15 گونلویونده کی بیر کؤرپهنین عوصیانی
بو فوتو شکیلی چکنده، قیزیمن یاشیندان 15 گون سوووشوردو. یومروغونون گؤیه قالدیرماغینین نه اولدوغونو ایلک اؤنجه آنلامادیم. ایچیمده یئنی بیر هیجان یاراندی، یئنی بیر دوشونجه و دوشونجهیه ساریلان یئنی بیر حال. اینسانین ایلک گونلریندن عوصیانلیغا حاضیر اولدوغونو آلادیم. آنلادیم کی اینسانین ایچینده اولان عوصیانلیق ایلک دوغولدوغو چاغدان باشلانیر. بلکه ده بو عوصیانلیق آنا بطنیندن یارانان زاماندان باشلاییب، قارانلیقدان ایشیغا چاتماق اوچوندور. بیز بؤیویوروک و سونرالار عوصیانلیغیمیزی اونودوروق. هر نه اؤز باشینا قالیر و بو اؤز باشینا قالانلار بیزی کؤله ائدیب، عوصیانلیغیمیزی ایچیمیزدن سیلیر...
رامین جهانگیرزاده
صیفیردان باشلایاندا
قارا صیفیرلی بیر جوت گؤزلرینی
گؤزلریمه دیکدین
دیکلدین حیاتیمین صیفیریندان
ساعاتلاری سوووشدوردون
15 گونلویونده
یئنه ده
گؤزلرین گؤزلریمه دوشدو
یومروغونو قالدیریب
عوصیان ائتدین
عوصیانلیغینی یاشاتدین
یئنی بیر هیجان
یئنی بیر اینقیلاب باشلاندی ایچیمده
قان تؤکمهدن فتح ائتدین اورهییمی
15 گونلویوندهکی ائتدیین اینقیلاب
هر بیر اینقیلابدان گؤزل
هر بیر اینقیلابدان اؤزل
یومروغونو ساخلامیشام ایچیمده
بیر گون عوصیانلیغیی اونوتسان
یومروغونو چیخارداجام ایچیمدن
گؤزلریمدن چیخاجاق یومروغون
گؤزلرینله گؤرجکسن
15 گونلویونده کی عوصیان ائدیب
اونوتدوغون اینقیلابینی
اونوتماکی هر زامان
عوصیان ائتمهیه حاضیر اولمالیسان
اونوتماکی اونودولمازدیر اینقیلاب
دونیا باشدان باشا، باشینا بوراخیلیب
بوراخما عوصیانلیغینی
دونیانی اؤز باشینا بوشلاماق اولماز
بوشو بوشونو دولدورار
ساغی سولونا قاریشار
نه ساغ قالار
نه سول
باشیندا قالسین 15 گونلویوندهکی عوصیانلیغین
باشیندا قالسین او اینقیلاب
یومروغونو ساخلامیشام ایچیمده
من بؤیودوم
بوشو باشینا بوشلادیم
دولدورا بیلمهدیم بوشلوقلاری
اونوتدوم عوصیانلیغیمی
اونوتدوم اینقیلابیمی
کؤله اولدوم
باری هئچ اولماسا سن
15 گونلویوندهکی عوصیانلیغینی
15 گونلویونده کی اینقیلابینی
اونوتما قیزیم
No comments:
Post a Comment