve şexslerin câhilâne saçmaladıqlarından derlemişdir. Aşağıda
bunlardan bir néçesine deyinirem:
İran Türkleri: Bu şexs iddia étmişdir ki men İran
Türkü idélojisine inanıram. Tersine men ne tek İran Türkü idélojisine
inanmıram, belke İran Türkü qavramı ve kimliyine –özellikle milli ve étnik
anlamda- kesinlikle qarşıyam. İran qavramına modern çağda millet-devlet anlamı
qazandırıldığından dolayı İran qavramı Türk qavramının antitézi, ve İran Türkü
kimliyi de iççelişkisi olan bir terkibdir. Bu üzden de men yazılarımda hemişe
İran Türkü yérine İranda yaşayan Türk xalqı terkibini işlederem. Bu terkibi
işletmekden amacım ise, İran Türkü diye étnik-milli bir qavramın olmadığı ve
yaradılmaması gerekdiyini vurqulamaqdır. Çünkü İran, Azerbaycan kimi, tekce coğfrafi
ve tâbiiyyet adıdır ve étnitisite-milliyet adı olabilmez. Bu açıdan İranda
yaşayan Türk xalqı vardır, éynen İraqda, Türkiyede, Azerbaycanda ve Suriyede
yaşayan Türk xalqı kimi. Ancaq İran Türkü, Azerbaycan Türkü, İraq Türkü diye
étnik ve milli kimlikler yoxdur, olmamışdır ve olmayacaqdır. Anlaşılan Kilasik
Azerbaycançı qılığına girmiş bir sıra Ruszede ve utancaq paniranistler, menim
Azerbaycan Türkü qavramını-étnik ad olaraq- eleşdirdiyimi görünce, özlerine xas
olan sâdelik ve belahetle, Azerbaycan Türkü`ne inanmayan birinin her halda İran
Türkü`ne inandığı sonucuna varmışlardır. Oysa yanılmışlar. Azerbaycan Türkü
olmadığı kimi, Türk xalqının başqa bir coğrafiyaya mensub ayrı étnik kimliyi de
yoxdur. Var olan Türk xalqı ve Türk étnik milli kimliyidir, ister bu xalqın
parçaları İranda yaşasın, ister Azerbaycanda yaşasın, ister Ortadoğu ya
Qafqazın başqa bir yérinde. Var olan İranda yaşayan Türk, Azerbaycanda yaşayan
Türk`dür, ancaq milli bir antite olaraq İran Türkü, Azerbaycan Türkü déyildir.
Siyâsi açıdan ise mence be`zilerinin menimsediyi İran Türkü istiratéjisi
Azerbaycan Türkü, Hemedan Türkü, Merkezi ostan Türkü istiratéjisi kimi yanlış
ve zererlidir. Çünkü béle étnik kimlikler yoxdur, ayrıca bu adlandırmalar Türk
xalqı ve kimliyini böler. Bizim étnik kimliyimiz tékcǝ TÜRKdür, éynen Türkiyédé yaşayanlar
kimi. Bunun önüne her hansı başqa coğrafi kelme, ister İran, ister Azerbaycan,
ister Hemedan, ….. artırılmamalıdır.
İran Türklerin ezeli ebedi mülküdür. Bu şexs béle bir iddiada bulunmuşdur
ki guya men İran`ı Türk xalqının ezeli ve ebedi yurdu bilirem. Oysa men
kesinlikle bu görüşün yanlış olduğuna inanıram. Bugün İran diye adlanan
torpaqların hamısı veya bir bölümüne min ilden artıq Türk xalqı hâkim olmuşsa
da, bu ölke Türk xalqının ezeli ve ebedi yurdu déyildir, olmamışdır ve
olmayacaqdır, Türk xalqına da özellikle gelecekde âid déyildir. İran`ın Türk
xalqının mülkü olduğunu söylemek Çinin Uyqurların ve Rusiyanın Tatarların mülkü
olduğunu söylemek qeder yanlış ve saçmadır. Bugün tekce İran sırnırları içinde
yaşayan Türk xalqının yérleşdiyi topraqlar, yanı İranın quzéy batısında Étnik
Azerbaycan, İranın orta ve günéyinde ve İranın quzéy doğusundakı Türk
topraqları Türk xalqını ilgilendirer ve onun mülküdür. Bunun dışında İranda
yérleşen öteki étnik bölgeler, Kürdüstan, Farsistan, Erebistan, Loristan,
Gilan, Türkmenistan, Laristan, Lekistan, Mazenderan, Beluçistan, …. Ne Türk
xalqının mülküdür ne de onu ilgilendirer. Bu étnik bölgelerin sâhibi vardır ve
o da orada yaşayan milletlerin özleridir, ne Türk xalqı.
Azerbaycanın veten olması: Bu şexs iddia étmişdir ki men
Azerbaycanın veten olmasını şübhe altına almağa çalışıram. Azerbaycanın hara
olduğunu bile bilmeyen bu sefih şexsin iddiasının tersine, men ne tek
Azerbaycanın Türk xalqının İranın quzéy batısında yaşayan bölümünün, belke
İranın başqa bölgelerine dağılmış Türk xalqının da veteni olduğunu, bu bilincin
yaradılması gerekdiyine inanıram. Bu şexsin özüdür ki, başqa Utancaq paniranist-kilasik
Azerbaycançı papağanlar kimi adını tekrarladığı Azerbaycanın hara olduğunu
bilmir, onun İran dévletinin koloniyal siyasetleri doğrultusunda on üç ostan
arasında bölüşdürüldüyünden xeberi yoxdur ve Kürdüstan, Merkezi, Hemedan …..
kimi ostanlara ilhaq édilen Azerbaycan topraqlarınının veten olduğunu danır.
Türk xalqı ile meskun ve étnik Azerbaycanın parçaları olan topraqların Fars ve
Kürdlere vérilmesini savunan béle sefih şexslerin, Türk xalqı ve Azerbaycana
étdikleri düşmenlik ve vérdikleri zerer, İran dévleti, Rusiya, Kürd
yayılmaçıları ve Ermenistanın vérdiyi zererden qat qat daha artıqdır, çünkü
bunlar ikinci qurupun maşalarıdırlar. Béle Ruszede ve İranperest Kilasik
Azerbaycançılar üçün Azerbaycan, İran devletinin koloniyal idari teqsimatında
hele de Azerbaycan adı daşıyan bir iki ostandan başqa bir şéy deyildir.
Türk néjadı-Türk ırqı: Bu şexs, menim Türk néjadi-Türk
ırqından başqa héç bir kimliyi qebul étmediyimi iddia étmişdir. Bu iddia cefeng
ve yalandır. Esasen buna göre ki men Türk ırqı diye bir ırqın varlığına
inanmıram. Var olan Türk milli étnik kimliyidir, Türk ırqı veya Türk néjadı
déyildir. Türk xalqı, bölgemizin bütün xalqları kimi özünün uzun târixi boyunca
yérli ve köçmen qurupların qarışımından oluşmuş, qarma bir xalqdır. Ayrıca tekce
bir kimliye inanan bu şexs ve onun kimi kilasik Azerbaycançılardır ki
Azerbaycan kimliyini açar feranse kimi hem étnik, hem milli, hem yurddaşlıq,
hem coğrafi kimlik olaraq yérli yérsiz işledirler ve ondan başqa kimliklerin
var olması gerçeyi, özellikle Türk milli-étnik kimliyi, onları vehşet ve
qorxuya salır. Oysa men bu şexsin temelsiz iddiasının tersine, ne tek ferqli
kimliklere inanıram, belke titizlikle ve özenle bu ferqli kimliklerin olduqları
kimi qorunmasını savunuram. O cümleden Türk milli étnik kimliyi, Azerbaycan
coğrafi kimliyi, ….
Azerbaycan qovmu: Daha da acınacaqlı durum özü ırqçı
olup ancaq bundan xebersiz olan béle nadan bir şexsin meni néjadi kimliye
inanmaqla, ayrıca Kürd ve Fars düşmenliyi ile suçlamasıdır. Oysa bu şexs özü
ırqçıdır. Çünkü öz yazısında Türk néjadından –Türk ırqından danışır. Öte yandan
kilasik Azerbaycançılar Türk xalqının étnik milli kimliyini Türkden étnik
anlamda olan Azerbaycanlıya deyişdirmekle ırqçılıq édirler. Azerbaycanlı
qovmi-étnik-milli ad ve kimlik déyildir, coğrafi mensubiyet ve tâbéiyyet
adıdır. Kilasik Azerbaycançıların Türk xalqının târixi étnik adını coğrafi ad
olan Azerbaycanlıya deyişdirmesi bu açıdan Türk xalına qarşı yapılan açıq
ırqçılıqdır. Çünkü étnik ve milli qurupların özlerini adlandırdıqları târixi
milli étnik adı –özellikle İran devletinin qondardığı Azeri ve Rusiyanın
qondardığı Azerbaycanlı kimi temelsiz adlarla deyişdirmek ırqçılıqdır. Bu şexs
ve onun kimileri ayrıca Azerbaycanda yaşayan Kürd ve Fars xalqlarına da
qarşı ırqçılıq édirler. Çünkü onlardan Azerbaycanlı olma ortaq coğrafi ve veten
kimliyini alıp, bu adı Türk xalına vérerek ona özel édirler.
Azeri adı: Bu şexs béle bir iddiada bulunmuşdur
ki men Azeri kelmesine qarşı çıxmaqla Azerbaycana qarşı çıxmaq isteyirem. Bu
iddia tek başına bile bu şexsin ne denli derin bir cehalet içinde olduğunu
qanıtlamağa yéter ve artar. Çünkü bu şexsin boş iddiasının tersine uydurma ve
qondarma Azeri étnik adına qarşı çıxmaq sözün esl anlamında Türk xalqının
milletleşme ve Azerbaycanın vetenleşmesinin gereyi ve açarıdır. Tersine bir gün
paniranistleri qondarması olan Azeri adını, başqa bir gün Rusiya yapımı
Azerbaycanlı coğrafi adını Türk xalqı adı yérine işletmek, bu qondarma adlarla
Türk xalqının milletleşmesi ve Azerbaycanın vetenleşmesi arasında bağ qurmaq,
Türk xalqına ve Azerbaycan vetenine düşmançılıqdır. Bu üzden de günümüzde Azeri
qondarma étnik adını savunan ve işeleden géçen nesle mensub néçe utancaq
paniranist –kilasik Azerbaycançı fosilden başqa kimse qalmamışdır.
Sozumuz,
a window opening to the life/culture of the turkish nation of iran/south
azerbaijan:
http://sozumuz.blogspot.com/
http://sozumuz-turk-dovletler.blogspot.com/
http://sozumuz.blogspot.com/
http://sozumuz-turk-dovletler.blogspot.com/
No comments:
Post a Comment